Abanyarwanda baburiwe ku kwirinda kanseri nk’imwe mu ndwara zica abantu bucece

Yanditswe na Evariste Nsengimana
Kuya 27 Kamena 2018 saa 08:47
Yasuwe :
0 0

Inzobere mu bijyanye no kuvura kanseri zikangurira abaturage kwisuzumisha iyi ndwara iri mu zihitana abantu benshi ku Isi, kuko yica bucece kandi ikaba iri mu zihangayikishije Abanyarwanda.

Abahanga mu kuvura iyi ndwara iterwa n’ukwiyongera kudasanzwe k’uturemangingo umubiri utabasha kugenzura, bikavamo ikibyimba gikura kikagaba n’amashami mu bice bitandukanye by’umubiri, bavuga ko abantu bakwiye kwisuzumisha no kwivuza hakiri kare, kuko byongera amahirwe yo gukira.

Umukobwa wagiye kwivuza Kanseri y’inkondo y’umura mu Buhinde utashatse ko amazina ye atangazwa, yabwiye IGIHE ko akimenya ko ayirwaye yari yihebye atazi ko yavurwa ngo akire.

Yagize ati “Nasuzumwe kanseri mu 2016 ubwo nari ngiye kwa muganga kwisuzumisha bisanzwe. Ntabwo nari mfite ububabare bundi, nta kibazo gikomeye nari mfite, bansuzumye muganga ambwira ko mfite ibimenyetso bya kanseri, bambwira ko kanseri yanjye ikiri ku rwego rwa mbere."

Yakomeje agira ati "Bampaye ubuvuzi, bancisha mu cyuma [...] nyuma naje kwisuzumisha barebye ibisubizo by’ibizamini by’amaraso bari bantumye, babona nta kibazo gihari.”

Ubwo yari mu gikorwa cyo gusuzuma Kanseri zitandukanye kuri MBC Hospital, ibitaro biherereye mu Karere ka Nyarugenge, Umuganga w’Inzobere mu bijyanye na kanseri ukorera HCG Cancer Hospital mu Buhinde, Dr. Sridhar PS, yavuze ko mu Rwanda hakenewe ubukangurambaga no gusuzuma abantu, abayirwaye bakavurwa.

Yagize ati “Kumenyekanisha kanseri mu baturage ni ngombwa. Icya kabiri ni ubukangurambaga ku bijyanye na kanseri y’ibere. Ababutegura bakwiye guhera ku mashuri yigisha ibya kanseri, ku ishuri bakigisha abagore, bamara kuyimenya bakajya kwifatisha ibizamini.”

“Mu gihe basanze bayirwaye nta kindi cyihutirwa cy’iri suzuma turi gukora uretse gufasha umurwayi gutangira gukurikiranwa, indwara igafatiranwa, bakamenya icyiciro igezeho hakiri kare akaba yahabwa imiti yamufasha gukira.”

Inzobere mu buvuzi akaba akaba n’umuyobozi wa MBC Hospital, Dr. Basabose Jean Paul, avuga ko abarwaye kanseri bagenda biyongera nyamara uburyo bwo kuyivura mu gihugu butari hose.

Yagize ati “Twabonye ari uburwayi bwo kwitondera, birakenewe gufasha abantu bafite icyo kibazo. Niyo mpamvu twitabaje inzobere zivuye cyane cyane mu gihugu cy’u Buhinde, ngo baze kudufasha muri iki gikorwa cyo gusuzuma no kuzageza ubuvuzi ku bo bazasanga bafite icyo kibazo.”

Kuva byatangira mu 2012 kugeza mu 2016, Ibitaro bya Butaro, bimwe mu byihariye kuvura kanseri mu Rwanda, byari bimaze kwakira abasaga 5700 bayirwaye.

Umunyamabanga wa Leta muri Minisiteri y’Ubuzima, Dr Ndimubanzi Patrick, mu mwaka ushize yavuze ko Leta yashyizeho ingamba zo guhangana n’ikibazo cy’inzobere mu kuvura kanseri, zirimo kohereza Abanyarwanda kubyiga mu mahanga.

Ubushakashatsi bwakozwe n’Ishami ry’Umuryango w’Abibumbye ryita ku buzima (OMS) mu 2012 bwerekanye ko kanseri yagaragaye ku bantu barenga miliyoni 14, ikica miliyoni 8.2. Abasaga 33% bayanduriye mu kunywa itabi ndetse bigaragara ko 80% bya kanseri ifata abantu bakuru iterwa n’imyitwarire irimo kunywa itabi, inzoga, kurya cyane ibikomoka ku matungo n’ibinure, kubyibuha birenze urugero n’ibindi.

Abahanga bavuga ko kwirinda kunywa itabi, kwirinda ibisindisha, kwirinda izuba ryinshi, gukora imyitozo ngororamubiri, kugira imirire iboneye, gukoresha ibimera bizwiho kurwanya iyo ndwara birimo tungurusumu, karoti, amashu, ibitunguru, n’ibindi; bishobora gufasha umuntu kwirinda kanseri.

Bimwe mu bimenyetso biyiranga harimo impinduka zidasanzwe mu nyama zo mu nda cyangwa mu ruhago rw’inkari, kubabara ahantu runaka ntibikire, kuva amaraso bidasanzwe, kumva ikintu kidasanzwe mu ibere cyangwa ahandi, igogora rikora bidasanzwe cyangwa kubabara uri kumira, ikibyimba kidasanzwe, inkorora ihoraho, gusarara bihoraho n’ibindi.

Abahanga bagaragaza ko iyo kanseri itahuwe kare ivurwa igakira
Umuganga w’indwara z’umubiri, akaba n’umuyobozi wa MBC Hospital, Dr. Jean Paul Basabose, avuga abarwaye kanseri bagenda biyongera nyamara uburyo bwo kuyivura mu gihugu butari hose
Umuganga w’indwara z’umubiri, akaba n’umuyobozi wa MBC Hospital, Dr. Jean Paul Basabose, avuga abarwaye kanseri bagenda biyongera nyamara uburyo bwo kuyivura mu gihugu butari hose
Abahanga bagaragaza ko iyo kanseri itahuwe kare ivurwa igakira
Umuganga w’Inzobere mu gusuzuma no kuvura kanseri, waturutse mu bitaro bikomeye bivura Kanseri mu Buhinde, Dr. Sridhar PS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza