Rusizi: Abana babarirwa muri 600 bugarijwe n’imirire mibi

Yanditswe na Sitio Ndoli
Kuya 5 Gashyantare 2017 saa 08:42
Yasuwe :
0 0

Nubwo imibare igenda igabanuka, mu Karere ka Rusizi harabarurwa abana bari muri 600 bakigaragaraho imirire mibi.

Iyi mibare igaragazwa n’Umuryango mpuzamahanga wita no gufasha abafite ibibazo by’imirire, World Relief, uvuga ko mu mwaka wa 2015 hari abana 800 bagaragaraho imirire mibi muri Rusizi, ariko ngo bafite intego ko muri uyu mwaka bagomba kugabanuka bakagera kuri 600.

Byabagabo Justin umuhuzabikorwa wa World Relief ati “Nk’umwaka ushize dutangira abana bari mu mirire mibi bari 800 ariko ubu ngubu mu mihigo abasigayemo ni 600, twatangiye mu kwezi kwa gatandatu muri 2015. Ni ukuvuga ngo hamaze kugabanukaho 200, intego yacu ni uko mu Karere ka Rusizi hatagaragara abana barwaye bwaki.”

Akomeza avuga ko ku bufatanye n’akarere iyi ntego bazayigeraho baha amahugurwa abajyanama b’ubuzima, babigisha uburyo bateka indyo yuzuye, gutunganya uturima tw’igikoni n’izindi ngamba.

Bamwe mu bajyanama b’ubuzima 40 bahawe aya mahugurwa mu gihe cy’iminsi ine, bavuga ko ubumenyi bungutse bazabwigisha abaturage bakabasha kurwanya imirire mibi ikigaragara muri bamwe mu bana.

Umujyanama Ruberanziza Joseph yagize ati “Twigaga uko bakora banahinga mu karima k’igikoni ndetse n’uburyo bahinga ibihumyo, ubumenyi nkuye hano ngiye gufasha abaturage aho dutuye, tubigishe guhinga imboga ku butaka buto, ibihumyo byo twabonye ko umuntu ashobora no kubihinga mu nzu bitagombeye gusaba ubutaka bunini. Ubu biragaragara ko abaturage bagenda bikura mu mirire mibi.”

Nathalie Ntankovu yunzemo ati “Twiga ibijyanye no kurwanya imirire mibi, bidufasha kumenya neza abana bafite imirire mibi noneho tukegera ababyeyi babo bana tukabafasha kuyirwanya tubigisha uburyo bateka indyo yuzuyemo intungamubiri zose.”

Umuyobozi ushinzwe ubuzima mu Karere ka Rusizi, Gatera Eugide, avuga ko ku bufatanye na World Relief, batanga amatungo magufi, imirama y’ibihumyo mu rwego rwo kurwanya imirire mibi.

Abajyanama b'ubuzima 40 bahawe amahugurwa yo kurwanya imirire mibi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244