IGIHE.com > Ubuzima
Wari uziko ushobora kuganira buri wa mbere na Minisitiri w’Ubuzima ?

Wari uziko ushobora kuganira buri wa mbere na Minisitiri w’Ubuzima ?


Yanditswe kuya 10-01-2012 - Saa 15:09' na Olivier MUHIRWA

Minisitiri w’Ubuzima Agnes Binangwaho mu mpera za 2011, yatangije uburyo bwo kuganira n’abantu b’ingeri zose hirya no hino ku Isi kuri gahunda z’ubuzima.

Dore uko Minisitiri w’Ubuzima abivuga :

"Nkuko mubizi, maze igihe gito ntangije ibiganiro by’iyakure bicishwa ku murongo wa Interineti witwa Twitter kugira ngo dufashe Abanyarwanda, abakozi dukorana n’abafatanyabikorwa kungurana ibitekerezo ku bibazo biri mu rwego rw’ubuzima. Kungurana ibitekerezo kuri interineti bikorwa buri wa mbare nyuma ya saa sita incuro ebyiri mu kwezi, icyo kiganiro cyitwa “Buri wa mbere, munyarwanda, ganira na Minisitiri w’ubuzima.” (#MinisterMondays).”

Nemera ko kubona amakuru no kugira uruhare mu biganiro nyunguranabitekerezo ku bibazo by’ubuzima bw’abaturage ari uburenganzira bw’abaturage b’Isi yose, by’umwihariko niyemeje gushaka akanya ko kuganira n’Abanyarwanda.

Guha amakuru abaturage bikaba biri mu bikorwa by’ingirakamaro muri Minisiteri y’ubuzima. Ndashimira ufite isosiyete y’ikoranabuhanga mu itumanaho yitwa Nyaruka, wagendeye kuri aya mahame agakorana nanjye kuri uyu mushinga nta gihembo ategereje kugira ngo Abanyarwanda bashobore kohereza ibibazo n’ibitekerezo hakoreshejwe ubutumwa bugufi bwa telefoni muri cya kiganiro nyunguranabitekerezo.

Kubera ko itumanaho rya telefoni rigera ahantu hangana na 60% kandi batatu mu bajyanama b’ubuzima mu mudugudu bakaba bafite telefoni igendanwa, buri Munyarwanda ubyifuza ashobora kubaza ibibazo cyangwa agatanga ibitekerezo. Nyir’isosiyete y’ikoranabuhanga mu itumanaho Nyaruka yatwemereye gukoresha buri gihe iryo tumanaho ku buntu kuko iyo gahunda igamije gufungura imiryango kugira ngo abantu bungurane ibitekerezo bibafasha guteza imbere ubuzima.

Iki kiganiro “Tuganire na Minisitiri w’ubuzima buri wa mbere” kizajya gihita rimwe mu byumweru bibiri kikamara amasaha abiri, ariko isaha kizajya kiberaho ishobora guhinduka.

Kugira ngo ugere ku murongo wa twitter wajya kuri Twitter at @agnesbinagwaho. Kugira ngo wohereze ubutumwa bugufi, ushobora kubwohereza kuri telefoni nimero 0788 38 66 55 hagati ya saa cyenda na saa kumi n’imwe. Mushobora kandi kwakira ibibazo byoherejwe hakoreshejwe ubutumwa bugufi n’ibisubizo byatanzwe kuri listen.nyaruka.com.

Ndahamya ko uyu mwanya wo kungurana ibitekerezo dukoresheje umurongo wa interineti wa twitter, ari urubuga rugamije kuvugurura imitangirwe ya serivisi z’ubuvuzi hitabwa ku bitekerezo bitanzwe n’abaturage mu buryo butaziguye, kuko ari bo ibyemezo bifatwa na Minisiteri y’Ubuzima biba bigenewe. Mwisanzure mubaze mushize amanga, ndifuza ko muzitabira muri benshi ibi biganiro kandi ko bizaba ingirakamaro !"

Kuva iyi gahunda yatangira ababashije kuyikurikirana bemezako ari ingirakamaro, kuko ari urubuga rwiza rwo ku ganira kubibazo n’inama mu rwego rw’ubuzima mu Rwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO