Ni umuhungu cyangwa umukobwa? Uko Échographie ikora mu gupima igitsina cy’umwana; yibeshya byagenze bite?

Yanditswe na Muhonzire Sylvine
Kuya 26 Gashyantare 2021 saa 11:18
Yasuwe :
0 0

Iyo wumvise ngo kanaka yabyaye, ikintu cya mbere kikuza mu mutwe ni ukubaza uti ‘yabyaye iki?’ ayo matsiko ugira utari mama w’umwana, umubyeyi ayagira akimara kumenya ko yasamye, bigatuma ajya kwa muganga ngo amenye igitsina cy’umwana azabyara mbere y’igihe maze abone uko amwitegura.

Uzumva kenshi ariko umubyeyi avuga ati bambwiye ko nzabyara umuhungu, none nabyaye umukobwa, cyangwa se ukumva uwabwiwe ko azabyara umukobwa bikarangira yibarutse umuhungu. Biba byagenze gute?

Umuganga uvura indwara z’abagore (gynécologue) muri Baho International hospital, Dr. Gaspard Ntahonkiriye, yabivuye imuzingo asobanura impamvu zabyo mu kiganiro yagiranye na IGIHE.

Uko ikizaminni cya ‘Échographie’ gikorwa

Ubusanzwe kugira ngo igitsina cy’umwana kimenyekane, Dr. Ntahonkiriye yavuze ko umubyeyi akorerwa ikizamini cya Échographie’, gikorwa hifashishijwe imashini Échographe (ikoreshwa kwa muganga) ifite ubushobozi bwo kureba ibiri imbere mu mubiri w’umuntu ikoresheje amajwi yitwa ‘Ultrason’ abasha gucengera mu mubiri w’umuntu, akerekana ibice birimo imbere.

Ati “Iyo mashini yitwa Échographe ikoresha utujwi turi hejuru cyane amatwi yacu adashobora kumva ‘ultrason’. Igihe cyose ako kajwi gahuye n’igice cy’umubiri kerekana ikimenyetso. Icyo kimenyetso nicyo dushobora kubona kuri ‘écran’ y’imashini.”

Muri make, iyo umwana afite amezi nibura ane, mu nda y’umubyeyi we aba arimo abumbuye amaguru ku buryo iyo umutwite anyujijwe muri Échographe, ibona neza hagati y’amaguru ye niba ari umuhungu cyangwa ari umukobwa. Ntabwo ari ibintu bisana ubuhanga bwinshi icyo gihe, kuko n’umubyeyi aba ashobora kureba akavuga ati nibyo ni umuhungu ndabona igitsina cye cyangwa se ni umukobwa.

Yakomeje asobanura ko iyo umubyeyi agiye kwipimisha ngo arebe igitsina cy’umwana atwite, asigwa amavuta ku nda ye kugira ngo bifashe ya mashini kwinjiza neza ‘ultrason’ mu mubiri, bityo umwana akagaragara n’igitsina cye kikaba cyaboneka.

Impamvu umubyeyi ashobora kubyara umwana ufite igitsina gitandukanye n’icyo yabwiwe na muganga

Ku byerekeye kuba umubyeyi yabwirwa igitsina cy’umwana kitari cyo, Dr. Ntahonkiriye yavuze ko biterwa n’ibintu bitandunye, birimo kwibeshya k’umuganga, imashini idakora neza cyangwa se ingano inda y’umubyeyi ifite.

Ati “Kugira ngo ikizamini cya Échographie gikorwe neza, bisaba imashini ikora neza n’umuganga ubimenyereye. Gusa hari igihe kwibeshya bibaho ntaho biba bihuriye n’imashini. Imashini ikaba ikora neza ariko kubera ko umuganga uyikoresha atabimenyereye ugasanga atanze ibisubizo birimo kwibeshya cyane. Cyangwa umuganga ubimenyereye agakoresha imashini itameze neza, nabwo ugasanga habayeho kwibeshya.”

Yakomeje avuga ko na none bishobora guterwa n’igihe umubyeyi aje gupimishiriza inda ye, aho yavuze ko iyo aje kare cyane biba bigoye kubona igitsina cy’umwana kuko biba bitaragara neza, ndetse n’iyo aje yarakuze nabwo umuganga abibona bigoranye kuko akenshi aba yegeranyije amaguru.

Ati “Umuntu ashobora kwibeshya cyane iyo umwana akiri muto. Kuko biba bitagaragara neza, uko umwana akura niko bigaragara neza cyane ariko iyo amaze gukura cyane nabwo ntibiba byoroshye kubibona, kubera ko iyo umwana amaze kuba munini akuzura muri nyababyeyi kenshi biragora kumubona neza."

“Kugira ngo wemeze ubwire n’ababyeyi igitsina cy’umwana muri Échographie, biba byiza iyo inda ifite amezi ane. Ku mezi ane amahirwe yo kuvuga igitsina cy’umwana utibeshye aba ari menshi.”

Dr. Ntahonkiriye yavuze ko kugeza ubu Échographie itanga ibisubizo byiza ku byerekeye kureba igitsina cy’umwana ku kigero cya 80% ndetse ko iyo imashini imeze neza n’umubyeyi ubwe aba abasha kubyibonera.

Akamaro ko kumenya igitsina cy’umwana

Akenshi umubyeyi ajya kwa muganga kubaza igitsina cy’umwana azabyara kugira ngo yimare amatsiko, ndetse abone uko azamwitegura mu bijyanye no kugura imyenda y’uruhinja, ibikoresho cyangwa gutaka icyumba umwana azararamo. Gusa ariko hari akandi kamaro karenze ako.

Dr. Ntahonkiriye yavuze ko kumenya igitsina cy’umwana ari bifite akamaro kanini. Ati “Kumenya igitsina cy’umwana bifite icyo bisobanura kwa muganga. Hari indwara ziba zijyanye n’igitsina cy’umwana cyane cyane indwara z’amaraso cyangwa indwara zifata imitsi. Hari indwara uba usanga ari abana b’abahungu gusa bazirwara kandi ari indwara zikomeye cyane.”

“Muri icyo gihe biba bikenewe ko iyo umubyeyi yasamye amenya igitsina cy’umwana atwite kugira ngo bamenye ko umwana afite ingaruka zo kurwara iyo ndwara. Ibi bifasha gukora ibindi bizimini bituma bamenya niba umwana arwaye iyo indwara.”

Dr. Ntahonkiriye kandi yatangaje ko igitsina cy’umwana gishobora kumenyekana mbere y’uko na Échographie ikibona afite iminsi nk’itanu gusa. Ibi ariko biba mu gihe habayeho guhuza intanga z’ababyeyi, aho ikoranabuhanga rishobora kugaragaza igi rigiye gushyirwa muri nyabyeyi niba ari irihungu cyangwa irikobwa.

Kugeza ubu, uburyo bwizewe bwonyine bwo kureba igtsina cy’umwana ni Échographie, kuko usanga hari abavuga ko bamenya igitsina cy’umwana batwite batiriwe bajya kwa muganga.

Yatangiye gukoreshwa mu bijyanye n’ubuvuzi mu 1950, ndetse uko imyaka igenda ishira ikoranabuhanga ryiyongera niko abaganga barushaho kumenya igitsina cy’umwana kare kandi batibeshye.

Umuganga uvura indwara z’abagore (gynécologue) muri Baho International hospital, Dr. Gaspard Ntahonkiriye, yagiriye inama ababyeyi kujya bakoresha iki kiganiro kuko gishobora gutuma barinda n'abana babo indwara zitandukanye
Dr. Gaspard Ntahonkiriye yasobanuye ko kugira ngo kwibeshya bibeho mu gihe cy'iki kizamini, bishobora guterwa n'imashini cyangwa ubunararibonye bw'umuganga
Échographe imaze kuyobokwa n'ababyeyi baba bashaka kwitegura umwana mbere y'uko avuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .