Abahanga bagaragaje impungenge ku hashobora kongera gukomoka virusi ya Zika

Yanditswe na Habimana Jean Baptiste
Kuya 2 Ukwakira 2017 saa 11:20
Yasuwe :
0 0

Virusi ya Zika isakazwa n’imibu yo mu bwoko bwa ’Aedes aegypti’ iruma abantu ikabateramo ubwo bwandu ni imwe mu ziteye inkeke ku buzima bwa benshi, ahanini bitewe n’uburyo igenda yandura.

Zika yagaragaye bwa mbere mu ntangiriro za 2015, muri Brazil ishamikira no mu bindi bihugu birimo ibyo muri Amerika y’Epfo n’iya Ruguru, Ibirwa bya Pacifique n’ibice byo mu Majyepfo ashyira Uburasirazuba bwa Aziya.

Itsinda ry’abashakashatsi bo mu Bushinwa bagaragaje ko iyi virusi ya Zika igenda yihinduranya kandi bigaragara ko itera uwayanduye kubyara umwana ufite umutwe muto kuva yagaragara mu myaka ibiri ishize.

Mu Ugushyingo 2016, Ishami ry’Umuryango w’Abibumbye rishinzwe Ubuzima (WHO) ryatangaje ko Zika yagombaga kurangiran ariko bigaragara ko itaracika burundu.

Ibi bituma Abanyamerika bagira amakenga akomeye ku kuba ishobora kongera gukwirakwira biturutse ku mazi y’imyuzure yasendereye ahantu henshi biturutse ku nkubi z’imiyaga.

Umuganga akaba n’impuguke mu kuvura indwara zandura, ukorera mu Ishuri ry’Ubuvuzi muri Kaminuza ya Washington, Dr. Michael Diamond, yatangarije Newsweek ko Zika izagaruka igihe icyo aricyo cyose.

Yagize ati “Sinababwira ngo ni ryari ariko izagaruka rwose. Nigaruka, bizaguma bimere nk’uko byari mu gihe cyashize cyangwa tuzakomeza gukora ubushakashatsi, twiga ku kuba ishobora kuzagarukana ubukana burenze ubwo yari isanganywe?”

Ibyavuye mu bushakashatsi bwatangajwe mu kinyamakuru Science, ni intambwe ya mbere ku kumenya impamvu n’uburyo virusi ya Zika ituma abana bavukana imitwe mito n’uburyo bwihariye iyi virusi ishobora guteramo ingaruka karahabutaka.

Abana barwaye Zika bavukana imitwe mito cyane

Alysson Muotri, umushakashatsi wo muri Kaminuza ya California na we yize kuri virusi ya Zika ariko akoreye ubushakashatsi ku nyamaswa, agaragaza ko uku kwihinduranya kuzatuma ikomeza kongera ubukana uko bukeye n’uko bwije.

Dr. Michael Diamond yatangaje ko kuvukana imitwe mito cyane kitari cyo kimenyetso rukumbi kigaragaza uwanduye virusi ya Zika mu minsi yashize.

Iki kibazo nticyakunze kugaragazwa mu bushakashatsi bwakorwaga mbere kuko abagore babaga baranduye iyi virusi kandi batwite; gusa ariko, uko iyi virusi yagiye yihinduranya, igakwirara muri Brazil, nibyo byatumye imenyekana cyane kandi igaragarira abashakashatsi.

Dr. Michael Diamond yavuze ko iyi virusi ishobora kugaruka igihe icyo ari cyo cyose akaba ari na yo mpamvu abantu basabwa kuba maso ijoro n’amanywa.

Abashakashatsi barimo na Cheng-Feng Qin wo muri Beijing Institute of Microbiology and Epidemiology mu Bushinwa, na we yatangaje ko uku kwihindura kw’iyi virusi gukomeza gufata indi ntera kandi bikomeza kwangiza ubwonko bw’umuntu.

Mu kugerageza ibi, Qin yafashe imbeba 100 zikivuka maze azicamo amatsinda ane, arangije atera virusi ya Zika mu itsinda rimwe ryanakoreshejwe mu bushakashatsi mu 2010. Amatsinda atatu asigaye, yashyizwe kure ya rya rindi, maze na yo akoreshwa mu bushakashatsi bwo mu 2015 na 2016.

Mu gukura kw’izi mbeba, izatewe virusi ya Zika zakuranye udutwe duto cyane ndetse ibyavuye muri iri gerageza byari bihambaye, kandi byasize ibitekerezo bitandukanye mu mitwe y’abashakashatsi. Qin yageragereje iyi virusi no ku bwonko bw’umuntu.

Qin n’itsinda ry’abashakashatsi bari gushaka ibisubizo kuri iki kibazo cyo kwihinduranya kwa virusi ya Zika aho usanga kenshi umubu uyikwirakwiza udwinga umugore utwite, hanyuma virusi igakwira mu mubiri hose, bikarangira ihinguranyije ingobyi umwana akuriramo.

Abana 100 muri Leta Zunze Ubumwe za Amerika bafashwe na virusi ya Zika, bavukanye imitwe mito cyane. Aba bana kandi bashobora guhura n’ingorane zitandukanye, zirimo nko kugira ikibazo mu mitekerereze, kugira ububabare bukabije, ibibazo byo kutumva, ingorane mu kureba no gutambuka, kugira ubukererwe mu kwicara, guhaguruka no gutambuka ugereranije n’abana bazima bari mu kigero kimwe.

Nubwo umubu ukwirakwiza virusi ya Zika wagiye usangwa muri Amerika cyane muri Leta za New Jersey na California ntabwo urakwirakwira muri Amerika yose.

Kuva mu 2015, raporo yagaragaje ko muri Amerika hagaragaye abarwayi bagera ku bihumbi 5,500 mu duce bihana imbibi twa Puerto Rico no mu birwa bimwe bya Caraïbes aho abagera kuri 225 mu bo yagaragayeho bayandujwe no kurumwa n’umubu.

Umwana w'umwaka umwe wavukanye virusi ya Zika ahabwa ubufasha n'umuganga muri Brazil
Virusi ya Zika isakazwa n’imibu yo mu bwoko bwa Aedes aegypti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza