Haje gahunda nshya yo gupima igituntu abanduye SIDA mu kuramira amagara yabo

Yanditswe na Nyishimire Euphrasie
Kuya 23 Kamena 2017 saa 10:19
Yasuwe :
1 0

Urugaga Nyarwanda rw’ababana na virusi itera SIDA (RRP+) ku bufatanye n’Ikigo cy’Igihugu gishinzwe Ubuzima (RBC) byatangije ubukangurambaga bugamije guhangana n’indwara y’igituntu, iri mu byuririzi bikomeye bya SIDA.

Kuwa Gatatu tariki ya 21 Kamena 2017, nibwo abayobozi batandukanye bahuriye mu nama nyunguranabitekerezo igamije gushyiraho gahunda y’ubukangurambaga mu kwipimisha igituntu yabereye mu Mujyi wa Kigali.

Iyi gahunda biteganyijwe ko izanagera mu gihugu hose igamije gushishikariza ababana na virusi itera SIDA kwipimisha igituntu, kugira ngo bamenye aho bahagaze n’abakirwaye batangire gufata imiti hakiri kare.

Umuyobozi uhagarariye Urugaga nyarwanda rw’ababana na virusi itera SIDA (RRP+), Sylvie Muneza, yavuze ko iyi gahunda ije icyenewe kuko mbere abantu bajyaga kwipimisha bagasanga barazahajwe n’indwara, bikanabaviramo urupfu.

Yagize ati “Ushobora kugenda utazi ko ufite igituntu ariko bakigusangamo bagahita bakuvura utararemba.”

Yakomeje avuga ko hari uburyo bushya kandi bwizewe bwo gupima igituntu umuntu anyuze mu cyuma, ibyo bita ‘screening’ buzorohereza abashaka kwipimisha.

Umuyobozi w’Ishami ry’Ubuzima rusange n’Ibidukikije mu Mujyi wa Kigali, Mukangarambe Patricie, yavuze ko ahantu hahurira abantu benshi ariho igituntu cyandurira, bityo hakenewe ingamba zikomeye mu kwirinda ikwirakwira ry’ubwandu.

Ati “Abakozi batanga serivisi bagomba kuba bafite ibyemezo byo kwa muganga, bigaragaza ko badashobora kwanduza abaza babagana.”

Umujyi wa Kigali ufite gahunda yo gukangurira abaturage kwipimisha igituntu kugira ngo abo bagisanganye batangire kuvurwa.

Iyi gahunda yatangirijwe mu Mujyi wa Kigali bitewe ahanini ni uko indwara y’igituntu iri ku kigero cyo hejuru. Impamvu zibiteta zirimo imiturire igaragaramo ubucucike no kuba ubwandu bw’agakoko ka SIDA buri ku kigero cyo hejuru kuko habarurwa abagera kuri 7.3% bayirwaye.

Imibare itangwa na RBC igaragaza ko mu barwayi b’igituntu 5,763 bagaragaye mu 2015/16 mu gihugu hose, abagera ku 1935 batuye mu Mujyi wa Kigali. Mu barwaye iyo ndwara kandi abagera ku 1,429 babana n’ubwandu bw’agakoko gatera SIDA.

Umuyobozi uhagarariye urugaga nyarwanda rw’ababana na virusi itera SIDA (RRP+), Sylvie Muneza, yatangaje ko iyi gahunda izagabanya umubare w'abipimishaga barazahajwe n’igituntu
Umuyobozi w’Ishami ry’Ubuzima rusange n’Ibidukikije mu Mujyi wa Kigali, Mukangarambe Patricie, yavuze ko hafashwe ingamba zikomeye mu kwirinda ikwirakwira ry’ubwandu bw'igituntu
Inama nyunguranabitekerezo igamije gushyiraho gahunda y’ubukangurambaga mu kwipimisha igituntu yitabiriwe n'abayobozi mu nzego zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza