Abahanga bavumbuye uburyo bwo gupima ubwoko umunani bwa kanseri binyuze mu maraso

Yanditswe na Mukaneza M.Ange
Kuya 22 Mutarama 2018 saa 09:47
Yasuwe :
0 0

Abahanga mu bumenyi bujyanye n’imiterere ya muntu bavumbuye uburyo bwo gupima amaraso bwiswe CancerSEEK , bushobora gufasha kubona ubwoko umunani bwa kanseri ndetse n’aho ziherereye mu mubiri.

Mu bushakashatsi bwatangajwe mu kinyamakuru Journal Science, aba bahanga bagaragaje ko CancerSEEK ifite ubushobozi bwo gupima kanseri zifata udusabo tw’intanga ngore, umwijima, igifu,urwagashya,umuhogo, ibihaha, ibere n’igice kimwe cy’urura.

Umwalimu muri Kaminuza ya Johns Hopkins Medicine akaba n’umwe mu bakoze ubu bushakashatsi, Dr. Nickolas Papadopoulos, yavuze ko bizeye ko ubu buryo bavumbuye bushobora gutanga umusanzu mu gutuma mu gihe kizaza byoroha gupima kanseri hakiri kare, bityo kuvura no kubaga abazirwaye bikarushaho kugenda neza.

Ati “Iyi ni intambwe ya mbere, ibyo twabashije kubona birahagije ngo dutere intambwe ikurikiyeho, ariyo yo gupima abantu benshi badafite kanseri, kugira ngo tubashe kumenya neza ko igipimo cyacu gikora.”

Nk’uko CNN dukesha iyi nkuru yabyanditse, uburyo bwari busanzwe bukoreshwa mu gupima kanseri bwagaragazaga gusa iri mu maraso, ariko ntibubashe kwerekana neza ko ariyo urwaye cyangwa ufite ubundi burwayi budafite aho buhuriye nayo.

Umwalimu akaba n’umuyobozi w’ishami ryiga kuri kanseri zifata abagore muri University College London mu Bwongereza, Dr. Martin Widschwendter, akaba atari mu bakoze ubu bushakashatsi yavuze ko ibyagezweho ari intambwe ikomeye.

Nubwo bimeze gutya ariko abahanga batandukanye bavuga ko urugendo rukiri rurerure cyane ko benshi mu bakoreweho ubushakashatsi ari abantu byari bisanzwe bizwi ko barwaye kanseri, bityo bikaba bigoye gukoresha iki gipimo ku bantu batarwaye.

Ubushakashatsi bwakorewe ku barwayi 1005 byari bisanzwe bizwi ko barwaye kanseri, CancerSEEK yabashije gupima no kubona 98% by’izifata udusabo tw’intanga ngore, mu gihe izifata ibere zagaragaye ku kigero cya 33% gusa.

Ni mu gihe mu bantu 812 bari bazima bahawe iki gipimo, barindwi muri bo byagaragaye ko bafite kanseri kandi mu by’ukuri ntayo barwaye.

Abahanga bavumbuye uburyo bwo gupima ubwoko umunani bwa kanseri binyuze mu maraso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza