IGIHE.com > Ubuzima > Indwara
Ubuzima bwe bugeze mu marembera, bwacungurwa na miliyoni 15 z’Amanyarwanda

Ubuzima bwe bugeze mu marembera, bwacungurwa na miliyoni 15 z’Amanyarwanda


Yanditswe kuya 7-11-2012 - Saa 11:06' na Olivier Muhirwa

Uyu ni mubyeyi yitwa Mukarugambwa Marie Goretti, wavukiye mu Karere ka Muhanga mu Ntara y’Amajyepfo, watangiye kurwara mu mwaka wa 2009, maze mu kwivuza abaganga baza kumubwira ko yarwaye indwara y’impyiko, ariko kuri ubu arasabwa miliyoni 15 z’Amanyarwanda ngo abashe gucungura ubuzima bwe bugeze mu marembera.

Ubusanzwe impyiko zikora akazi gakomeye mu mubiri w’umuntu, harimo no kuyungurura amaraso ziyakuramo imyanda. Ubu impyiko ze zarangiritse ku buryo umurimo zakoraga usigaye ukorwa n’iriya mashini (machine à dialyse).

Uyu mubyeyi akurikiranirwa mu bitaro byitiriwe Umwami Fayçal ku Kacyiru, aho ajya kuri iriya mashini inshuro eshatu mu cyumweru.

Impungenge ku buzima bwe muri iyi minsi zikomoka ku kibazo cy’uko imitsi ye igenda iziba bituma ubufasha yahabwaga n’iyo mashini rimwe na rimwe butabasha kugira icyo bumumarira, bityo gukomeza kubaho kuri we akaba yabikesha guhabwa indi mpyiko nzima (transplantation rénale).

Mukarugambwa yagize amahirwe yo kubona umugiraneza wemera kuzamuha impyiko imwe, maze bibaye amahire ibipimo byabo byombi byerekana ko iryo hererekanya ry’ingingo ryashoboka.

Mu ijwi ritoya kandi rituje ubwo yavuganaga n’umunyamakuru wa IGIHE mu gitondo cyo kuri uyu wa Gatatu tariki ya 7 Nzeri 2012, Mukarugambwa yagize ati “Kugeza ubu maze kubona amafaranga ibihumbi magara atatu gusa. Nza kwivuza mu 2009 twatangiye umuntu yirwanaho mu bushobozi buke nari mfite bwo gukora ubucuruzi, maze kugeza muri miliyoni esheshatu mba ndashiriwe. Niyambaje Minisiteri y’Ubuzima ngo indwaneho igeregeza kumfasha kuko nza mu mashini gatatu mu cyumweru, kandi inshuro imwe ni ibihumbi ijana utabariyemo imiti n’ibindi bizamini bikorwa, kugeza ubu ariko bamwiye ko amafaranga ari menshi.”

Akomeza agira ati ”Kugeza ubu umuti ngomba guhabwa ntawo mfite ndetse n’imitsi yatangiye kuziba ni ukuvuga ngo nyuma y’amezi atatu gusa kubaho kwanjye nintabona indi mpyiko ntabwo bizaba bigishobotse”.

Ubu Mukarugambwa wahoze ari Umuforomokazi arwariye mu Bitaro byitiriwe Umwami Fayçal mu cyumba cya 301, mu igorofa rya gatatu.

Kugira ngo icyo gikorwa cyo kumuha impyiko gishoboke, dore ko aho cyahenduka ari mu gihugu cy’u Buhinde, arasabwa amafaranga y’u Rwanda miliyoni cumi n’eshanu (15.000.000 Rwf). Agize umugisha wo kuyabona yagarura ubuzima akava kuri iriya mashini.

Ubushobozi bwe ntabwo, dore ko umuryango we watanze hafi umutungo wose wari ufite ngo ubashe kumuvuza muri iyi myaka yose amaze arwaye.

Uwagira umutima wo kumufasha , yashyira inkunga ye kuri imwe muri izi konti : Compte no. 00040036273585 iri muri Banki ya Kigali (BK) cyangwa se Compte no. 406370143411 iri muri Banki y’abaturage (BPR).

Mukarugambwa n'imashini imuha ubuzima ubu

Arashimira kandi arasabira umugisha umuntu wese uzagira umutima wo gutanga uko yifite ngo agerageze kuramira amagara ye. Uwakwifuza kumuganiriza numéro ye ni 0783709187.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO