Kwamamaza

‘Ihembe ry’imbogo, umuti w’akataraboneka ku mugore wabuze amashereka’

Yanditswe kuya 1-12-2016 saa 15:41' na Emma-Marie Umurerwa


Mbere y’umwaduko w’ubuvuzi bwa kizungu, mu Rwanda rwo hambere abenshi bakoreshaga imiti gakondo wasangaga babikomora ku babyeyi babo, hakaba n’abandi babimenya bitewe n’ubuzima babayemo, bakabyifashisha mu kuvura indwara zananiranye.

Uyu muco wagiye uhererekanwa mu myaka itandukanye ndetse ugenda ugera ku musaruro umunsi ku wundi, kugera ku ntera yo kubisangiza abaturuka i Bwotamasimbi no kubahishurira ibanga rihishe muri iyi miti ifite inkomoko mu Rwagasabo rituma abayikoresha bashobora gusigasira ubuzima bw’ababagana.

Ntawuhama Daniel, umuvuzi gakondo wo mu Karere ka Musanze afite ubunararibonye bwo kwereka ba mukerarugendo basura ikigo ‘Iby’Iwacu Cultural Village’ muri Pariki y’Ibirunga uburyo Abanyarwanda bo hambere bavuraga bifashishishije imiti gakondo harimo n’ihembe ry’imbogo.

Mu nzu y’ikigonyi winjiramo wunamye, iteyemo intebe za Kinyarwanda n’ibirago birambuye hasi, niho uyu musaza w’imyaka 65 ukunze kwambara uruhu rw’intama ruriho amasaro, ingofero ikoze mu ruhu n’ubwoya bw’inyamaswa, aba yicaye.

Uburyo yitwara ndetse n’imyambarire ya Ntawuhama abikomora ku basekuruza be, ari nabo avuga ko yakuyeho impano yo kuvura mu buryo bwa gakondo, akoresheje ibyatsi, impu n’amahembe y’inyamaswa.

Uyu musaza umaze imyaka isaga 40 muri uyu mwuga ubwo twamusangaga mu Kigo Iby’Iwacu Cultural Village’ yatangiye adusobanurira ko avura indwara z’uburyo butandukanye.

Agira ati “Njye imiti mvurisha nawe nayikubwira. Nk’umuntu baroze murutsa nkoresheje ibyatsi byitwa umutagara, intovu na gasahu. Ndabifata nkabisekura hanyuma nkabishyira mu rukiza (uruho rutoya) ngasukamo amazi nkavangavanga, ngakamura, nkabiha umurwayi nyuma y’iminota iri hagati ya 10 na 30 aba yamaze kuburuka iyo yarozwe koko.”

Akomeza avuga ko abagore babuze amashereka nabo abavura.

Ati “Umugore wabyaye akabura amashereka, ufata iri hembe ry’imbogo (aryerekana) ukarikoza mu muriro, hanyuma ukarimunukiriza ku mazuru, ukarimukoza ku mabere yombi mu minota 30 amashereka aba yaje umwana arimo konka.”

Mu irebe ry’umuryango w’inzu uyu muvuzi akoreramo, hateye ibyatsi n’ibiti by’amoko atandukanye avurisha, ari na ho ahera avuga ko umuvuzi gakondo akwiye gushyira ku mugaragaro imiti avurisha kugira ngo arusheho kugirirwa icyizere n’abamugana.

Ati “Iyo abarwayi baje mbereka imiti ngiye kubavurisha, ba mukerarugendo nabo mbereka ubwoko bw’imiti iri hano nkanabasobanurira indwara ivura. Umuvuzi gakondo wa nyawe ntaba akwiye guhisha imiti avurisha, iyo ayihishe bituma abo avura basigarana akangononwa.”

Ntawuhama avuga ko kuvura mu buryo bwa gakondo byamugeje kuri byinshi, dore ko ngo nta kandi kazi akora.

Ati “Mfite abana bane barangije amashuri yisumbuye, kandi nabishyuriye mu mafaranga nakuye mu buvuzi gakondo, mfite inzu nziza, amasambu ndetse n’inka; muri make navuga ko ubuvuzi gakondo bwanteje imbere.”

Yakomeje agira inama bagenzi be bavura mu buryo bwa gakondo, gukorera ku mugaragaro kandi bakirinda kubeshya ko bavura indwara zose, ikindi kandi bakajya babanza kubaza abantu babagana ko bivuje mu baganga ba kizungu, ngo kuko hari abajya kwivuza bazi ko barozwe kandi ari malaria cyangwa inzoka zo mu nda barwaye.

Ntawuhama ngo ntawe ahisha imiti avurisha
Uyu muvuzi gakondo avuga ko abifitemo uburambe bw'imyaka isaga 40
Ibi bimera byo hafi y'iyi nzu ni bimwe mu byo uyu muvuzi gakondo avurisha

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved