Ikinini cyo kuboneza urubyaro ku bagabo kirenda kuboneka

Mu gihe byari bimenyerewe ko ibinini byo kuringaniza urubyaro bihabwa abagore, ubu ubushakashatsi butanga ikizere ko mu minsi iri imbere ibinini byo kuringaniza imbyaro by’abagabo bizaba byabonetse.

Amakuru dukesha echno.ca.msn.com agaragaza ibyavuye muri ubu bushakashatsi aho Dr James Bradner hamwe na bagenzi be bo muri Kaminuza ya Harvard, bavumbuye uburyo buzafasha abagabo mu kuringaniza imbyaro hifashishijwe ibinini bizabuza intangangabo kugira ubukana bwatuma zivamo umwana mu gihe umugabo azaba yabinyoye.

Ubu buryo ngo ntacyo buzahungabanyaho imikorere n’ukwiyongera kw’imisemburo y’abagabo mu buzima bw’inyororokere.

Urubuga echno.ca.msn.com ruvuga ko mu myaka myinshi yashize habayeho ubushakashatsi ku kinini gifasha abagabo kuringaniza imbyaro, ariko bugahura n’ibibazo birimo ugusanga udusabo tw’intangangabo dushobora guhura nibibazo mu mikorere yatwo, ndetse bikanabangamira intanga ngabo.

Ubu bushaakashatsi burimo gukorerwa igeragezwa ku mbeba hakoreshejwe molécule JQ1 aho zaterwagwa mg 50 na 100 bwatanze ikizere ku mbeba z’ingabo bakoreyeho ubushakashatsi, kuko nyuma y’igihe cy’uburumbuke bwazo ubuzima bwazo bwakomeje gukora nk’ibisanze. Ibi ngo biha ikizere ubu bushakashatsi no ku bantu.

Ubushakashatsi bwakozwe mu mezi atatu n’atandatu hakurikiranywa imisemburo igize izi mbeba n’imikorere yayo, basanga ntakibazo cyavutse mo.

Uru rubuga rutangaza ko Molécule ya JQ1 yifashishijwe mu gukora ubushakashatsi mu bihe bizaza izafasha no mu nkingo zirwanya indwara ya kanseri.