Kwamamaza

Indwara y’Umusonga n’iy’impiswi zica abana miliyoni imwe n’ibihumbi 400 buri mwaka

Yanditswe kuya 12-11-2016 saa 10:17' na Jean Pierre Tuyisenge


Ishami ry’Umuryango w’Abibumbye ryita ku bana Unicef, ritangaza ko abana bangana na Miliyoni imwe n’ibihumbi 400 bapfa buri mwaka bazize indwara y’impiswi n’iy’umusonga, bakaba baruta kure abicwa n’izindi ndwara bose ku Isi.

Unicef ivuga ko abenshi muri aba bana ari abaturuka mu bihugu bifite ubukungu buciriritse, zica abantu nyamara zivurwa zigakira mu gihe umwana yahawe ubuvuzi hakiri kare ahanini bushingiye ku gukingirwa, kugabanya imyanda yo mu rugo no konswa igihe gikwiriye.

Ibi ni ibyavuye mu cyegeranyo cyasohowe n’uwo muryango kuri uyu wa 11 Ugushyingo, bise “Umwe ni benshi, dukureho impfu ziterwa n’indwara y’umusonga n’impiswi”.

Indwara y’umusonga ikomeje kuba imwe mu ndwara zica abana benshi bari munsi y’Imyaka itanu kuko yishe abagera kuri miliyoni mu mwaka wa 2015, bishatse kuvuga ko mu masegonda 35 umwe aba yitabye Imana. Ziruta iz’abahitanwa na Malaria, Igituntu na SIDA bose hamwe.

Uyu muryango ugaragaza ko umusonga w’abana ahanini uterwa n’umwuka wanduye, ibintu byatumye Unicef isaba abayobozi b’Isi bateraniye mu nama yiga ku mihindagurikire y’ikirere yiswe COP22 iri kubera muri Maroc, kwita kuri icyo kibazo.

Umuyobozi wungirije wa Unicef, Fatoumata Ndiaye, yagize ati “ Twabonye neza ko umwuka wanduye uturuka ku ihindagurika ry’ikirere ari kimwe mu byangiza ubuzima no gukura k’umwana kuko bimutera umusonga n’izindi ndwara z’ubuhumekero.”

Yongeyeho ati “ Miliyari ebyiri z’abana baba ahantu hari umwuka wanduye ku kigero kirenze ikibuzwa n’amahame mpuzamahanga, bigatuma barwara ndetse bakanahasiga ubuzima. Abayobozi bateraniye mu nama ya COP22 bashobora kugira uruhare mu kurokora ubuzima bwabo, bakora ibikorwa bishobora kugabanya imyuka mibi ituruka ku mihindagurikire y’ikirere.”

Unicef ivuga ko Indwara y’umusonga, n’iy’impiswi mu bana, usanga ahanini ziterwa n’uruhare ruto abayobozi bashyira mu bikorwa byo guhangana n’imihindagurikire y’ikirere. Ukubura kw’amazi meza bituma abana benshi bahura n’ibibazo byo gufatwa n’impiswi bigatuma badindira mu mikurere.

Abana bagera kuri Miliyoni 34 bamaze kwicwa n’indwara y’Impiswi kuva mu mwaka wa 2000. Unicef ivuga ko haramutse hadashyizwemo imbaraga, abandi bana bagera kuri miliyoni 24 bashobora kuzaba barapfuye kugera mu mwaka wa 2030.

Ndiaye yagize ati “ Izi ndwara zifite uruhare runini mu mpfu z’abana kandi kuzivura ntibihenze, ahubwo bategereza gusa inkunga y’umuryango mpuzamahanga w’ubuzima kandi ari nto cyane. Ni yo mpamvu turi guhamagarira Isi yose kugira umusanzu itanga kugira ngo hongere ubwirinzi kugira ngo turokore ubuzima bw’abana.”

Unicef isaba ko hakongerwa amafaranga akoreshwa mu buvuzi bw’abana cyane cyane abagerwaho n’ingaruka z’Umusonga n’impiswi, hakibandwa ku bo mu bihugu bikiri mu nzira y’amajyambere.

Iki cyegeranyo kigaragaza ko 80% y’abana bapfa bazize indwara y’umusonga, 70% nabo bazira izifitanye isano n’impiswi zikunze kwibasira abana bakiri munsi y’imyaka itanu.

Kigaragaza kandi ko 62% y’abana bari munsi y’imyaka itanu biganje mu bihugu biri mu nzira y’amajyambere, bakagira 90% y’abapfa bazize indwara y’Impiswi n’umusonga.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved