IGIHE.com > Ubuzima
Intore ku rugamba rwo guca ubwandu bushya bwa SIDA mu Rwanda

Intore ku rugamba rwo guca ubwandu bushya bwa SIDA mu Rwanda


Yanditswe kuya 10-12-2012 - Saa 08:09' na Noel Turikumwe

Uyu mwaka Isi yose yihaye intego yo guhagarika ubwandu bushya bukagera kuri Zeru, kurwanya guhohotera abafite ubwandu, bigamije kuba mu Isi izira ubwandu.

Mu Rwanda na ho intero ni uguhagarika ubwandu bushya, aho iyi nshingano yahawe intore ziri mu itorero, kuko insanganyamatsiko igira iti “Uruhare rw’intore mu guhagarika ubwandu bushya bwa Virusi itera SIDA.” Ibi bikaba byaragarutsweho cyane ku munsi mpuzamahanga wahariwe kurwanya SIDA uba buri mwaka ku itariki ya 1 Ukuboza.

Nk’uko bigaragara munyandiko zateguwe n’Ikigo cy’Igihugu cy’Ubuzima (RBC), gikorera muri Minisiteri y’Ubuzima, ngo impamvu zo kwifashisha intore, ngo n’uko nyuma y’itorero zisanzwe zigira uruhare mu guhindura imyumvire y’abaturage, bityo bakizera ko batanga ubufasha bwahagarika ubwandu bushya bwa Virus itera SIDA, binyuze mu kwigisha umuryango nyarwanda.

Mu butumwa bwatanzwe na Rucagu Boniface, ukuriye itorero ry’igihugu, yaziyasabye kwirinda amaraha yatuma bishora mu bibateza ubwandu, abakangurira kugira uruhare mu kurwanya ubwandu bushya bagategura u Rwanda rwiza ruzira ubwandu.

Yagize ati “uru rubyiruko ntitwifuza ko rwagerwaho n’ubwandu. Mwirinde amaraha atazatuma musaza imburagihe, mugaca igihugu umugongo, ahubwo dukeneye imbaraga zanyu ngo uru Rwanda ruri imbere ruzabe urutarangwamo ubwandu bushya.”

U Rwanda rwashyize imbaraga mu guhashya iki cyorezo, kuko ruri ku mwanya wa mbere mu bihugu byabashije kugabanya ubwandu.

Dr. Marie Goretti wavuze mu izina ry’Umuryango w’Ubumwe bwa Afurika, ngo 2/3 muri miliyoni 30 zimaze kuzira SIDA ku Isi, ni Abanyafurika. Mu ijambo rye yavuze ko yizeye umusanzu uzaturuka ku ntore, maze yifuza ko umusanzu wazo wazarenga imbibi z’u Rwanda, zigafasha Afurika yose zikitwa intore za Afurika.

Minisitiri w’Ubuzima Dr.Agnes Binagwaho mu ijambo rigufi yagejeje ku bitabiriye ibirori byizihiza umunsi mpuzamahanga wo kurwanya SIDA, yavuze bibabaje kuba mu Rwanda ibihumbi birenga 10 byandura virusi itera SIDA. Gusa yavuze ko atangije ku mugaragaro ubukangura burwanya ubwandu bushya.

Umunsi wo kurwanya SIDA, wagiyeho kuva mu mwaka wa 1988. Kuva icyo gihe isi yose yizihiza uyu munsi ku itariki ya mbere Ukuboza, bagendeye ku nsanganyamatsiko baba bihaye. Uyu mwaka ukaba ufite insanganyamatsiko yo kugeza ubwandu bushya kuri Zeru hagati y’umwaka wa 2011-2015, aho ntawe uzaba agihezwa kubera ubwandu, hatanagaragara urupfu rutewe na SIDA.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO