Ibyiza biri mu gukora urugendo rw’amaguru rw’iminota 30

Yanditswe na Nshimiyimana Gonzalde
Kuya 15 Kamena 2017 saa 10:13
Yasuwe :
0 0

Iterambere riri mu bituma abantu bagenda mu modoka no kuri moto batabona umwanya uhagije wo gukora siporo nibura iy’iminota 30 bagenda n’amaguru mu gihe abahanga bagaragaza ko ari kimwe mu bishobora kubafasha kugumana ubuzima bwiza.

Umwarimu w’imyitozo ngororamubiri muri Kaminuza ya Sheffield Hallam, Rob Copeland, yavuze ko niba hari ikinini gishobora guhabwa buri muntu kigatuma arushaho kugira ubuzima bwiza ndetse akagumana itoto, gihwanye n’umusaruro uturuka mu gukora urugendo rw’amaguru.

Ati “Ku bantu batajya badashobora gukorana ingoga kubera imimerere y’imibiri yabo, bafashe iminota icumi yonyine bagakora urugendo bishobora kugira impinduka ikomeye ku buzima n’imibereho myiza byabo.”

Urugendo rw’amaguru rushobora kukurinda indwara nk’umutima, umuvuduko w’amaraso, diabète na kanseri; iyi siporo ifite ubushobozi bwo guhangana n’umunaniro ukabije bigafasha uyikora guhorana itoto n’akanyamuneza.

The Lancet yandika inkuru z’ubuzima, mu bushakashatsi bwo mu 2012, yagaragaje ko 1/3 cy’abatuye isi badakoresha imibiri yabo neza kuko bakoze urugendo rw’amaguru nibura iminota 30, byagabanya indwara zifitanye isano n’umutima ku kigero cya 11%.

Abahanga bemeza ko umutima ari nk’umutsi bityo uko uwumenyereje ugenda urushaho gukomera bikagabanye ibyago byo kwandura indwara ziwerekeye.

Mu gihe urugendo rw’amaguru rwongereye ubushobozi umutima, ibihaha ntibishora kwaguka ahubwo bifasha umubiri gukoresha neza umwuka bimaze kuyungurura.

Uko ukora imyitozo ni ko imitsi yawe ikanguka ikagira imbaraga zo gukoresha umwuka mwiza duhumeka nta kibazo cyo guhumeka bigoranye kibayeho.

Ibisubizo by’ubushakashatsi byagaragaje ko abantu batabasha kwishyigura bari mu kigero cy’imyaka 17 bagomba gukora urugendo rw’iminota 10, bakarukora nibura inshuro eshatu mu cyumweru. Ku myaka 22 bashoboye guhangana n’indwara y’ibihaha mu byumweru 22, bituma bagaragara nk’abakiri bato banafite ubuzima bwiza.

Umuntu ukora siporo yo kugenda nibura iminota 30 n'amaguru ahorana imbaraga

Inzobere mu bijyanye na siporo zigaragaza ko gukora urugendo rw’amaguru ari umuyoboro woroshya igikorwa cy’igogora, bishobora kugufasha gutakaza ibiro.
Urugendo rw’amaguru rukozwe kugera ku minota 45 rufasha umubiri gukoresha amafunguro wafashe bishobora no kuba umusemburo w’igabanuka ry’umubyibuho ukabije.

Igabanuka ry’ibiro ryongera ubwirinzi bwa diabète yo mu bwoko bwa kabiri imwe mu ndwara ikomeje kuzahaza benshi.

Gukora imyitozo ngororamubiri nk’urugendo rw’amaguru bituma amaraso atembera neza mu mubiri, bityo ingingo zose zikamera neza ugasanga ugaragaza isura nziza, tutibagiwe no kuba bifasha mu gusohoka kw’imyanda ishobora gutera indwara.

Ibi kandi bijyana no gukomera kw’amagufa aba yakoreshejwe siporo mu buryo buhoraho bigatuma agira ubudahangarwa bwo guhangana n’impanuka za hato na hato nko kuvunika.

Gutembera n’amaguru ni byiza ku mpamvu z’ubuzima bwo mu mutwe. Mu by’ibanze bizanwa n’iki gikorwa ni iremwa ry’imisemburo ituma umuntu yishima akumva afite ubuzima bwiza. Bifasha kandi mu kugabanya ingano y’imisemburo y’umunaniro iba mu mubiri bigatuma umuntu agubwa neza.

Iyo ukoze urugendo rw’iminota 30 ukabigira igikorwa ngaruka cyumweru, bigabanya ibyago byo kurwara indwara zitandura nka ‘kanseri’.

Ubushakashatsi bwasohowe na Lancet kandi bwerekanye ko imikorere y’umutima w’umuntu ukora urugendo rw’amaguru iba iri hejuru cyane bitandukanye n’utarukora. Iyo urugendo rukozwe neza biba bishobora kugabanya umubare w’ubwandu bwa kanseri y’ibere ku kigero cya 18% n’ubw’iy’amara ku cya 19%.

Abantu bakora nibura urugendo rw'iminota 30 n'amaguru, bigabanyiriza ibyago byo kwandura indwara za hato na hato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza