IGIHE.com > Ubuzima > Inama
Dusobanukirwe n’ihungabana icyo ari cyo

Dusobanukirwe n’ihungabana icyo ari cyo


Yanditswe kuya 3-04-2013 - Saa 04:07' na Constantin Tuyishimire

Mugihe u Rwanda rwitegura icyumweru cyo kwibuka ku nshuro ya 19 Jenoside yakorewe Abatutsi muri Mata 1994, icyumweru kizatangira tariki ya 07 Mata uyu mwaka, hakaba kandi mu gihe nk’iki hakunze kugaragara ibikorwa by’ihungabana n’ihahamuka, twifuje kubagezaho bimwe mu biranga uwahungabanye.

Nk’uko inzobere mu buzima bwo mu mutwe zibivuga, hari ibishobora gutera ihungaban; ibimenyetso by’ihungabana ndetse n’uburyo umuntu ugize ihungabana yafashwa.

Mu kumenya birambuye ihungabana cyane muri iki gihe Abanyarwanda bitegura ibihe byo kewibuka ku nshuro ya 19 inzirakarengane zazize Jenoside yakorewe Abatutsi muri Mata 1994, twaganiriye na Dr Rwagatare Patric, inzobere mu bijyanye n’ubuzima bwo mu mutwe mu Bitaro Bikuru bya Kaminuza bya Kigali (CHUK), maze adutangariza byinshi ku ihungabana.

Dr Rwagatare Patric avuga ko ibintu byinshi bishobora gutuma habaho ihingabana. Muri ibyo harimo kuba umuntu yaranyuze mu bihe bikomeye by’indenga kamere.

Mbere na mbere mu rwego rwo kubungabunga ubuzima bwo mu mutwe, ni ngombwa ko umuntu amenya ibimenyetso umuntu ashobora kugenderaho akaba yamenya umuntu ufite ihungabana.

Dr Rwagatare Patric atangaza ko hari ibimenyetso bitandukanye umuntu ashobora kumenyeraho umuntu ufite ihungabana.

Muri ibyo bimenyetso hari mo :

1. Aho usanga umuntu adakunda ibiganiro bigaruka ku byamubayeho mu bihe bikomeye runaka yanyuzemo; urugero nko mu gihe cya jenocide yakorewe abatutsi muri Mata 1994, ugasanga ntashaka ikintu cyose gishobora kubimwibutsa.

2. Kuribwa umutwe ugasanga nta gisobanura cyigaragara gitera ubwo buribwe bw’umutwe.

3. Kubura ibitotsi ugasanga umutima w’uwahungabanye ntabwo uri hamwe ahubwo arangwa no guhora ashikagurika igihe hagize akantu gakoma.

4. Guceceka cyane no kwigunga, ugasanga umuntu aracecetse cyane ntashaka kuvuga no kujya aho abandi bari.

5. Gusa n’uwerekana ko ibyamubayeho birimo kumubaho ako kanya. Dr Rwagatare avuga ko ibi bishobora kuza no mu nzozi aho aba arota inzozi mbi cyane yumva ko ari muri bya bihe bibi yanyuzemo.

Ni gute wafasha umuntu ufite ihungabana?

Dr Rwagatare Patric, akomeza atanangaza ko ubufasha bwa mbere ari ubwo mu miryango kuko umuntu ufite ihungabana agomba kugira umuntu ugomba kumuba hafi, akaba yamutega amatwi ndetse akamuganiriza ku buryo yumva aruhutse.

Dr Rwagatare akomeza avuga ko iyo ibyo byanze, wihutira kugana abaganga bize ibijyanye no kwita ku buzima bwo mu mutwe, bakaba bagufasha kwita kuwahungabanye.

Insanganyamatsiko y’uyu mwaka w’2013 mu kwibuka ku nshuro ya 19 Jenoside yakorewe Abatutsi muri Mata 1994, iragira iti ”Twibuke Jenoside yakorewe Abatutsi duharanira kwigira”.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO