IGIHE.com > Ubuzima
Bashyiriweho ivuriro bivuza hakoreshejwe telefone i Bumbogo

Bashyiriweho ivuriro bivuza hakoreshejwe telefone i Bumbogo


Yanditswe kuya 14-03-2012 - Saa 08:51'

Ni mu Murenge wa Bumbogo, Akagari ka Ngara mu Karere ka Gasabo, hafunguwe ku mugaragaro ivuriro ryashyikirijwe abaturage, aho bazajya bivuza hakoreshejwe telefone igendanwa.

Dr. Marete Njoka uhagarariye CFW Health Posts yavuze ko bahisemo kuzana ubu buryo bushya mu Rwanda bwo gukoresha gahunda yitwa Lifequeb, ifasha abarwayi kwivuza hakoreshejwe telefone ndetse no kurushaho kwegereza abaturage ubuvuzi mu Mirenge n’Utugari ahenshi usanga badafite Ikigo Nderabuzima.

Ubu buryo bufasha umurwayi kwivuza hakoreshejwe telefone, bwihutisha guhana amakuru, kwakira umurwayi, kumusuzuma, kumuvura ndetse n’abari ku cyicaro gikuru i Kigali bakabona uburyo umurwayi yakirwa i Bumbogo akaba aribo basohora na inyemezabuguzi (facture) umurwayi yivurijeho.

Dr. Marete avuga ko hakoreshejwe uburyo bwa Lifequeb umuturage abasha kwivuza, akoreshjeje Mutuelle de Sante usibye amafaranga y’u Rwanda 200 yakwa ya ticket de modérateur atangwa nyuma yo kwivuza yanahawe imiti.

Yakomeje avuga ko mubyo bafasha abarwayi harimo gusuzuma vuba kandi neza no kuvura indwara zimwe nazimwe zikunze kugaragara, gukumira malariya no kuyirwanya, kwegereza abantu imiti myiza kandi idahenze ndetse no kwita ku bagore batwite n’ababyeyi nyuma yo kubyara.

Yagize ati: “Twita ku buzima bw’abana, ikingira, ubuzima n’ubuvuzi mu mashuri.”

Dr. Marete avuga ko mu kerekezo cya leta y’u Rwanda 2020 bafite gahunda yo gufungura utuvuriro 500 mu gihugu hose, mu myaka 12 iri imbere no kunoza serivisi nziza zihabwa abaturage.

Bakoraga urugendo rwa kilometero 30 bajya kwivuza
Umunyamabanga Nshingabikorwa w’Umurenge wa Bumbogo, Ntaganzwa J.M.V, yavuze ko kwegerezwa ivuriro mu murenge wabo bibafashije cyane kuko abaturage bakoraga urugendo rungana na kilometero 30 bajya kwivuza mu Kigo Nderabuzima cya Kinyinya bavuye ku mpera z’umurenge wa Bumbogo ndetse hakaba n’abakoraga urugendo rurerure bajya kwivuriza mu bitaro bya Kibagabaga.

Mukankusi Clementine, ni umuturage twasanze aje kwivuza, yatangarije IGIHE ko kwegerezwa ivuriro babyakiriye neza. Ikindi ni uko baruhuwe urugendo rurerure bakoraga bajya kwivuza. Yagize ati: “Rimwe na rimwe wasangaga ababyeyi babyarira mu nzira ndetse bakaba baburaga ubuzima bwabo kubera kutagira ivuriro hafi yabo”.

Aka kavuriro kashyikirijwe abaturage bo mu murenge wa Bumbogo gafite abaganga batatu na Poste de Sante umunani zizaba ziri mu Karere ka Gasabo mu bihe bya vuba.

Naho utuvuliro twa CFW Health Posts ni urugaga rw’ahantu hemewe hacururizwa imiti mu baturage bikozwe n’abaforomokazi b’inzobere aribo ba nyir’ibikorwa bafatanyije na Minisiteri y’Ubuzima na Health Store Holding.

Bafite intego yo kwegereza abana n’imiryango yabo imiti y’ibanze n’ibindi bintu nkenerwa hashingiwe ku mabwiriza ari mu gihugu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO