IGIHE.com > Ubuzima > Indwara
Kigali : Ibice byakuwe ku maguru byabashije gusubiranya isura ye yari yarangiritse

Kigali : Ibice byakuwe ku maguru byabashije gusubiranya isura ye yari yarangiritse


Yanditswe kuya 10-02-2013 - Saa 05:26' na IGIHE

Uyu ni umwana ukomoka mu Karere ka Rusizi w’imyaka 15 wabazwe ikibyimba cyari cyarakuye ibice byo mu maso he mu myanya yabyo, ariko isura ye yongeye kubakwa hakoresheje ibice byakuwe ku maguru ye.

Uyu mwana wafashwe n’ubwo burwayi afite imyaka irindwi, ngo byatangiye ari akabyimba, bagerageza kumuvuza kwa muganga birananirana, bitabaza abanyamasengesho biba iby’ubusa, ariko ubwo Ingabo z’u Rwanda zari mu gikorwa cya Army week mu Karere ka Rusizi nibwo zabashije kubona uwo mwana aza kubagirwa i Kigali, ariko isura ye ikomeza gukobana nk’uko byemezwa na Lt. Col Dr Furaha Charles Umuganga mu Bitaro Byitiriwe Umwami Faysal, dore ko ikibyimba yabazwe cyanganaga n’umutwe we.

Gusubiza isura uyu mwana byakozwe n’inzobere z’abaganga baturutse muri Leta Zunze Ubumwe za Amerika na Canada bibumbiye mu muryango witwa “The face the future”, bari bari mu Rwanda mu gihe cy’icyumweru, aho basoje uruzinduko rwabo babashije kuvura abarwayi bagera kuri 17 bari baragize ibibazo cyo kononekara bimwe mu bice by’umubiri.

Dr Daniel Alam wa mbere muri Amerika ya ruguru wabashije gusana isura y’umuntu akoresheje ibindi bice by’umubiri, ari mu bari bagize iritsinda, aho ndetse ari ni mu babaze uyu mwana avuga ko biba fashishije amagufa n’ibindi bice by’umubiri birimo amaraso n’agahu bato babikura ku kuguru kwe maze babyifashisha mu gusana mu maso ibice by’imbere mu isura ye byari byarononekaye.

Dr Daniel avuga ko bubatse uruhande rw’isura ye rutari rwuzuye, ibi ngo babikora kugirango umuntu asubirane isura y’umuntu.

Mukashyaba Bonfride nyina w’uyu mwana avugako aba baganga ntako batagize kuko umwana we yongeye kugarura isura y’umuntu. dore ko ngo ubundi utamenyaga niba ari umuntu kuko bamwe bamubonaga bamutinyaga.

Abaganga bo mu Rwanda bakurikiranye ibyakozwe n’izi nzobere z’abanyamahanga nti bashidikanya mu kuvuga ko ubu buvuzi buri mu bwa mbere bwakozwe buhanitse bukorewe ku butaka bw’u Rwanda, kuko uburwayi bavuye ubundi buvurirwa hanze y’u Rwanda, ariko kandi ngo si na kenshi abivuriza hanze babona amahirwe yo kubona inzobere zimeze nk’izaje mu Rwanda.

Abayobozi b’iyi misiyo “The Face the Future” bavuga ko iyi ari intangiriro, kuko iki gikorwa kizajya kibaho buri mwaka kandi ngo barateganya no kwagura ibikorwa, aho bateganya no kuzajya bigisha abaganga bo mu Rwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO