Ruhango: Ubuhamya bw’umwana watewe inda afite imyaka 15 bwakanguye ababyeyi

Yanditswe na Prudence Kwizera
Kuya 2 Kamena 2017 saa 10:11
Yasuwe :
1 0

Umukobwa witwa Mugeni (izina ryahinduwe) w’imyaka 16 y’amavuko wo mu Karere ka Ruhango yatanze ubuhamya bw’uko yatewe inda akiri muto bimuviramo ingaruka mbi zo kuva mu ishuri no kubaho mu buzima bubi, bityo asaba bagenzi be kwitwararirika no kwirinda ibishuko byabashora mu busambanyi.

Ni ubuhamya yatanze ubwo mu ishuri ribanza rya Tambwe riherereye mu Murenge wa Ruhango haberaga igikorwa cyitwa ‘Play Day’ cyo gutanga inyigisho zijyanye n’uburenganzira bw’umwana n’uko yarindwa ihohoterwa, cyateguwe n’umuryango Right To Play Rwanda.

Ni igikorwa ngarukamwaka gihuza ababyeyi n’abana mu rwego rwo kurebera hamwe uburyo uburenganzira bw’umwana bwakubahirizwa ndetse n’ababyeyi bagakangurirwa gutanga uburere bukwiye.

Mugeni akikiye uruhinja rw’umwaka umwe w’amavuko, yatanze ubuhamya bw’uko akiri umunyeshuri yagize imyitwarire mibi akajya yanga kumvira ababyeyi n’abarimu bimuvira gutwara inda itateguwe.

Yagize ati “Byatangiye umusore duturanye ambwira ko ankunda, icyo gihe nigaga mu mwaka wa mbere w’amashuri yisumbuye, ubwo yakomeje kujya anshukisha ibintu akampa n’amafaranga. Byageze aho dutangira kuryamana, ubwo ngeze mu mwaka wa kabiri aba anteye inda.”

Mugeni akomeza avuga ko akimara kumenya ko atwite yabibwiye uwo musore, ariko ahita amwihakana ndetse ntiyongera kujya amavugisha, bituma atangira guhangayika no kubaho mu buzima bugoranye.

Ati “Namubwiye ko yanteye inda ntiyongera no kumvugisha, ahubwo ahita atoroka yigira i Kigali nsigara mpangayitse. Amahirwe nagize ni uko Mama wanjye yumvishe ikibazo nahuye nacyo arabyakira aramfasha ndabyara, ubu niwe umpa ibyangombwa byose bikenewe mu kwita ku mwana.”

Ubuhamya bwa Mugeni bwakoze ku mitima ya bamwe mu babyeyi n’abarezi bari bitabiriye inyigisho za Right To Play bavuga ko bubakanguye, bakaba biyemeje kongera imbaraga mu guha abana babo uburere no kubakurikirana umunsi ku wundi.

Erneste Munyemana yagize ati “Uyu mwana yahuye n’ibishuko bikomeye, kuko yatubwiye ko yagiye ashukishwa ibikoresho n’amafaranga kuko iwabo babaga batamwitayeho ngo babimuhe ndetse bakurikirane n’imibereho ye bamenye uko yiga n’uko yitwara. Njyewe nkuyemo isomo ko ngomba kurushaho kwita ku bana banjye no gukurikirana imibereho yabo n’imyigire yabo, kandi nkabagira inama ko bakwiye kwirinda ibishuko.”

Umuyobozi wari uhagarariye umuryango Right To Play Rwanda, Maurice Kalisa Habyarimana, yavuze ko basanzwe bakora ibikorwa byo gukumira imbogamizi zose zishobora gutuma abana batiga neza, bakaba barasanze gutwara inda zitateguwe ku bana b’abakobwa ari bimwe mu biza ku isonga bituma abana bava mu ishuri cyangwa bakiga nabi.

Habyarimana ati “Icyo tugamije kugeraho cy’ibanze ni ireme ry’uburezi, kugira ngo tubigereho tugomba gukuraho no gukumira imbogamizi zose zishobora gutuma abana batiga neza, inda zitateguwe rero ni zimwe muri izo mbogamizi. Mu Rwanda dukorera mu turere dutanu, turimo Ruhango, Kayonza, Nyarugenge, Rubavu na Bugesera, aho duhuriza hamwe abana n’ababyeyi tukabaha inyigisho tugendeye ku kibazo gihari”.

Umuyobozi wungirije ushinzwe imibereho myiza y’abaturage mu Karere ka Ruhango, Annonciata Kambayire, yatangaje ko mu mirenge itandukanye haboneka abana b’abakobwa baterwa inda zitateguwe, ariko batari bakora ibarura ngo hamenyekane umubare wabo. Gusa ngo hashyizweho amatsinda muri buri kagari agamije gukumira icyo kibazo.

Kambayire ati “Hari abantu bitwa inshuti z’umuryango twashyizeho muri buri kagari, bashinzwe kugenda batanga inyigisho mu miryango by’umwihariko gukumira iyo myitwarire mibi mu bana no gushimangira uburere bwiza. Ntabwo turakora ibarura ry’abana batwaye inda ariko barahari, tugomba gukomeza gukumira kuko dufite impungenge”.

Minisiteri y’Uburinganire n’Iterambere ry’Umuryango iherutse gutangaza ko muri 2016, abana b’abakobwa bari hagati y’imyaka 16-19 bagera ku 17 500 batewe inda zitateguwe ndetse binabagiraho ingaruka zitandukanye zirimo no kuva mu ishuri.

Uyu mukobwa yatanze ubuhamya bukora benshi ku mutima
Kalisa yasabye ko abana b'abakobwa bitabwaho bagahabwa uburezi buboneye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza