Ubushomeri bwaba intandaro yo gucika k’udutsi tw’ubwonko?

Yanditswe na Ishimwe Daniel
Kuya 20 Mata 2017 saa 04:05
Yasuwe :
0 0

Abashakashatsi bo muri Kaminuza ya Osaka mu Buyapani bavuga ko ikibazo cy’ubushomeri kigaragara mu bagabo n’abagore bari mukigero cy’imyaka yo hagati muri iki gihugu(hagati y’imyaka 40 na 60), kiri kongera ibyago byo guturika k’udutsi tujyana amaraso mu bwonko mu batuye iki gihugu.

Ubushakashatsi bwasohowe mu kinyamakuru cy’umuryango urwanya indrwara z’umutima muri Amerika (American Heart Association) bwerekana ko iki kibazo kibasiye n’abatuye iki gihugu.

Ugereranyije n’abari mu kigero cy’imyaka hejuru ya 40 bafite akazi gahoraho mu Buyapani, abatakaje akazi nibura inshuro imwe bari muri icyo kigero, ibyago byabo byo kwibasirwa n’ubu burwayi cyangwa kwicwa nabwo byariyongereye naho abakomeje kubura akazi bo byiyongereye kurushaho.

Abashakasatsi basesenguye ingaruka z’ihinduka ry’akazi ku bagabo b’Abayapani, ibihumbi 21,902 n’abagore ibihumbi 19,826 bari hagati y’imyaka 40 na 59 mu gihe cy’imyaka 15, basanze abagabo 973 barahuye n’ubu burwayi naho 275 muri bo bahitanywe nabwo, mu gihe bwibasiye abagore 460 buhitanamo abagera ku 131.

Ibyavuye mubushakasha bishobora kutaba kimwe n’ibyava mu bindi bihugu kubera imico y’ahantu igiye itandukanye, ariko ikiriho ni uko izo ngero zihari.

Hiroyasu, Umwarimu muri kaminuza ya Osaka yo mu Buyapani akaba n’umwe mu bakoze ubu bushakashatsi, atangaza ko kugira akazi mu gihe cy’imyaka yo gukora ku bantu, bifasha kugabanya umubare w’abahitanwa n’indwara yo kwangirika k’udutsi tujyana amaraso mu bwonko.

Indwara yo gucika k’udutsi tujyana amaraso mu bwonko nibura yibasira abantu miliyoni 15 buri mwaka, muri bo abagera kuri miliyoni esheshatu bahitanwa na yo nk’uko ihuriro rigamije kurwanya indwara y’umutima ribitangaza.

Muri rusange ubu burwayi ni ubwa kabiri buhitana abantu benshi bari hejuru y’imyaka 60 bukaba ubwa gatanu mu guhitana imbaga mu bari hagati y’imyaka 15 na 59.

Iyi ndwara ntikunda kugaragara cyane mu bantu bari munsi y’imyaka 40 ariko bibaho ko na bo bayirwara. Abakiri bato bayiterwa ahanini n’umuvuduko ukabije w’amaraso.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza