Udupaki tw’amaraso ibihumbi 27 twagejejwe ku bitaro byo mu Rwanda hifashishijwe ‘Drones’

Yanditswe na Evariste Nsengimana
Kuya 14 Kamena 2019 saa 02:55
Yasuwe :
0 0

Minisiteri y’Ubuzima mu Rwanda yatangaje ko kwifashisha indege nto zitagira abapilote (drones) mu kugeza amaraso ku bitaro hirya no hino mu gihugu, bimaze gutanga umusaruro mwiza kuko zagejejeyo udupaki 27 114.

Uyu musaruro Drones zatanze wagarutsweho nka kimwe mu byo u Rwanda rumaze kugeraho mu rwego rwo gukusanya, gutanga no gucunga amaraso, ubwo hizihizwaga umunsi mpuzamahanga wo kuyatanga, uba buri wa 14 Kamena.

Mu Ukwakira 2016 nibwo Perezida Paul Kagame yatangije igikorwa cyo kwifashisha Drones mu kugeza amaraso ku bitaro byo hirya no hino mu gihugu, ziyakuye ku kibuga cyazo kiri mu Karere ka Muhanga.

Icyo gihe yavuze ko izo ndege zifatiye runini u Rwanda kuko zizoroshya ubutabazi ku barwayi bakeneye amaraso byihutirwa batuye mu misozi, aho byari bisanzwe bigorana kuyageza vuba.

Umuyobozi w’Ikigo cy’Igihugu cyo gutanga amaraso, Dr. Gatare Swaibu, yabwiye abitabiriye umunsi mpuzamahanga wo gutanga amaraso, ko kugeza uyu munsi u Rwanda rumaze kugira ibibuga bibirii drones zikuraho amaraso ziyajyana ku bitaro n’amavuriro 25.

Yavuze ko ‘Drones zimaze kugeza udupaki 27 114 kuri ibyo bitaro biri hirya no hino mu gihugu, zituma ingano y’amaraso yononekaraga ava kuri 6% agera kuri 0.3%’.

Dr. Gatare yavuze ko muri rusange mu Rwanda abatanga amaraso bavuye ku bihugu 25 mu 2014, uyu munsi bakaba barenga ibihumbi 47.

Icyo gihe batangaga udushashi tw’amaraso dusaga ibihumbi 42 ariko mu 2018 twari tumaze kugera kuri 65 512, intego ni uko tuzagera ku bihumbi 90 muri uyu mwaka, naho igipimo cyo kwihaza cyavuye kuri 73.6% mu 2014, ubu kirarenga 93.6%.

Umunyamabanga wa Leta muri Minisiteri y’Ubuzima, ushinzwe ubuvuzi bw’ibanze, Dr. Ndimubanzi Patrick, yavuze ko Guverinoma izakomeza gushyigikira no gutera inkunga ibikorwa byo gutanga amaraso kuko afasha indembe.

Ati “Turashimira cyane abantu batanga amaraso, burya kuyatanga ku bushake ni ikintu cyiza […] Icyo dushaka ni uko abantu basanzwe bayatanga babikomeza.”

Rwagasore Jean de Dieu, umaze gutanga amaraso inshuro zirenga 90, yavuze ko yatangiye kuyatanga yumva atazarenza inshuro 20 ariko yageze aho yumva agaciro kabyo, yiyemeza kubikomeza ndetse atangiza itsinda ry’abayatanga bihoraho.

Ati “Ngasaba abateraniye hano barimo cyane cyane abanyamadini n’amatorero gushishikariza abantu gutanga amaraso."

U Rwanda nicyo gihugu cya kabiri muri Afurika cyizihirijwemo umunsi mpuzamahanga wo gutanga amaraso, nyuma ya Afurika y’Epfo iheruka kwizihirizwamo mu myaka 15 ishize.

Umunsi mpuzamahanga wo gutanga amaraso wizihirizwa rimwe n’umunsi w’amavuko w’uwavumbuye amatsinda y’amaraso, Karl Landsteiner, ku wa 14 Kamena.

Ni umunsi wo gushishikariza abantu gutanga amaraso ku bushake no gushimira abayatanze kurusha abandi. Mu bashimiwe harimo Guverineri w’Intara y’Amajyaruguru, Gatabazi Jean Marie Vianney; Umuyobozi w’Itorero ry’Igihugu, Bamporiki Edouard, Umugaba Mukuru w’Ingabo, Gen. Nyamvumba Patrick n’abandi.

Iyi nama yabereye mu Rwanda nka kimwe mu bihugu bikataje muri iyi gahunda yo gutanga amaraso
Iyi nama yitabiriwe n'abantu barenga ijana baturutse hirya no hino ku Isi
Abanyarwanda bakomeje gushishikarizwa kugira umuco wo gutanga amaraso ashobora gufashishwa indembe
Umunyamabanga wa Leta muri Minisiteri y’Ubuzima, ushinzwe ubuvuzi bw’ibanze, Dr. Ndimubanzi Patrick, ubwo yatangaga amaraso

Amaforo: Andre Rugema/RBC


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza