Ababyeyi bashishikarizwa gusuzumisha abana kanseri hakiri kare

Yanditswe na Evariste Nsengimana
Kuya 25 Nzeri 2017 saa 10:34
Yasuwe :
0 0

Ikigo gishinzwe kurwanya kanseri mu bana, Rwanda Children Cancer Relief(RCCR), gishishikariza abanyarwanda kugira umwete wo gusuzumisha abana kanseri kuko iyo zigaragaye hakiri kare zishobora kuvurwa zigakira.

Byagarutsweho ku wa Gatanu w’icyumweru gishize mu rugendo rwo ku nshuro ya kane rwahariwe kuzirikana ububi bwa kanseri z’abana, rwateguwe na RCCR, rwaturutse ku kigo cy’Igihugu cy’ibarurishamibare rugera mu gace kahariwe abanyamaguru) Car Free Zone) mu mujyi wa Kigali.

Karen Bugingo w’imyaka 24, umwe mu barwitabiriye, amaze imyaka isaga itanu arwaye kanseri yo mu maraso yabwiye The New Times ko igihe amaze ayirwaye, yasobanukiwe ubukana bwayo ndetse ko agomba no kugira uruhare mu kuyisobanurira abandi bakanamenya n’uko bayirinda.

Umuyobozi mukuru wa (RCCR) Jean-Claude Mutabazi, avuga ko gukora urugendo nk’urwo bituma abantu benshi basobanurirwa izo kanseri kandi ko iyo zivujwe hakiri kare zikira.

Yagize ati “Abantu bakeneye gusobanukirwa kanseri muri rusnge kandi ko n’abana bashobora kuzirwara. Dukeneye ko banamenya ko ari indwara ivurwa igakira iyo yasuzumwe kare.”

Yakomeje asobanura by’umwihariko ko u Rwanda rumaze gutera intambwe ishimishije mu gushyiraho uburyo butandukanye bwo gusuzuma no kuvura kanseri z’abana ugereranije no mu 2012 butangizwa kandi ko abanyarwanda bakwiye kwifashisha ayo mahirwe bagaharanira ko nta mwana wicwa na zo.

Umuganga w’indwara z’abana, akaba n’umuyobozi ushinzwe agashami ko kuvura kanseri z’abana mu bitaro bya Butaro, Dr. Cyprien Shyirambere, asobanura ko kanseri ari indwara ibaho bitewe n’udukosa tubaho mu turemangingo tw’umubiri kandi ko byagaragaye ko mu bana n’abakuru bose bishoboka.

Dr. Shyirambere avuga ko ibimenyetso bya kanseri bigenda bitandukana bitewe n’ubwoko bwayo kandi ko kuva mu 2012 ibitaro bimaze kwakira abana barenga 600 bayirwaye nubwo bitavuze ko ari aba bazirwaye gusa kuko hari n’abo zica batarazisuzumisha.

Muri kanseri zibasira abana harimo iyo mu maraso irangwa no kuva imyuna, kanseri y’impyiko ituma umwana abyimba igice cy’inda, kwihagarika amaraso n’izindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza