IGIHE.com > Ubuzima
Kabaya:Abagera kuri 80% by’abarwaye amaso bafite ikibazo cy’ishaza

Kabaya:Abagera kuri 80% by’abarwaye amaso bafite ikibazo cy’ishaza


Yanditswe kuya 15-03-2013 - Saa 03:24' na Oliver Dushimiyimana T.

Mu Murenge wa Kabaya, Umuryango FHF (Fred Hollows Foundation) wahuguye urubyiruko n’abategarugori uko bakwirinda ubuhumyi ndetse n’uko basegasira ijisho, aho ndetse wagaragaje ko abarwaye amaso bagera kuri 80% bafite ikibazo cy’ishaza, ariko kngo bakaba bashobora kuvurwa.

Mubyibanzweho cyane muri aya mahugurwa kwari ukugaragaza uko ijisho rishobora kwandura ndetse n’uko umuntu yakwirinda iyangirika ryaryo. Bimwe mubyagaragajwe bitera iyangirika ry’ijisho nk’uko byatangajwe na Umuhoza Cadeau umuyobozi wa FHF, harimo ; urumuri rwinshi, kureba televiziyo igihe kirekire cyane kubana, kutarya imboga rwatsi, kubyiringira amaso, ivumbi ryinshi, gutokoza ijisho ibyo ubonye byose n’ibindi.

Nyuma yo kugaragaza ibyo, hakurikiyeho gufata ingamba z’uko harwanywa ubuhumyi n’iyangirika ry’ijisho, aho abitabiriye amahugurwa basabwe kurya ndetse no kugabura imboga rwatsi, kwirinda no kurinda abana kureba televiziyo igihe kirekire, kureba mu rumuri rwinshi, kujya kwivuriza amaso mu bavuzi ba gihanga kandi basabwe no gukora ubuvugizi kubarwayi b’amaso babakangurira kugana kwa muganga, dore ko ubu umuntu abasha no kuyivuriza k’ubwisungane mu kwivuza.

Mukarurinda Claudine w’imyaka 38, umwe mubitabiriye aya mahugurwa yadutangarije ko yishimiye cyane kuba begerejwe ubu buvuzi aho avuga ko ikimushimishije cyane kurusha ibindi ari uko umuntu abasha no kwivuriza k’ubwisungane mu kwivuza, dore ko ubusanzwe kwivuza amaso byabaga bihenze cyane. Akomeza avugako kandi agiye gukurikiza inama baherewe muri aya mahugurwa mu rwego rwo kurinda ijisho.

FHF (Fred Hollows Foundation) kuri ubu imaze imyaka itanu n’igice ikorera mu Burengerazuba, mu turere Rubavu, Nyabihu, Rutsiro na Ngororero. Uyu muryango wagaragaje ko muri utu turere hari ikibazo cy’ishaza ryo mu jisho aho 80% by’abarwaye amaso bafite ikibazo cy’ishaza ariko utanga icyizere ko bazavurwa kuko bafite abaganga b’inzobere.

Ubu umaze kuvura abantu basaga 55,000 indwara y’amaso naho abarenga 1,230 bamaze kubagwa ishaza ryo mu jisho kandi bose barakize.

Uretse kuba FHF ivura amaso, ubundi inafatanya n’ibitaro by’uturere kwigisha abaturage akamaro k’indyo yuzuye mu kwirinda indwara z’amaso n’ubuhumyi, bafasha ibitaro kubona ibikoresho, kubaka amavuriro y’amaso no gukora ubuvugizi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO