IGIHE.com > Ubuzima > Indwara
Ineza wavukanye ubumuga bw’umutima akeneye ubuvuzi bwihuse

Ineza wavukanye ubumuga bw’umutima akeneye ubuvuzi bwihuse


Yanditswe kuya 22-01-2012 - Saa 08:22'

Ineza Mugisha Angel gufite umwaka umwe w’amavuko yavukanye ubumuga bw’umutima, aho ubuzima bwe buri hagati y’urupfu n’ubuzima. Ineza agira ikibazo cyo guhumeka, ubu akaba ari mu bitaro bya Kibuye aho ubuzima bwe bugomba kwitabwaho cyane hakoreshejwe ibyuma bimufasha guhumeka.

Umubyeyi we Vumiliya Alice agira ati :" Kuva Angel yavuka ubuzima bwe ntibwigeze bumera neza, hari igihe arara adasinziye ijoro ryose kubera ikibazo cyo kunanirwa guhumeka."

Se umubyara Tuyizere Jean Baptiste we yagize ati : " Hari ubwo yagagaye amara iminota 5 adahumeka, ngira ngo arapfuye ariko Imana ikinga ukuboko."

Aba babyeyi bavuga bafite agahinda kenshi, bahora bahangayitse bibaza umunota ku wundi niba umwana wabo aba akirimo akuka.
Uyu mwana wavutse ku itariki ya 21 Mutarama 2011 ariko iyo umureba ukeka ko afite hagati y’amezi 4-5 kubera ubu burwayi.

Ururwayi bwa Ineza buteye bute ?

Mu ruhande rugabanya ibice bibiri by’umutima harimo umwobo, bivuga ko amaraso arimo umwuka (oxygène) mu ruhande rw’ibumoso yivanga n’amaraso adafite umwuka mu ruhande rw’iburyo ry’umutima.
Kubera iyo mpamvu amaraso menshi aca mu bihaha, naho ajya mu mubiri akaba make. Abaganga batangaza ko iyo myobo iba ku mutima ikunda kubaho.

Impamvu itera iyi ndwara ntisobanutse neza, kuko abahanga bavuga ko ishobora kuba uruhererekane mu miryango (malformations cardiaques congénitales) cyangwa igaterwa n’ikirere (environmental), ibiyobyabwenge, inzoga nyinshi n’ibindi. Abana 9 ku 1000 ngo nibo bavukana ubu burwayi ku isi.

Dr Mucumbits Joseph, umuganga w’indwara z’umutima ku bitaro by’umwami Faycal yabwiye The New Times dukesha iyi nkuru ko hari gahunda ibi bitaro biri gutegura yo kuvura abantu bafite indwara z’umutima. Yasobanuye ko hari itsinda ry’abahanga mu ndwara z’umutima bazajya baza buri mwaka kuri biriya bitaro kubaga indwara z’umutima, cyane cyane ku bana.

Ababyeyi be bavuga ko izina ry’umwana wabo riri ku rutonde rw’abana bafite icyo kibazo bazafashwa na Leta mu kujya kubagwa no kwivuza hanze. Gusa abaganga babwira aba babyeyi ko umwana wabo ashobora kubagwa gusa amaze kugira imyaka itatu. Hakibazwa niba iyo myaka itatu azayigezaho kuko ahumeka bigoranye.

Dr Mucumbitsi we avuga ko igihe cyo kubaga umwana nk’uriya giterwa n’uburyo amerewe ko bidasaba gutegereza indi myaka 2, yongeraho ko we ubwe agiye gusuzuma niba Ineza ari kuri lisiti y’abagomba kubagwa kugira ngo ikibazo cye kitabweho kuko ubuzima bwe buri mu kaga.

Dr Mucumbitsi avuga ko iyi ndwara ivurwa igakira kuko hari n’undi wavukiye Faysal wayivukanye ubu akaba yarabazwe agakira. Gusa avuga ko gukira indwara nk’iyi wavukanye akenshi ari nk’ igitangaza, kuko abana benshi bavukana iyi ndwara batarenza imyaka 5 bakiriho.

Ababyeyi ba Ineza bategereje bizeye ko imfura yabo izakira ikagira ubuzima bwiza nk’ibindi bibondo.

Uyu mwana ukeneye ubuvuzi bwihuse, akenshi mu bitaro aba arwajwe na se Tuyizere kuko nyina akiri umunyeshuri mu mashuri yisumbuye aho yiga i Kigali.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO