Abagore batwite bibasirwa cyane n’umuvuduko w’amaraso ukabije

Yanditswe na Mugabo Jean d’Amour
Kuya 12 Ukuboza 2017 saa 07:40
Yasuwe :
0 0

Mu ntege nke ziterwa no gusama, abagore batwite baba bafite ibyago byinshi byo kugira indwara y’umuvuduko w’amaraso ukabije (hypertension), ikaba iri mu ziza ku isonga mu gutera impfu z’abagore batwite.

Kugira ngo birinde ingaruka zikomeye ziterwa n’iyi ndwara, abagore batwite bagomba kugana kenshi ibigo nderabuzima bagakurikirana gahunda zo kwisuzumisha, bagapimwa umuvuduko w’amaraso ndetse bagahora bagenzura impinduka zose z’umubiri wa bo maze iteka bakihutira kugana umuganga nk’uko Dr Andrew Oryono, umuhanga mu kuvura abagore yabitangarije IGIHE.

Dr Oryono ni umuganga mu ivuriro Heritage Medical Park rihereye mu Kagarama mu Karere ka Kicukiro, mu Mujyi wa Kigali.

Yasobanuye ko indwara y’umuvuduko w’amaraso ukabije ihitana benshi mu bagore batwite kandi bigoye kubona ibimenyetso byayo ari yo mpamvu hari abayihimba ‘icyishi cya bucece.’

Iyi itera impinduka zidasanzwe ku bagore batwite ikaba mu ndwara eshanu zihariye 75% mu gutera impfu z’abagore nk’uko raporo yo mu 2016 y’Umuryango Mpuzamahanga wita ku Buzima (OMS) ibigaragaza.

Izi ndwara ni ukuva amaraso gukabije nyuma yo kubyara, gufatwa n’ubwandu butandukanye akenshi nyuma yo kubyara, umuvuduko w’amaraso ukabije mu gihe cyo gutwita (pre-eclampsia and eclampsia), ibibazo bibaho mu gihe cyo kubyara no gukuramo inda mu buryo bubi.

Umuvuduko w’amaraso upimwa hafatwa uko amaraso atembera mu mitsi igihe umutima utera (Systolic pressure) n’igihe umutima uruhutse hagati yo gutera kurangiye n’ugukurikiraho (Diastolic pressure) noneho ibipimo bikagaragazwa muri milimetero za mercure (mmHg).

Umuvuduko w’amaraso uba uri muto iyo uri munsi ya 90/60mmHg, ukaba uringaniye iyo uri hagati ya 90/60mmHg na120/80mmHg naho ukabije ugahera kuri 140/90mmHg kuzamura.

Ibitera umuvuduko ukabije

Dr Oryono avuga ko umugore wese utwite aba afite ibyago byo gufatwa n’umuvuduko w’amaraso ukabije ariko hari impamvu zituma ibyo byago biba biri hejuru kuri bamwe kurusha abandi.

Izo mpamvu zirimo kuba bari munsi y’imyaka 20 cyangwa hejuru ya 40 y’amavuko, kuba ari inda ya mbere basamye, kuba barigeze kugira iyi ndwara mu gutwita kundi bagize, kuba basanganywe iyi ndwara mu muryango, kugira indwara y’impyiko, kuba bakomoka muri Afurika cyangwa ari ba kavukire bo muri Amerika no kuba batewe n’umugabo utari uwo babyaranye mbere.

Ibimenyetso

Umugore utwite ufite umuvuduko w’amaraso ukabije ungana cyangwa urengeje 160/110mmhg ashobora gukomereka ibice by’imbere mu mubiri, kurwara umutwe udakira, kubona ibikezikezi, guhuma ijisho rimwe cyangwa yombi mu gihe runaka, kubabara mu kiziba cy’inda, kugira isesemi no kuruka kandi inda irengeje ibyumweru 20, kugabanyuka kw’inkari, kubyibuha byihuse cyane, kudahumeka neza, kubyimba mu maso cyangwa intoki, kwibagirwa ubusa no kwitiranya ibintu, kugira agahinda gakabije no kugwa muri coma rimwe na rimwe.

Nyamara Dr Oryono avuga ko iteka ibi bimenyetso bidaturuka ku muvuduko w’amaraso ukabije bityo abagore batwite bagomba guhora bisuzumisha kugira ngo hamenyekane icyateye ibyo bimenyetso.

Nubwo igituma mu by’ukuri habaho kuzamuka k’umuvuduko w’amaraso kitazwi, Dr Oryono avuga ko gusohoka kwa nyababyeyi biwusubiza inyuma ndetse iyo bibaye ngombwa inda ikurwamo kugira ngo barokore ubuzima bw’umugore, bityo ibi bikagaragaza ko nyababyeyi ifite uruhare runini mu kugenzura umuvuduko w’amaraso.

Ingaruka z’umuvuduko w’amaraso

Uretse kuba umugore utwite ashobora kwicwa n’umuvuduko w’amaraso ukabije, iyi ndwara ifite ingaruka mbi cyane ku mugore n’umwana atwite.

Umugore agira isereri, nyababyeyi ishobora gutandukana n’umura bigatera kuvira imbere, guturika udutsi tw’ubwonko n’indwara y’umutima bitewe no gucika k’utwo dutsi ku buryo bishobora guhita bitera urupfu. Iyi ndwara kandi ishobora gutera ibibazo byo guhumeka kuko hajya amazi mu bihaha, kuva amaraso ahantu hatandukanye, guhagarara gukora kw’impyiko, ubuhumyi no kwangirika k’umwijima.

Umwana uri mu nda ashobora kudakura neza, kuvuka atagejeje igihe, kubura umwuka, gupfira mu nda n’ibindi.

OMS igaragaza ko umuvuduko w’amaraso ukabije ari indwara yibasira abantu b’ibyiciro byose nubwo benshi usanga batazi ko bayifite. Imibare igaragaza ko iza ku isonga mu guhitana abantu benshi ku isi igakurikirwa no kunywa itabi. Iyi ndwara ni inkomoko yo guturika k’udutsi tw’ubwonko ku kigero cya 51% na 45% y’indwara z’umutima.

OMS igaragaza ko ibibazo bituruka ku gutwita bihitana abagore 33 buri saha cyangwa 830 ku munsi ku isi kandi umuvuduko w’amaraso ukaba ku isonga mu bibahitana.

Impfu z’abagore batwite zari 216 mu mbyaro100,000 mu 2016 ku isi, intego ikaba ari ukubagabanya bakagera munsi ya 70 ku 100,000 mu 2030 hakurikijwe Intego z’Iterambere Rirambye (SDGs).

Mu Rwanda, imibare ya OMS yo mu 2015 igaragaza ko hapfa abagore batwite 290 mu mbyaro 100,000.

Dr Andrew Oryono, umuganga w'indwara z'abagore mu ivuriro Heritage Medical Park riherereye mu Kagarama, Akarere ka Kicukiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza