Abarwayi 9,000 ba Hepatite C b’abakene bagiye guhabwa imiti ku buntu

Yanditswe na Evariste Nsengimana
Kuya 28 Nyakanga 2017 saa 06:52
Yasuwe :
0 0

Ikigo cy’igihugu gishinzwe ubuzima (RBC) cyatangaje ko hari abarwayi ibihumbi icyenda b’indwara ya Hepatite C bari mu cyiciro cya mbere n’icya kabiri by’Ubudehe n’abafite ubwandu bwa Virus ya SIDA bagiye guhabwa imiti ku buntu, mu rwego rwo korohereza abadafite ubushobozi bwo kwigurira imiti yayo.

Mu 2016, Minisiteri y’ubuzima yagiranye ibiganiro n’ n’uruganda rukora imiti ya Hepatite C rwo muri Leta Zunze Ubumwe za Amerika, hagamijwe kugabanya ikiguzi cy’iyo miti ikava kuri miliyoni 70Frw (95 000$) ikagera ku bihumbi 900Frw y’u Rwanda(1200$).

Ibiganiro byarakomeje, ibiciro bikomeza koroshywa kugeza aho ubu RBC itangaza ko umurwayi wayo avurwa n’amadolari 780 (Hafi ibihumbi 650 Frw).

Umuyobozi w’agateganyo w’Ishami rishinzwe kurwanya indwara zandura muri RBC, Dr Makuza Jean Damascene, yabwiye IGIHE ko Leta iri gukora ibishoboka byose ngo abarwayi b’iyi ndwara bavurwe ku buryo bworoshye.

Yagize ati “Ubuvugizi bwarakozwe amafaranga aramanuka agera ku madorali 780. Ubu umurwayi ashobora kuvurwa amezi atatu atanze ayo agahabwa ya miti kugera akize.”

Yongeye “Ikindi navuga, mitiweli ntirakunda ariko ubundi bwishingizi birakunda. Hari ubukangurambaga bwagiyeho bwo kureba abaturage bose bari mu cyiciro cya mbere n’icya kabiri (barwaye Hepatite C ). Abo bose bazabona imiti ku buntu. Ubundi yari gahunda yarebaga abafite agakoko gatera SIDA ariko n’abandi bakennye badafite ubundi buryo bwo kwirwanaho bakaba bafashwa, ku buryo abantu bagera ku bihumbi icyenda bafite agakoko gatera SIDA n’abari mu cyiciro cya mbere n’icya kabiri cy’Ubudehe bazayihabwa ku buntu.”

Yakomeje avuga ko iyi gahunda yatangiranye n’igikorwa cyo kureba ibyo byiciro ko guhera ku wa mbere w’icyumweru gitaha aba mbere bazayihabwa.

Dr Makuza avuga ko impamvu ubu bufasha bwatangirijwe ku bafite agakoko gatera SIDA ari uko imibiri yabo iba idafite ubwirinzi bukomye kuko udafite Virus ya SIDA ashobora kumara imyaka 30 itaramuzahaza naho ufite virus ya SIDA akanarwara Hepatite C aba afite amahirwe yo kumara imiyaka iri hagati y’umwe n’itatu iyo atafashe imiti.

Ubuvugizi burakomeje imiti ishora kuzagera munsi ya 100$

Dr. Makuza yavuze ko Minisiteri y’ubuzima ikomeje gukora ubuvugizi ku ku buryo uretse kuba ufite ubundi bwishingizi butari mitiweli abwivurizaho kandi ikiguzi kikaba cyarageze ku madorali 780, bifuza ko hari imiti yazajya igurwa munsi ya 100 $ n’ukoresha mitiweli akaba yakoroherrezwa.

Yagize ati “Abakoresha mitiweli rero, bari muri ba bandi b’ubudehe bwa mbere n’ubwa kabiri. Icyabonetse ni bo twagihaye. Twaravuze tuti niba ‘habonetse imiti y’ubuntu tube aribo tuyiha’. Ubu buvugizi buracyakomeje, turebe niba wenda abazasuzumwa nyuma, hashobora kuza imiti iri ku mafaranga make ariko tubanza kureba niba yemewe na OMS. Yo izaba iri ku giciro gito ku buryo na mitiweli ishobora kuba yayishyura. Ishobora kuzaza igura amadolari ari munsi ya 100 (Ibihumbi hafi 80 Frw).”

Akomeza avuga ko bitaranozwa neza ku buryo bishobora gutinda bikamara umwaka umwe cyangwa ibiri iri imbere.

Dr. Makuza avuga ko kugeza ubu nta bushakashatsi Minisante irakora ngo hamenyekane niba abarwayi ba Hepatite C bari kwiyongera cyangwa bagabanuka, gusa ngo mu myaka ibiri iri imbere bizakorwa.

RBC ivuga ko kugeza ubu mu barwayi ba Hepatite C bafite ubwishingizi ni bo benshi bagerageza kwivuza ubu burwayi, aho habarurwa abarenga ibihumbi 50 mu Rwanda.

Mu bantu ibihumbi 240, RBC itegenya gupima indwa ya Hepatite C mu bukangurambaga bwatangiranye n’uko kwezi kwa nyakanga, hamaze gupimbwa abasaga ibihumbi 100. Muri abo, hafi 4% basanze bayirwaye, abari hejuru y’imyaka 45, nibo benshi, abafite Hepatite C iri karande bagera hafi kuri 2.3%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza