Ibitera indwara y’ibishishi n’uko wayirinda

Yanditswe na Nshimiyimana Gonzalde
Kuya 16 Kamena 2017 saa 09:09
Yasuwe :
0 0

Acné ni indwara y’uruhu igaragazwa n’ibiheri bishibuka mu myenge y’ubwoya bw’uruhu bikagera mu maso, mu mugongo, ku ntugu no mu gituza, ikunze kwibasira umubare w’abatari bake biganjemo urubyiruko.

Ubushakashatsi bwakorewe mu Bwongereza bwagaragaje ko indwara y’ibishishi ishobora gufata buri wese ndetse ntaho ihuriye n’ikibazo cy’imisemburo ku bakibyiruka. Abagera kuri 80% y’abari hagati y’imyaka 11 na 30 muri iki gihugu bakunze kuyirwara.

Umuganga w’indwara z’uruhu, Dr Justine Hextall, yasobanuye ko byoroshye kubona umuntu uri mu myaka 30 cyangwa inarenga, urwaye ibishishi nyamara atarigeze ahura na byo mu buto bwe. Yagize ati “ Abantu bakuru bari kwibasirwa n’ibishishi by’umwihariko abagore.”

Abantu benshi bavuga ko imirire mibi igira uruhare rukomeye mu kuba inkomoko y’iyi ndwara itera ipfunwe uyirwaye bigatuma yigunga.

Dr Hextall yasobanuye ko umunaniro ukabije ndetse n’ihinduka ry’imisemburo mu mubiri w’abakuze ari byo akenshi bishobora kuba intandaro y’iyi ndwara, agashimangira ko kugira uruhu rwanduye no kutarugirira isuku ntaho bihuriye n’impamvu zitera ubu burwayi.

Huffington Post itangaza ko hari imiterere itandukanye y’ibiheri n’uburyo bwo kubivura nk’uko byagaragajwe n’ubushakashatsi.

Umuganga ushinzwe ubujyanama mu mirire mu Ivuriro ryita ku ndwara y’ibishishi mu Bwongereza,The Harley Medical Group, Christine Bailey, yasobanuye ko hari ubwoko bw’ibiheri bigaragara nk’ibibyimbye bigenda bikihwanya n’umusatsi, bigasohokamo ibimeze nk’amavuta azwi ku izina rya ‘Sebum’.

Ubusanzwe ‘sebum’ ifasha uruhu koroha ikarurinda gukanyarara ariko iyo ibaye nyinshi ishobora kuba intandaro yo kubyutsa udukoko dutera indwara z’ibiheri zizwi nka ‘Propionibacterium’.

Ni yo mpamvu ikintu cyose gishobora kuzibya imyanya y’ubuhumekero bw’uruhu gishobora gutuma hahita habaho gutatana k’uturemangingo hakabaho kwirema kw’ibimeze nk’ibishuti ku ruhu ari na byo ntandaro y’ibiheri bigenda bihindura isura.

Ibishishi ni indwara y'uruhu ihangayikishije benshi

Ibitera iyi ndwara

Imisemburo y’umubiri iyo itari ku rugero rujyanye n’ikigero urimo, bishobora gutuma umubiri ushaka kurwanya izo mpinduka bigatera irekurwa ry’amavuta mu ruhu ‘sebum’ ari yo ashobora kwipfundika akabyara ubuheri. Umunaniro ukabije nawo uri mu bishobora gutera iyi ndwara.

Bailey asobanura iyi mpamvu nk’intandaro y’ibiheri byibasira ingimbi, akanayishingiraho agaragaza ko ishobora no gutuma umugore ajya mu mihango ukwezi kwe kutaragera.

Ubushakashatsi kandi bwagaragaje ko iyi ndwara ishobora guterwa n’uruhererekane rwo mu muryango. Ikigo cy’Igihugu cyita ku buzima mu Bwongereza kivuga ko nta bushakashatsi na bumwe bwakozwe kuri iyi ngingo irebana n’amafunguro ashobora gutera iyi ndwara.

Bailey yakomeje avuga ko hagiye habaho ibiganiro mpaka binyuranye bivuga ku mafunguro ashobora kuba intandaro y’iyi ndwara. Yasobanuye ko kunywa amezi menshi akirukanka mu ngirangingo bituma uruhu ruhumeka neza n’utwenge twarwo tukazibuka bigatuma rugumana umwimerere.

Bimwe mu binyobwa ndetse n’ibiribwa bifatwa nk’ibyayitera harimo imitobe y’imbuto, cake, ibisindisha, biscuit, ibiryo biryohera n’ibikomoka ku binyampeke.

Bailey atanga inama ku mirire ifite ubudahangarwa mu guhangana n’iyi ndwara ikunze gutera ipfunwe abayirwaye, aho avuga ko ari byiza kurya umuceri, karoti, ibijumba no guhekenya bimwe mu biribwa bikurira mu butaka.

Uko indwara y’ibishishi ivurwa

Ku bijyanye n’ubuvuzi bw’iyi ndwara na bwo bushingira ku gihe uyirwaye ayimaranye. Nibura umuntu ufite amabara y’umukara n’ay’umweru azanwa n’ibiheri cyangwa abifite mu maso ashobora kuvurwa hakoreshejwe amavuta yabugenewe.

Umuganga w’indwara z’uruhu akaba n’umuvugizi w’ishyirahamwe ry’abaganga bita ku ruhu mu Bwongereza, Dr Anjali Mahto, yavuze ko ari byiza kwifashisha amavuta agurwa mu maduka acuruza imiti hakabamo n’andi ameze nk’asukika asigwa ku ruhu adafatira ngo afunge imyanya y’ubuhumekero bw’uruhu.

Dr Justine Hextall yasobanuye ko ari ngombwa kugerageza kwifashisha utwangwe two gukubisha uruhu mu gihe cyo koga mu rwego rwo gukura imyanda ku ruhu ituma habaho kwipfundika kw’imyanda ishobora gukura igateza ikibazo ku ruhu.

Uruhu ruba rugomba koroha rukaba rubobereye nyuma yo koga. Iyo rero ugiye kureba amavuta ukoresha ku ruhu rwawe ni byiza kwitegereza atakugiraho ingaruka.

Bishobora gufata igihe kinini ngo indwara y’ubuheri ivurwe burundu. Ubushakashatsi bwagaragaje ko abasore bane muri batanu baba bafite imibiri itabasha kwakira imiti ivura ubuheri.

Ku biheri bikabije cyane igihe uruhu rwakomeretse, ni byiza gukoresha imiti yuzuyemo intungamubiri zo mu bwoko bwa A, iboneka mu mavuriro y’imiti yemewe izwi nka ‘Roaccutane’. Ifite ubushobozi buhambaye bwo guhangana n’uburwayi bw’uruhu n’ubwo igira ingaruka nyuma yo kuyikoresha zirimo nko gukanyarara kwarwo, kuribwa umutwe k’uwayikoresheje bituma acika intege.

Imibare itangazwa n’inzego z’ubuzima mu Bwongereza zagaragaje ko mu 2016, abagera ku 49,000 bandikiwe imiti ya ‘Roaccutane’, ugereranyije na 37,000 bari bayihawe mu 2014.

Reba hano ubuhamya bw’uwakize indwara y’ibishishi:


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza