Hari ababyeyi bagifite imyumvire yo kuvura ubushye bw’abana babanje kwikora mu gitsina

Yanditswe na Thamimu Hakizimana
Kuya 13 Mutarama 2017 saa 09:24
Yasuwe :
0 0

Mu myaka yo hambere, Abanyarwanda benshi bakoreshaga uburyo bwa gakondo bwo kwivura indwara zitandukanye zirimo n’ubushye, icyo gihe ntibyari byoroshye ko umuntu akuvira imuzi akakubwira akamuri ku mutima ku bijyanye n’amayeri yakoreshwaga.

Mu buzima bw’umuntu hari abafata icyemezo rimwe na rimwe bitewe n’imihango n’imigenzo y’agace batuyemo cyangwa se ubuzima bakuriyemo.

Mu bice bitandukanye by’u Rwanda no mu Mujyi wa Kigali, hari ahakigaragara abaturage cyane biganjemo abagore, bagifite imyumvire igira iti “Umwana iyo ahiye ako kanya nyina agahita yikora mu gitsina agakora aho yahiye ntacyo aba.”

N’ubwo iterambere rirushaho gusakara mu nzego zose udasize n’ubuvuzi bwa kizungu, hari ahakigaragara umubare w’abanyarwanda bagifite iyi myumvire kandi bashobora no kubitangira ubuhamya n’ubwo abaganga batabyemera.

Hari abagore baganiriye na IGIHE bashimangiye ko bakoresha ubu buryo, ndetse ko hari abo bumvana imyumvire yo kuvura ubushye abana babo bikoze mu myanya y’ibanga mu rwego rwo gupfubya ubushye aho kwihutira kubajyana kwa muganga.

Umubyeyi w’imyaka 40 ufite abana batanu utuye mu Murenge wa Nyakabanda mu Karere ka Nyarugenge yemeza ko nawe azi neza ko kwikora mu gitsina bipfubya ubushye bw’umwana.

Yagize ati “Iyo umwana ahiye ugahita uhakora ukamukora aho yahiye, uhita wibaza aho bigiye ukayoberwa, si ukubeshya nanjye nta mwana wanjye n’umwe ujya ushya ngo mujyane kwa muganga cyeretse iyo bibaye ntahari.”

Undi bakunda kwita Mama Bébé ufite bana bane nawe yagize ati “ Ibyo nanjye si ubwa mbere rwose mbyumvise abagore benshi bakunda kubivuga ko bipfubya ubushye bw’umwana n’ubwo njye ntabyemera.”

Icyo abaganga babivugaho

IGIHE yaganiriye n’umuganga wo mu Kigo Nderabuzima cyo mu Biryogo kwa Nyiranuma nka rimwe mu Ivuriro rizwiho kugira ubunararibonye mu kuvura ubushye, nabo bemeza ko bahura n’ababyeyi bagifite iyo myumvire.

Umuganga witwa Mukandinda Marie Rose yagize ati “ Nibyo dukunze guhura n’ababyeyi bagifite iyo myumvire n’ubwo tutababona babikora uretse ko tujya tubumva bari kubibwirana hagati yabo ubwabo ko bivura.”

Yakomeje agira ati “Uretse abikora mu gitsina hari n’abaza aha babanje kubashyiraho ubwoya bw’inkwavu n’ibibabi by’ibijumba byokeje, amavuta y’ubuto n’isukari.”

Mukandinda atangaza ko nta muturage wari ukwiye kuvura umwana we muri ubwo buryo kuko ashobora kumutera n’izindi ndwara zitandukanye.

Yagize ati “ Urumva ko nk’abo bikora mu gitsina bagasiga abana babo aho baba bahiye havuye uruhu bashobora no kubatera izindi ndwara zandura."

Yasabye abaturage bose kujya bihutira kuzana abana babo kwa muganga igihe baramutse bahiye kugira ngo babavure aho gukoresha ubwo buryo budafite icyo bumaze cyane ko bushobora no kubatera izindi ndwara.

Mukandinda Marie Rose ukora mu Kigo Nderabuzima cyo kwa Nyiranuma mu Biryogo atangaza ko hari ababyeyi bakira bagifite imyumvire yo kuvura abana babo babanje kwikora mu gitsina
Ikigo Nderabuzima cyo kwa Nyiranuma cyakira umubare munini w'ababyeyi bajya kuvuza abana babo ubushye
Iki Kigo kimaze kuba ubukombe mu kuvura indwara z'ubushye muri Kigali

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza