IGIHE.com > Ubuzima
Imyanya ndangagitsina igomba kuvugwa uko iri – Minisitiri w’Urubyiruko

Imyanya ndangagitsina igomba kuvugwa uko iri – Minisitiri w’Urubyiruko


Yanditswe kuya 1er-02-2012 - Saa 15:14'

Minisitiri w’urubyiruko Jean Philbert Nsengimana atangaza ko nta muntu warukwiye guterwa isoni no kuvuga imyanya ndangagitsina mu mazina yayo.

Ibi yabitangaje ubwo umuryango Imbuto Foundation washyiraga ku mugaragaro igitabo cy’imfashanyigisho yo guhugura urubyiruko rufite hagati y’imyaka 15 na 24 mu kwirinda icyorezo cya SIDA.

Minisitiri Nsengimana yasabye urubyiruko gutinyuka bakavuga ibyo ababyeyi babo batinyaga kuvuga ku bijyanye n’amazina y’ibitsina bakabikoresha mu gihe bigisha urubyiruko bagenzi babo mu kwirinda icyorezo cya SIDA, aho gukoresha amarenga cyangwa kubitsinda ntibabivuge mu mazina.

Yavuze ko ibi bizafasha urubyiruko kumenya imiterere yabo kuko biri mu masomo yigishwa ndetse ko iyo babyiga mu ishuri buri gitsina bakivuga mu izina ryacyo. Aha yavuze ko nawe agiye kubishyira mu bikorwa mu biganiro agirana n’abana be, aho gukoresha ijambo ’agapipi’ akoreshe uko byitwa mu mazina yabyo.

Yagize ati : "Ababyeyi tugomba kureka kubeshya abana tubabwira ko umwana aturuka mu mukondo, n’ibindi byinshi tubabeshya mu mazina yabyo."

Iyamuremye Régine ni umunyamuryango wa Imbuto Foundation ; avuga ko iki gitabo cyanditse mu Kinyarwanda cyashyizwe ahagaragara kizafasha urubyiruko ruhugura urundi, abarezi ndetse n’ababyeyi. Ikindi ni uko kizashyirwa mu bigo by’amashuri ndetse n’ibyita ku buzima bw’urubyiruko n’amavuriro, ndetse bagiye kwiga uburyo bagishyira mu nyandiko z’ababana n’ubumuga bwo kutabona bakunze kwita braille.

Ufitinema Adelphine waje ahagarariye urubyiruko yavuze ko bagiye gukangurira urubyiruko bagenzi babo kwirinda icyorezo cya SIDA kandi ko bazifashisha iki gitabo gikubiyemo imfashanyigisho zizabasha gukoresha amwe mu mashusho n’amazina y’ibitsina adakunze gukoreshwa na sosiyete nyarwanda.

Yagize ati : "Ntidukwiye gutinya kubivuga. Ko umuntu avuga akaguru cyangwa akaboko, kuki tutavuga ibitsina byacu mu mazina yabyo ?"

Akomeza avuga ko abantu benshi babivuga mu ndimi z’amahanga nk’Igifaransa n’Icyongereza ntibibatere isoni, ariko byagera ku rurimi rw’iwabo bakabitinya. Avuga ko ibi bitagakwiye kuko no mu bitabo byandikwa bavuga amazina yabyo.

Amwe muri ayo magambo adakunze gukoreshwa n’Abanyarwanda, muri iki gitabo cy’imfashanyigisho yashyizwe ahagaragara akaba ari kuri paji ya 12,13,14 na 15 agaragaza ibice by’umubiri n’amazina yabyo nka : amabya, imboro, igituba, insya, n’ibindi.

Iki gitabo cy’imfashanyigisho gikubiyemo ibice 3 by’ingenzi : Uwo uriwe n’agaciro kawe, ibishobora kwangiza ubuzima n’agaciro kawe n’uburyo byirindwa, n’uruhare rwawe nk’umukangurambaga w’urungano mu kwirinda virusi itera SIDA.

Iki gitabo gifite paji 90 cyanditswe ku bufatanye na Imbuto Foundation, ADRA, Fawe Rwanda, Caritas Rwanda, Minisiteri y’Ubuzima, RBC, Health Poverty Action ndetse na ARBEF.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO