Abanyarwanda 12,9% banywa itabi bahangayikishije inzego z’ubuzima

Yanditswe na Mukaneza M.Ange
Kuya 31 Gicurasi 2017 saa 09:40
Yasuwe :
0 0

Imibare igaragaraza ko hirya no hino ku Isi abahitanwa n’ingaruka ziturutse ku itabi bagera kuri miliyoni zirindwi buri mwaka akaba ari ikintu giteye inkeke cyane.

Tariki ya 31 Gicurasi, Isi yose yizihiza Umunsi Mpuzamahanga wo kurwanya itabi, Minisiteri y’Ubuzima ikaba yatanze ubutumwa binyuze mu Kigo cy’Igihugu cy’Ubuzima, RBC.

Avuga ku bijyanye n’uyu munsi, Umuyobozi w’Ishami ryo kurwanya indwara zitandura mu Kigo cy’Igihugu cy’Ubuzima, Dr Muhimpundu Marie Aimee, yatangaje ko bakomeje ubukangurambaga mu baturage no mu bafite za restaurant na Bar kugira ngo bakumire ibijyanye no kunywera itabi mu ruhame dore ko bigira ingaruka no kubatarinywa.

Yahereye ku mibare y’abanywa itabi mu Rwanda no muri Afurika agaragaza ko ari ikibazo gikomeye.

Ati “ Mu bushakashaatsi bwakozwe muri 2013, bwagaragaje ko abanyarwanda bangana 12,9% banywa itabi ryaba isigara, ubugoro , iryo bahekenya n’ubundi bwoko bwose butandukanye.”

Muri Afurika ho ingo imibare igaragaza ko 24% barinywa. Yakomeje agaragaza impamvu zo kwizihiza uyu munsi, ndetse n’igisobanuro cyawo ati “ Ni umunsi wo kugaragariza abanyarwanda ububi bw’itabi ngo abatarinywa baryirinde n’abo ryagize imbata tukabereka ko bashobora kuryirinda."

"Ibintu bikoze itabi byangiza ubuzima bw’umuntu, bigira ingaruka ku duce twinshi , tumenyereye kumva ko wenda imyanya y’ubuhumekero ariyo ryangiza gusa ariko kuva ku musatsi kugera ku mano umuntu yibonaho ingaruka zaryo .

Hari nko kuba umuntu yaba ikiremba cyangwa se ingumba, akarwara kanseri z’ubwoko butandukanye ,indwara z’umutima diyabete n’izindi.”

Yavuze ko ku isi imibare yabahitanwa n’itabi igera kuri miliyoni zirindwi harimo ababa bahitanwa na za ndwara riba ryarabateye bikiyongera ku bibazo bari basanganywe.

Ni iki kirimo gukorwa?

Dr Muhimpundu Marie Aimee ari “Turimo gukangurira abantu tukabigisha ububi bw’itabi n’ingaruka zaryo, turimo kandi by’umwihariko gukorana n’abafite za restaurant na Bar kugira ngo bubahirize itegeko rivuga kubyerekeye kunywera itabi mu ruhame.”

Avuga ko ibyo gukumira kunywera itabi mu ruhame nibyubahirizwa hari abazagenda baricikaho buhoro buhoro kandi biri no mu kurengera ibidukikije.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza