Bwa mbere hemejwe urukingo rushobora kurinda Covid-19, umuntu atewe dose imwe gusa

Yanditswe na Muhonzire Sylvine
Kuya 25 Gashyantare 2021 saa 08:36
Yasuwe :
0 0

Ikigo cya Leta Zunze Ubumwe za Amerika gishinzwe Imiti n’Ibiribwa, FDA, cyasanze urukingo rwa Johnson & Johnson rwakorewe mu Bubiligi rushobora kurinda umuntu Covid-19 atewe dose imwe gusa, mu gihe izindi zari zisanzwe umuntu agomba guterwa dose ebyiri.

Urukingo rwa Johnson & Johnson rwakozwe na sosiyete yitwa Janseen ishamikiye ku kigo gikora imiti cyitwa Johnson & Johnson giherereye mu Bubiligi.

Mu nyandiko yanditswe n’Ikigo gishinzwe Imiti n’Ibiribwa muri Amerika, yasohowe na Janseen yemeje ko urukingo rwa Johnson & Johnson rufite ubushobozi bwo hejuru mu kurinda umuntu Covid-19, rukagabanya abayandura ndetse n’abazahajwe nayo.

Ibyavuye mu igerageza ryayo byerekanye ko rushobora kurinda abazahajwe n’indwara ku kigero kirenga 85%, gusa ariko muri rusange, ni ukuvuga mu kurinda Covid-19 isanzwe n’iyihinduranyije rufite ubushobozi bungana na 66%.

Mu bakoreweho igerageza, byagaragaye ko mu minsi 28 bamaze guterwa urukingo, nta n’umwe wapfuye, ndetse nta n’uwigeze aremba ngo ajyanwe kwa muganga.

Ku wa Gatanu nibwo hateganyijwe ko inzobere ziturutse mu Bubiligi zizahura n’abagize ikigo cya FDA kugira ngo hemezwe ko uru rukingo rwatangira gutangwa rukiyongera ku rwa Pfizer na Moderna.

White House yavuze ko Amerika iteganya gutanga inkingo za Johnson & Johnson zingana na miliyoni eshatu mu cyumweru gitaha, mu gihe sosiyete yarukoze yahawe komande n’iki gihugu yo kugikorera dose zingana na miliyoni 100.

Ibindi bihugu byasabye izi nkingo harimo u Bwongereza bwasabye dose miliyoni 30, Umuryango w’Ubumwe bw’u Burayi (EU) wasabye dose miliyoni 200, Canada yasabye dose miliyoni 38, ibihugu biri mu gahunda ya Covax bisaba dose miliyoni 500.

Urukingo rwa Johnson & Johnson biteganyijwe ko ruzarokora ubuzima bwa benshi kubera ko abantu bazajya baterwa dose imwe gusa, ndetse rukaba rubikwa muri firigo zisanzwe.

Kugeza ubu, muri Amerika bantu miliyoni 65 bamaze guterwa inkingo, buri munsi hatangwa dose zingana na miliyoni 1,3, ndetse kuva zatangira gutangwa byagabanyije umubare w’impfu za Covid-19, ndetse n’umubare w’abaremba.

Urukingo rwa Johnson & Johnson rushobora guhabwa umuntu inshuro imwe gusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .