Umuryango wo muri USA ugiye gufasha ibitaro byo mu Rwanda gutanga imiti ya kanseri

Yanditswe na IGIHE
Kuya 10 Ugushyingo 2017 saa 12:05
Yasuwe :
0 0

Ibitaro bya gisirikare i Kanombe, ibya Butaro, ibya Kaminuza bya Butare (CHUB) n’ibya Kaminuza I Kigali (CHUK), bigiye koroherezwa kubona imiti n’ibikoresho mu buvuzi bw’indwara ya kanseri bitume abarwayi bayihabwa ku giciro kiri hasi y’igisanzwe.

Uyu ni umwe mu musaruro w’amasezerano y’ubufatanye Minisiteri y’Ubuzima yasinyanye n’umuryango wo muri Leta zunze Ubumwe za Amerika, BioVentures for Global Health (BVGH), ukorana n’inzego za leta n’abikorera mu guteza imbere ubushakashatsi mu by’ubuzima, agamije gutuma Abanyarwanda bahabwa ubuvuzi bwa kanseri mu buryo buboroheye.

Aya masezerano yasinyiwe mu nama y’Umuryango Nyafurika wita k’ubushakashatsi n’amahugurwa ku ndwara ya Kanseri (AORTIC) irimo kubera i Kigali, akaba ari muri gahunda ya BVGH izwi nka African Access Initiative (AAI).

Ayo amsezerano ari mu bufatanye bw’ibigo, Guverinoma, abatanga serivisi z’ubuzima n’imiryango itegamiye kuri leta, bugamije kongera abagerwaho n’imiti ya kanseri; kongera ibikorwaremezo mu rwego rw’ubuzima no kubaka ubushobozi bw’abaganga muri Afurika.

Uretse kuba aya masezerano azafasha ibitaro bikomeye kubona imiti ihendutse, akubiyemo no kubaka ubushobozi bw’abaganga binyuze mu mahugurwa bazahabwa n’inzobere zo muri USA.

Nk’uko The New Times yabyanditse, Umuyobozi wa BVGH, Jennifer Dent, yavuze ko yishimiye kuzana gahunda ya AAI mu Rwanda nk’igihugu cya gatanu, kandi iri mu mu cyerekezo cya Leta .

Yagize ati “ Igamije gutanga imiti ihendutse ya kanseri n’ikoranabuhanga bigendanye n’intego ya Minisiteri y’Ubuzima.”

Yongeyeho ko BVGH ifitanye ubufatanye n’ibigo bikomeye mu gukora imiti byiyemeje ko ikoranabuhanga n’imiti bakora bigera muri Afurika kandi ku buryo buhendutse, bwiza kandi bwizewe.

Minisitiri w’ubuzima, Dr. Diane Gashumba, yavuze ko icy’ingenzi muri aya masezerano ari uko ibitaro bibasha kubona imiti ya kanseri ikenewe kandi n’umurwayi akayihabwa mu buryo buhendutse.

Aya masezerano akurikiye ayandi y’imikoranire ya Kaminuza ya Harvard, Ishami ry’Ubuvuzi yasinyanye n’u Rwanda yo gutanga ubufasha mu bijyanye no guhugura abaganga bavura kanseri barenga 20 mu myaka iri imbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza