Umujyi wa Kigali na SFH mu bukangurambaga bwo kwita ku mirire

Yanditswe na Mugabo Jean d’Amour
Kuya 24 Mata 2017 saa 09:18
Yasuwe :
0 0

Ubuyobozi bw’Umujyi wa Kigali n’ikigo cyita ku mibereho y’umuryango (Society for Family Health-SFH) batangije igikorwa cyo gushishikariza abaturage kurya indyo yuzuye, kwita ku isuku no kwirinda icyorezo cya SIDA.

Ni ubutumwa bwatangiwe i Nyamirambo muri Club Rafiki ku wa Gatanu w’icyumweru gishize, binyuze mu bikorwa bya siporo n’imyidagaduro byitabiriwe n’abatari bake biganjemo urubyiruko, banasusurukijwe n’abahanzi bakunzwe mu Rwanda ari bo Tom Close na Eric Senderi.

Mu irushanwa ry’imikino itandukanye ryiswe Mayor’s Cup rihuza amakipe y’uturere tugize Umujyi wa Kigali hakiyongeraho n’ikipe y’ibiro ry’Umujyi wa Kigali, ikipe y’abagabo y’Akarere ka Kicukiro yatsinze iy’Umujyi wa Kigali amaseti abiri ku busa mu mukino wa volleyball naho ikipe y’abagore y’Akarere ka Kicukiro itsinda iy’Umujyi wa Kigali ibitego 44 kuri kimwe mu mukino basketball.

Mu butumwa bwahatangiwe, Muhongerwa Patricia, Umuyobozi wungirije w’Umujyi wa Kigali ushinzwe imibereho myiza akaba anafite siporo mu nshingano ze, yakanguriye abaturage kwita ku mirire myiza by’umwihariko ku bana bari munsi y’imyaka itanu n’ababyeyi.

Muhongerwa yanakanguriye abaturage kwita ku isuku, kwirinda icyorezo cya SIDA n’ibiyobyabwenge, bakita ku murimo biteza imbere kandi bakitabira ubwisungane mu kwivuza.

Yagize ati “Mwite ku buzima bwanyu bube bwiza. Ndashima Akarere ka Kicukiro kabaye aka mbere mu kwitabira ubwisungane mu kwivuza, turashaka ko uturere twose tw’Umujyi wa Kigali tuza imbere. Imihigo irakomeje nubwo ikomeye ariko tuzayesa.”

Mu maganbo yumvikanye kenshi hagarukwaga ku ifu y’igikoma yitwa Nootri Toto igenewe abana kuva ku mezi atandatu bavutse n’iyitwa Nootri Mama igenewe abagore batwite n’abonsa.

Nkundumugaba Martin, Umuyobozi ushinzwe ibikorwa bya SFH mu Mujyi wa Kigali, yavuze ko bahisemo gufatanya n’ubuyobozi bw’Umujyi wa Kigali kugira ngo babashe kugera ku bantu benshi babagezaho ubutumwa bugamije gutuma ubuzima buba bwiza.

Yavuze ko ifu ya Nootri ifite intungamubiri zitanga indyo yuzuye ku mwana mu gihe cy’iminsi 1000 ibanza y’ubuzima itangirana n’igihe umugore asamye inda.

Ati “Ubu turakangurira abantu kwita ku mirire bakoresha iyi fu ya Nootri kuko ikungahaye ku ntungamubiri kandi ifite umwihariko wo kuba inakorerwa mu Rwanda. Turabakangurira kwita ku isuku, kwipimisha no kwirinda icyorezo cya SIDA mwifata, mushyira imbere ubudahemuka no gukoresha agakingirizo. Turanibutsa ababyeyi ko guha umwana ibere ryonyine kugeza afite amezi atandatu ari ingenzi.”

Amafu ya Nootri yashyizwe ku isoko mu kwezi gushize akaba akorwa n’uruganda rwitwa Africa Improved Foods ruherereye mu gace kahariwe inganda mu Mujyi wa Kigali.

Abakozi ba SFH berekana ibicuruzwa birimo ifu, udukingirizo n'imiti isukura amazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza