IGIHE.com > Ubuzima > Inama
Isuku, imwe mu ngamba zo kwirinda indwara y’ibicurane

Isuku, imwe mu ngamba zo kwirinda indwara y’ibicurane


Yanditswe kuya 16-01-2013 - Saa 16:27' na Umurerwa Emma-Marie

Indwara y’ibicurane, iterwa n’udukoko dufata mu myanya y’ubuhumekero. Gukaraba intoki bikaba bifasha mu rwego rwo kwirinda gukwirakwiza iyo ndwara.

Amakuru atangazwa n’urubuga rwa doctissimo, avuga ko abantu benshi bazi ko indwara y’ibicurane iterwa n’ubukonje, ariko si ko biri, kuko iyi ndwara iterwa n’udukoko, utwo dukoko tukaba dukunda kororoka mu gihe cy’ubukonje, twakwiyongera iyo ndwara ikarushaho gufata abantu benshi.
Indwara y’ibicurane ikaba ikunze kwibasira imyanya y’ubuhumekero, ifatiye mu mazuru kuko ari ko kayunguruzo karinda imyanda yinjira muri iyo myanya.

Ibimenyetso bigaragaza ko umuntu yarwaye ibicurane biratandukana bitewe n’imitere y’umuntu, ariko hari ibyo bahuriraho harimo kuzana ibimyira bidashira, gufungana kw’amazuru, gucika intege cyane, kutagira ubushake bwo kurya, kubabara umutwe ndetse hari n’abagira umuriro.
Umuntu wanduye ibicurane aba ashobora kwanduza nyuma y’iminsi ibiri na we amaze kwandura, ni ukuvuga ko muri cya gihe aba arimo kwitsamura, aba asohora amazi yuzuyemo za virusi ari na ko azohereza mu bamwegereye.

Uru rubuga rutangaza ko abana hamwe n’abantu bageze mu za bukuru, bibasirwa cyane n’indwara y’ibicurane, aho bashobora kubirwara hagati y’inshuro 2 n’inshuro 5 ku mwaka, kuko abasirikare babo b’umubiri baba badashoboye kurinda umubiri gufatwa n’iyo virusi.

Mu rwego rwo kwirinda iyi ndwara, abantu bakaba basabwa gukaraba intoki, inshuro nyinshi mbere yo kwikora ku munwa, na nyuma yo kwipfuna, hamwe n’igihe cyose bagiye gufata amafunguro.

Kwirinda gusangirira ku kirahuri/igikombe hamwe no kwirinda gusangiza ikiyiko/ikanya mu rwego rwo kwirinda kuyikwirakwiza.

Kwirinda kwiyegereza abantu banduye ibicurane cyangwa babirwaye, hamwe no gupfuka ku munwa igihe igihe cyo kwitsamura cyangwa akorora.

Mu gihe cyo kwipfuna umuntu aba agomba gukoresha agatambaro gafite isuku cyangwa impapuro z’isuku ariko zikoreshwa rimwe gusa (usage unique) kugira ngo birinde umuntu gufatwa n’ibicurane.

Ibi byose ariko bikorwa umuntu yihutira kugana abaganga.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO