U Rwanda rugiye gutangira gukoresha umuti mushya ugabanya ubukana bwa Sida

Yanditswe na Rabbi Malo Umucunguzi
Kuya 30 Gicurasi 2018 saa 08:46
Yasuwe :
2 2

Umuyobozi w’Ishami rishinzwe kurwanya Sida, Dr Nsanzimana Sabin, yavuze ko guhera muri Nyakanga 2018 mu Rwanda hazatangira gukoreshwa umuti mushya ugabanya ubukana bwa virusi itera Sida, utagira ingaruka mbi ku murwayi ugereranyije n’iyari isanzwe.

Uyu muyobozi w’ishami ryo kurwanya SIDA n’izindi ndwara zandura mu Kigo cy’Igihugu cy’Ubuvuzi, RBC, yabigarutseho mu nama ihuje impuguke hasuzumwa uburyo bwo kurushaho kurwanya Sida, iteraniye i Kigali.

Nk’uko RBA yabitangaje, umwe mu banduye virusi itera Sida, Stephen McGill ukomoka muri Liberia uyimaranye imyaka 21, avuga ko nk’imiti amaze igihe akoresha imugiraho ingaruka mbi.

Yagize ati "Nubwo imiti ari myiza ugereranyije n’ingaruka zo kuyireka, uko ukomeza gukura uyinywa igenda igira ingaruka zirimo no kuba yakongerera ibyago byo kurwara umutima. Ubwoba mfite buntera kwibaza icyo Isi iri kubikoraho mu buryo burambye. Ikindi mfite umuvuduko ukabije w’amaraso, nkeka ko byaba byaratewe n’igihe maze mfata imiti."

Dr Nsanzimana yavuze ko uko ubushakashatsi bugenda bukorwa haboneka imiti igira ingaruka nke ugereranyije n’iyayibanjirije, bityo umuti ugezweho ukazatangira gukoreshwa mu Rwanda guhera muri Nyakanga.

Yakomeje agira ati "Hari umuti mushya wongewe muri gahunda yacu uzatangira gukoreshwa hano mu Rwanda mu kwezi kwa karindwi. Uwo muti wakozweho ubushakashatsi ko kugeza ubu ari wo ufite ingaruka nke cyane kurusha indi. Ntabwo ari ukuvuga ko ziri kuri zeru ariko ntiwawugereranya n’iyakoreshwaga mbere kuko icyo gihe hari n’amahitamomake y’imiti."

Uretse ubushakashatsi ku miti igabanya ubukana bwa virusi itera Sida, abahanga bakomeje no gushaka umuti n’urukingo rwayo.

Umuyobozi w’Umuryango Mpuzamahanga wo kurwanya Sida, International AIDS Society (IAS) akaba n’Umuyobozi wungirije mu Kigo kirwanya Sida cyitiriwe Desmond Tutu, Prof. Linda-Gail Bekker, yavuze ko bitewe n’aho ubushakashatsi bugeze, bigaragara ko urukingo ruzaboneka mbere y’umuti.

Yakomeje agira ati "Inkuru nziza ihari ni uko mu 2009, inkingo ebyiri wasangaga zidafitiwe icyizere zabashije kugaragaza ubushobozi, twerekana ubushobozi bw’urukingo bungana na 31% nyuma y’imyaka ine. Ariko urebye igihe cyose cy’igeragezwa ry’urwo rukingo mu myaka 12, ni uko rwagabanyije ubwandu bwa virusi itera sida ku ijanisha rya 60%."

"Twafashe rero izo nkingo uko ari ebyiri turazihuza, dutegereje kureba umusaruro mu myaka itanu iri imbere. Ku giti cyanjye mfite icyizere kuko turimo kubakira ku bisubizo byiza, kandi ndizera ko ruzakora muri Afurika kuko igerageza rya mbere ryakorewe muri Thailand, ariko twongeyemo indi miti ngo turebe ko rwakora nk’urukingo no ku rwego rwa sida igaragara muri Afurika."

Mu rwanda imiti yahageze mu 1999 ari ukunywa ibinini 30 ku munsi bigura 6000 $, ariko ubu ni ikinini kimwe gusa nacyo gitangirwa ubuntu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza