U Rwanda ruri kwiga uko abanyarwanda bose bagezwaho ubwisungane mu kwivuza

Yanditswe na Evariste Nsengimana
Kuya 15 Ukuboza 2017 saa 04:25
Yasuwe :
0 0

Nubwo amategeko y’u Rwanda ateganya ko buri muntu wese uri ku butaka bwarwo agira ubwishingizi bw’indwara, haracyagaragara abatabugira bitewe n’impamvu zirimo amikora make, imyumvire n’ibindi.

Ingingo ya gatatu y’itegeko n° 04 ryo kuwa 25 Mutarama 2016 rigena imiterere, imikorere n’imicungire y’ubwishingizi bw’indwara mu Rwanda, igira iti “Umuntu wese uri ku butaka bw’u Rwanda, yaba Umunyarwanda cyangwa Umunyamahanga ategetswe kuba afite ubwishingizi bw’indwara.”

Bumwe mu bwishingizi bukoreshwa mu Rwanda harimo na mituweli (Mutuelle de Santé) ikoreshwa n’abaturage benshi.

Imwe mu ngingo zihariye igiye kuganirwaho mu nama rusange y’Ishyirahamwe ry’abaganga mu Rwanda, ni ugushaka uburyo bwo kugeza ubwishingizi n’ubuvuzi ku Banyarwanda bose.

Umuyobozi w’iryo shyirahamwe, Dr. Kayitesi Kayitenjore, yatangaje ko bagiye kurebera hamwe icyakorwa kugira ngo 100% by’abanyarwanda bagira ubwishingizi bwo kwivuza.

Yagize ati “Buri mwaka turahura tugashaka ibibazo byugarije Abanyarwanda mu buzima bwabo bwa buri munsi. Uyu mwaka, icyo tuzaganiraho ni ukugeza ubuzima ku banyarwanda bose. Kureba uko bagira ubwishingizi mu buzima, butuma bashobora kwivuza kandi batishyuye amafaranga menshi.”

Dr. Kayitesi yakomeje avuga ko bafite intego ko mu 2020 bizaba byagezweho ku bufatanye n’abaterankunga.

Umuyobozi mukuru ushinzwe ibikorwa by’ubuzima muri Minisiteri y’Ubuzima, Dr. Zuberi Muvunyi, yavuze ko nubwo abanyarwanda basaga 80% bafite mutuweli, haracyari byinshi byo gukorwa ngo bose bagire ubwishingizi bwo kwivuza nk’uko biteganyijwe mu bikorwa by’intego z’iterambere rirambye (SDGs) u Rwanda rwihaye.

Yongeyeho ko uretse guharanira ko buri munyarwanda ashobora kugira ubwishingizi mu buzima, hari na gahunda yo kububegereza.

Yagize ati “Hari n’ubundi buryo bwo kubegereza ibigo by’ubuvuzi […] byose ni ukugira ngo Umunyarwanda ukeneye ibikorwa by’ubuvuzi bibe byamugeraho bitamugoye. Nongereho ko turi gukora n’ikintu gikomeye cyo guha imbaraga zirushijeho serivisi z’imbangukiragutabara. Hari igihe umurwayi afatirwa mu rugo akaba ayikeneye.”

Yakomeje avuga ko nka Minisiteri y’ubuzima ifatanyije n’abafatanyabikorwa kongerera imbaraga abajyanama b’ubuzima, bakaba bakongerwa; hakaba na gahunda yo kwigisha abantu bashinzwe kujya kwita ku barembeye mu rugo.

Abitabiriye Inama ya 19 y'Ishyirahamwe ry'abaganga mu Rwanda
Umuyobozi mukuru ushinzwe ibikorwa by’ubuzima muri Minisante, Dr. Zuberi Muvunyi
Umuyobozi w’Ishyirahamwe ry’abaganga mu Rwanda, Dr. Kayitesi Kayitenjore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza