Hatangiye ibiganiro byo kugabanya ikiguzi cy’urukingo rwa Hepatite kugera ku 2000 Frw

Yanditswe na Mukaneza M.Ange
Kuya 19 Nyakanga 2017 saa 08:10
Yasuwe :
0 0

Ikigo cy’igihugu gishinzwe ubuzima (RBC) cyatangaje ko nyuma yo kubona ko abantu benshi biteguye guhabwa urukingo rwa Hepatite, bari kuganira n’abaterankunga n’abandi bafatanyabikorwa kugira ngo barebe ko ikiguzi cyarwo cyagabanuka kikava ku 8700 Frw kikagera byibura ku 2000 Frw.

Ibi byatangajwe n’Umuyobozi w’Agateganyo w’Ishami rishinzwe indwara zandura muri RBC, Dr Makuza Jean Damascene, nyuma y’ubukangurambaga bwo gusuzuma no gutanga urukingo rwa Hepatite C na B ku buntu, bwakozwe na Minisiteri y’Ubuzima mu cyumweru gishize.

Ubu bukangurambaga bwakozwe muri gahunda yo kwizihiza Umunsi Mpuzamahanga wo kuzirikana ku ndwara ya Hepatite, byari biteganyijwe ko abagera ku bihumbi 250 basuzumwa Hepatite C na B, mu gihe abandi bagera ku bihumbi 400 barengeje imyaka 15 bagomba gukingirwa Hepatite B.

Uyu mubare ariko uri hasi cyane ugereranyije n’abari babikeneye, dore ko ubwo ubu bukangurambaga bwasozwaga kuwa Gatanu w’icyumweru gishize, imirongo y’abifuzaga gusuzumwa no guhabwa urukingo yari miremire.

Abaganiriye na IGIHE, bavuze ko bifuza ko Minisiteri y’Ubuzima yakongera iminsi yo kwikingiza kugira ngo hatagira ucikanwa.

Musabyima Carine yagize ati “Nibadufashe batwongerere iminsi natwe tubashe kwikingiza iyi ndwara kuko batayongereye hari abantu benshi nanjye ndimo tutagira amahirwe yo kubona iyi serivisi kandi ari byo byatuzinduye.”

Mukamugema Françoise w’imyaka 46 we yagize ati “ Mudufashije mwatuvugira bakatwongera iminsi natwe tukagira ayo mahirwe yo gukingirwa kuko bitabaye ibyo abantu benshi ntibakingirwa.”

Mu Kiganiro na The New Times, Dr Makuza yavuze ko bateganya kugera mu turere twose tw’igihugu, kugeza ubu 12 tukaba twararangiye.

Ati ” Kubera ibikorwa byo kwiyamamariza kuba perezida, ubu bukangurambaga bwabaye busubitswe ndetse uturere 18 dusigaye tukazatugeramo nyuma.”

Yakomeje agaragaza ko kugeza ubu bamaze gukingira abagera ku bihumbi 210 mu gihugu hose, mu gihe abandi ibihumbi 100 basuzumwe.

Mu gihe byari biteganyijwe ko muri ubu bukangurambagara hakingirwa abantu ibihumbi 40 mu Mujyi wa Kigali, uyu mubare wikubye kabiri aho bwasojwe urukingo ruhawe abarenga ibihumbi 80.

Makuza yavuze ko uretse ubukangurambaga, kuri ubu bari no mu rugamba rwo kureba uko bagabanya urukingo rwa Hepatite ruri ku giciro kitoroheye buri wese kandi abarukeneye ari benshi.

Yagize ati ”Tuzagirana ibiganiro n’abaterankunga ndetse n’abafatanyabikorwa bacu kugira ngo turebe ko igiciro cyagabanuka kikava ku bihumbi 8700 by’Amanyarwanda, kikagera byibura ku 2000 Frw cyangwa 3000 Frw.”

RBC itangaza ko ugereranyije mu Rwanda abafite hejuru y’imyaka 15 barwaye Hepatite C na B bari hagati ya 3% na 4%, mu gihe abarengeje imyaka 45 bo basaga 10%.

Raporo igaragaza uko indwara ya Hepatite yifashe mu 2017 igaragaza ko ku isi habarurwa abagera kuri miliyoni 325 babana na Hepatite C cyangwa B. Mu 2015 izi ndwara zahitanye abagera kuri miliyoni 1.34.

Kugeza ubu urukingo rutangwa ni urwa Hepatite B rwavumbuwe mu 1982, hakaba hakiri gukorwa ubushakashatsi ngo barebe ko haboneka n’urwa Hepatite C, nubwo ivurwa igakira.

Ubukangurambaga bwo gukingira Hepatite muri Kigali bwasojwe hakiri benshi babyifuza

angel@igihe.rw

Indi nkuru wasoma: Kigali: Ikingira rya Hepatite B ryasojwe ababikeneye bakiri uruvunganzoka


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza