Impungenge ku bwiyongere bwa Malaria muri Afurika nyuma y’uko umuti wayo ugaragaje intege nke

Yanditswe na Mukaneza M.Ange
Kuya 1 Gashyantare 2017 saa 10:13
Yasuwe :
0 0

Abashakashatsi mu buvuzi bo mu Bwongereza bagaragaje ko Malariya ishobora kurushaho kuba ikibazo muri Afurika nyuma y’uko umuti wayo unaniwe gukiza Abongereza bane banduye iyi ndwara ubwo bari kuri uyu mugabane.

Aba bashakashatsi bo mu Ishuri ry’Isuku n’Ubuvuzi rya Londres, bavuga ko kuba aba barwayi batarakijijwe n’uyu muti usanzwe ukoreshwa muri Afurika bikwiye gufatwa nk’umuburo.

Aba barwayi bane bari bamaze amezi atanu batembera mu bice bitandukanye bya Afurika bahawe umuti witwa Artemether-Lumefantrine.

Inkuru dukesha Ijwi rya Amerika ivuga ko uyu muti ariwo wagize uruhare mu kugabanya impfu ziterwa na Malariya muri Afurika.

Dr. Colin Sutherland wayoboye itsinda ryakoze ubu bushakashatsi yavuze ko uyu muti uba witezweho gukiza umuntu nyuma y’iminsi itatu awufashe, aba barwayi bawuhawe bakaba baragarutse kwa muganga nyuma y’ibyumweru biri hagati ya bitatu na birindwi ubwo bari bongeye kugaragaza ibimenyetso.

Yakomeje avuga ko nubwo badashobora guhita bemeza ko uyu muti wananiwe kubakiza, aricyo gihe cyo kubisuzumana ubwitonzi.

Sutherland yavuze ko nubwo uyu muti usanzwe ugaragaza kudatanga umusaruro ukwiye mu bice byo mu Majyepfo ya Aziya, ntaho bihuriye n’ibyabaye kuri bariya barwayi bane.

Artemisinin ni umuti wa Malariya wavumbuwe n’Umushinwa Youyou Tu Won, waje no kubiherwa igihembo cyitiriwe Nobel mu 2015. Wagize uruhare mu kugabanya impfu za Malariya ku Isi ku kigero cya 30% hagati ya 2010-2015.

Abantu bari hagati ya miliyoni 300 na 500 barwara malariya. Mu mwaka ushize abagera ku 438,000 bitabye Imana.

Impfu zigera kuri 90% za malariya zigaragara muri Afurika, aho nibura umwana umwe muri batanu ahitanwa nayo. Iyi ndwara itwara umugabane wa Afurika arenga miliyari umunani z’ama-pound buri mwaka.

Abashakashatsi mu buvuzi bagaragaje ko Malariya ishobora kurushaho kuba ikibazo muri Afurika nyuma yuko umuti wayo unaniwe kuvura abarwayi bane bayanduye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza