U Rwanda rwungutse inzobere z’abaforomo za mbere mu kuvura impyiko

Yanditswe na Evariste Nsengimana
Kuya 17 Kanama 2017 saa 01:05
Yasuwe :
0 0

Minisiteri y’Ubuzima y’u Rwanda yungutse inzobere zirindwi z’abaganga mu kuvura indwara z’impyiko bikazafasha abarwayi kuvurirwa mu Rwanda batiriwe boherezwa mu mahanga.

Ubusanzwe mu mavuriro ya leta nta baganga bafite ubushobozi bwo kuvura cyangwa gusimbuza impyiko zirwaye. Ariko izo nzobere zisoje icyiciro cya gatatu cya kaminuza muri Kaminuza y’u Rwanda zifite ubwo bushobozi, zikaba zigiye kubanza kwimenyereza mu gihe cy’ukwezi mu Buhinde, aho ubwo buvuzi buteye imbere.

Kuri uyu wa 17 Kanama 2017, ubwo abo baforomo bateguraga urugendo rwo kujya muri ayo mahugurwa azatangira kuwa 18 Knama 2017, Minisitiri w’Ubuzima, Diane Gashumba, yavuze ko nibagaruka bazafasha igihugu kuvura abazirwaye no mu bukangurambaga bwo kuzirinda.

Yagize ati “Bize uburyo bwo kwigisha abaturage kwirinda izo ndwara ariko no kuvura abagize ibyago byo kuzirwara no kugabanya impfu zaterwaga na zo kuko ni nyinshi. Si mu gihugu cyacu gusa indwara zitandura zimaze gufata intera ndende, tukaba twishimira ko tugize abanyeshuri barindwi bize bakaminuza mu buryo bwo kuzivura.”

Yongeye ko bazazivura mu buryo “bwo gutanga imiti, gukoresha imashini ifasha impyiko zitagikora”.

Izi nzobere zigiye kujya mu Buhinde kwimenyereza ku bufatanye na Minisante na Kaminuza y’u Rwanda.

Dr Gashumba asobanura ko hari gahunda iteganywa yo kugeza ubuvuzi bwo gusimbuza impyiko irwaye inzima mu Rwanda, handi hari abashoramari baturutse hirya no hino bifuza kubaka ibitaro by’icyitegererezo mu kuvura indwara z’impyiko.

Aba bagiye kwimenyereza umwuga mu Buhinde bizeye ko bizabongerera ubumenyi kuko ibyo bize bagiye kubishyira mu bikorewa.

Umwe muri bo, Tuyisenga Marie Jeanne wigisha muri Kaminuza y’Ubuvuzi, yagize ati “Nk’uko mubizi, u Buhinde ni kimwe mu bihugu byateye imbere mu buvuzi by’umwihariko bw’impyiko. Abarwayi benshi ba hano iyo bibaye ngombwa boherezwayo kuvurwa. Icyo nizeye gukurayo, bumwe mu buryo bwo kuvura indwara z’impyiko twize harimo imashini ishobora gusukura impyiko zitagikora, kuba abantu bashobora guhana impyiko, ubu bwo mu Rwanda ntibukorwa, ukeneye kubikorerwa biba ngomba ko yoherezwa hanze harimo no mu Buhinde. Ubwo rero ndumva nzabasha kubona uko bikorwa n’amaso yanjye kuko nzabona abarwayi bari kubikorerwa.”

Yakomeje asobanura ko mu bindi bize harimo no gutegura utanga n’uhabwa impyiko kugira ngo buri wese yiyumvemo icyo gikorwa gikomeye agiye gukora, kuko banigishijwe ku kwita ku barwayi bahawe izo mpyiko mu ifatwa ry’imiti no gukurikirana abarwayi.

Inama ku kwirinda indwara zitandura zirimo n’iz’impyiko

Abantu basabwa gukora siporo, kunywa inzoga nke, kurya amavuta make, kwirinda isukari nyinshi, kwivuza no kwisuzumisha kare, mu rwego rwo kwirinda indwara zitandura kuko ziri kwiyongera.

Kugeza ubu, bimwe mu bitaro bifite imashini zibasha koza impyiko zitagikora harimo ibya CHUB, Gihundwe, Ibyitiriwe Umwami Faisal, CHUK, ibya Rubavu n’ibya Gisirikare i Kanombe bitegenya kuyikoresha umwaka utaha.

U Rwanda rwashize imbaraga mu kongera umubare w’abaganga bahugurwa, binyuze mu bahugurirwa muri kaminuza yarwo, umwaka ushize rwabonye abaganga b’inzobere mu kuvura indwara zitandukanye bagera kuri 70.

Minisitiri w’Ubuzima, Dr Diane Gashumba
Inzobere z'abaforomo zaganiriye na Minisante na Kaminuza y'u Rwanda mbere yo kwerekeza mu Buhinde
Umwe mu barangije kwiga bagiye guhugurirwa mu Buhinde, Tuyisenga Marie Jeanne

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza