Kwamamaza

Ibikomere byo gutandukana kw’ababyeyi byibasira cyane abana b’abahungu

Yanditswe kuya 18-10-2016 saa 08:04' na Dr Sebaganwa Alphonse


Gutandukana kw’abashakanye baba bafite imitungo myinshi cyangwa mike, barize cyangwa batarize, “ni igitero” gikomeye kigira ingaruka ku bana b’ibitsina byombi, baba bakiri bato cyangwa batangiye gukura ariko bitinda gukira ku bana b’abahungu.

Dr Sebaganwa Alphonse,Umwarimu n’Umushakashatsi muri Kaminuza y’u Rwanda,Koleji y’Uburezi akaba n’impuguke mu myifatire, imitekerereze, n’imikorere ya muntu biganisha ku burezi, by’umwihariko impuguke mu gufasha abana bari munsi y’imyaka 12 bafite ibibazo byihariye by’imyigire, yatanze igitekerezo cye ku ngaruka z’ubutane bw’ababyeyi ku myigire y’abana.

Dr Sebaganwa agira ati "Muri iki gihe, ikibazo cy’ubutane bw’abashakanye gisigaye kimeze nkaho ari ibintu bisanzwe kandi byakabaye igitangaza. Mperutse kujya ku rukiko rw’ibanze, nsanga hamanitse imanza zizasomwa muri uku kwezi. Nitegereje neza nsanga 80% byazo n’iz’ubutane bituma ntangira kwibaza kuri icyo cyorezo."

Yakomeje agira ati"Ikibabaje cyane ni uko uko gutana kw’abashakanye bigira ingaruka mbi ku mitekerereze, imyifatire n’imyigire y’abana babo, kandi nta ruhare na mba baba babigizemo."

Zimwe mu ngaruka ubutane bw’ababyeyi bugira ku mwana

- Ingaruka zigendanye n’igitsina

Abahanga berekana ko abashakanye bakimara gutana, abana b’abahungu n’abakobwa bari munsi y’imyaka 12 basubira inyuma mu ishuri ku buryo bumwe ugereranyije na mbere y’ubwo butane.

Ariko nyuma y’imyaka itanu, byagaragaye ko abahungu bakomeza kugira ibibazo byo gutsindwa ugereranyije n’abakobwa.

Bivuze ko abakobwa bashobora kumenyera vuba ubwo buzima kurusha abahungu bazongwa cyane nabwo.

Ku bana b’abangavu, bagaragaza ibimenyetso by’ihungabana n’imyifatire idahwitse nko gusiba kenshi ku ishuri kurusha ingimbi nyuma y’uko ababyeyi babo batandukanye.

Ikindi ubushakashatsi bugaragaza ni uko nyuma yo gutana kw’ababyeyi, iyo abana babanye n’umubyeyi badahuje igitsina bibagiraho ingaruka mbi mu myifatire.

Urugero ni nk’umwana w’umukobwa ubana na se, cyangwa umuhungu ubana na nyina gusa.

Ibi ariko ntibigomba gufatwa nk’ihame kuko bishobora no guturuka ku mibanire y’umwana n’umubyeyi cyangwa niba umubyeyi yarongeye gushaka cyangwa yakomeje kuba wenyine, cyangwa uburyo ababyeyi bombi batandukanye babanye, niba basurana cyangwa bavugana.

- Ingaruka zigendanye n’imyaka y’umwana

Ubushakashatsi bugaragaza ko gutana kw’ababyeyi kutagira ingaruka zikomeye ku bana bari munsi y’imyaka itanu, ugereranyije n’abari hejuru y’imyaka umunani.

Ku myaka umanani, umwana aba atangiye kurema uwo azaba we ejo, afatira urugero ku babyeyi be, bityo iyo batandukanye abura ifatiro ryo kwirema kwe bigatuma arangwa no kutigirira icyizere, kutakigirira abandi, bitewe n’uko abo yafataga nk’urugero bamutengushye.

Ashobora kurangwa kandi n’uburakari buhoraho cyangwa kwigunga, kubura ibitotsi, kurya cyane cyangwa kutagira ubushake bwo kurya (appétit) n’ibindi.

Mu ishuri, aba bana bashobora kugaragaza ibimenyetso by’uburwayi ariko mu by’ukuri batarwaye, kutubahiriza amategeko y’ishuri nko gukererwa no gusiba, gushotora bagenzi babo, gukoresha imbaraga zirengeje mu gukina ku buryo byavamo impanuka kuri bagenzi be cyangwa kuri we

- Ingaruka ku burere

Ubushobozi umubyeyi afite mu burere bw’umwana bugira uruhare rutaziguye mu gutuma ingaruka z’ubutane zihungabanya umwana cyane cyangwa buhoro.

Urugero ni nk’umwanya amarana n’umwana buri munsi, ibiganiro agirana nawe, uburyo avuga nabi cyangwa neza uwo batandukanye imbere y’umwana, igihe umwana amarana n’umubyeyi utamurera (niba umwana arerwa na nyina, abonana na se ryari?).

Uburyo umwe mu babyeyi urera abana nyuma y’ubutane yakiriye uko gutandukana, nabyo bishobora kugira ingaruka ku myifatire y’umwana.

Iyo umwe mu babyeyi batanye yongeye gushaka kandi ari nawe urera abana, ikibazo kuri abo bana gishobora kwiyongera kuko umwanya yahariraga abana uragabanuka cyane kuko aba agomba no kwita ku mugabo cyangwa umugore mushya.

- Ingaruka ku bana ni zimwe ku muryango ukennye cyangwa ukize

Nubwo umwana wo miryango ikennye arushaho kubura iby’ibanze byo ku mutunga kuko n’uduke twari duhari tugabanuka cyane, n’uwo mu miryango ikize cyangwa yifashije ukomeza kubona hafi nk’ibyo yabonaga mbere yo gutandukana kw’ababyeyi, ngo bombi bagira ikibazo cyo gusubira inyuma mu myifatire mu ishuri ku buryo bumwe.

- Umwana abona ko ababyeyi be batamukunda

Ntabwo ushobora kubwira umwana ngo “turacyagukunda n’ubwo twatandukanye”, kuko uba umubeshye, bitewe n’uko ubundi urukundo rw’umubyeyi ku mwana rushingira ku mubano abashakanye baba bafitanye.

Ntibyoroshye ko urukundo ruturuka ku mubyeyi umwe ngo rwerekeze ku mwana rutanyuze ku wo bamubyaranye.

Icyakora ku batandukanijwe n’urupfu n’ibindi bidahuye n’ubutane buturutse ku makimbirane mu miryango byo birashoboka,umwana abona ko ukimukunda.

Icyakora, amakimbirane akomeye kandi ahoraho mu miryango agira ingaruka zikomeye ku bana kuruta izo abana b’ababyeyi batanye barerwa n’umwe muri bo bahura nazo.

[email protected]

Dr Sebaganwa Alphonse,Umwarimu n’Umushakashatsi muri Kaminuza y’u Rwanda,Koleji y’Uburezi


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved