Amasomo waha umwana wawe akananuka

Yanditswe na Bizimana Jonathan
Kuya 28 Kamena 2017 saa 09:07
Yasuwe :
0 1

Umubyeyi yizihirwa no kubona umwana agira ubushake iyo ageze ku ifunguro ndetse ibyo akora byose akagaragaza umurava no gushabuka ariko na none bikaba nk’ikigeragezo iyo atangiye kubyibuha birengeje urugero, kuko hari n’ababifata nk’uburwayi bityo bikwiye kwirindwa hakiri kare.

Mu bushakashatsi buherutse gushyirwa ahagaragara bwagaragaje ko kumarana igihe kinini n’umwana wawe umwigisha gukora mu busitani byamufasha guhorana ubuzima buzira umuze.

Ubu bushakashatsi bunavuga ko abana bafite umubyibuho ukabije bakora mu busitani bashobora gutakaza ibiro mu gihe cy’umwaka umwe. Abana bafite umubyibuho ukabije batozwa gukora imirimo y’amaboko mu busitani baba bafite amahirwe yo kugira ubuzima bwiza no gutakaza ibiro nibura mu gihe kitarenze umwaka umwe.

Umwanditsi Mukuru w’ubushakashatsi wo muri Kaminuza ya California, Dr Rachel Scherr, yagaragaje ko BMI (Body Mass Index), aho bapima ingano yo mu burebure harebwa niba ihura n’imyaka umuntu afite ndetse n’ibiro bye, yiyongereye mu bantu bakorera muri ayo matsinda; ibi byatumye abafite umubyibuho ukabije bava bava kuri 55.6% bagera kuri 37.8%.

Abashakashatsi bo bakusanyije amakuru mu bigo bine by’amashuri byo muri California, ku ngaruka amasomo yerekeranye no gukora mu busitani agira ku bana bafite imyaka 10.

Iryo tsinda ryaganiriye n’abana 230 bahawe amasomo yo gukora mu busitani n’abandi 179 batahawe ayo masomo mu gihe cy’umwaka umwe.

Daily Mail dukesha iyi nkuru ivuga ko ibisubizo byavuye muri ubwo bushakashatsi bwatangarijwe mu kinyamakuru cyitwa ‘ Journal of Nutrition Education and Behavior’, bwerekanye ko ibigo by’amashuri byigisha gukora mu busitani byongereye ubuzima bwiza bw’abanyeshuri ku buryo butangaje.

Abanyeshuri bari bafite umubyibuho ukabije batakaje ibiro kuko bigishwaga amafunguro bafata yatuma bagira ubuzima bwiza harimo nk’imboga. Gukoresha ingufu zabo muri ubwo buhinzi bwo mu busitani na byo byabafashije gutakaza ibiro.

Gutakaza ibiro kuri aba bana mu gihe gito byatewe n’uko bigishijwe ibyerekeranye n’amafunguro bafata bari ku ishuri cyangwa se mu rugo iwabo bakagira ubuzima bwiza.

Abahanga mu by’imirire bagaragaza ko kurya imbuto n’imboga rwatsi byongerera ubwonko imbaraga mu mikorere yabwo.

Ubushakashatsi bwakorewe muri Australia bwagaragaje ko abana barya imboga ku ifunguro ryabo rya nimugoroba baba bafite amahirwe menshi yo gutsinda amasomo yabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza