Aho Umwami Rwabugiri yakiriye Von Götzen hagiye kuzura hoteli ya miliyoni 730 Frw

Yanditswe na Manzi Rema Jules
Kuya 14 Werurwe 2017 saa 08:08
Yasuwe :
0 0

Akarere ka Ngororero kiyemeje kubungabunga igicumbi cy’amateka y’Umwami Rwabugiri ari ku gasozi kitwa “Umukore wa Rwabugiri” ku ngoro ye yakiriyemo Umudage Von Götzen hakaba hagiye kuzura hoteli izajya icumbikira abakerarugendo, izatwara asaga miliyoni 730 z’amafaranga y’u Rwanda.

U Rwanda ni kimwe mu bihugu bifite ibyiza nyaburanga bitagaragara ahandi nk’ingagi zo mu birunga, amashyamba kimeza afite ibinyabuzima byihariye, isoko ya Nil, ubutaka butagatifu bwa Kibeho n’ibindi bikurura ba mukerarugendo bikinjiriza igihugu amadovize.

Nyuma yo kubona ko ibi bikurura ba mukerarugendo nta byo bafite, Akarere ka Ngororego kafashe icyemezo cyo kuberekeza iwabo bifashishije ubukerarugendo bushingiye ku mateka Nyabami.

Kuri ubu, ku gasozi kitwa “Umukore wa Rwabugiri” kari mu Murenge wa Kageyo, kahozeho ingoro ye n’inzuri z’inka ze hakaba hafite amateka yo kuba ariho yakiriye Umudage Von Götzen mu 1894 harimo kubakwa hotel igezweho izajya icumbikira abahasuye bashaka kumenya byinshi ku murage w’amateka yaho.

Inyubako zamaze kuzura, ubu hagiye gutunganywa ubusitani

Nk’uko Birorimana Jean Paul ushinzwe igenamigambi mu Karere ka Ngororero yabitangarije IGIHE, iyi hoteli ifite ubushobozi bwo gucumbikira nibura abantu 30, inyubako zayo zamaze kuzura zikaba zaratwaye miliyoni 530 z’amafaranga y’u Rwanda naho imirimo isigaye irimo gutunganya ubusitani no gushyiramo ibindi bikoresho nkenerwa bikaba bizatwa izindi miliyoni 200.

Ubwo Minisitiri wa Siporo n’Umuco, Uwacu Julienne yari yasuye iki gicumbi cy’amateka ku wa Gatanu w’icyumweru gishize, yasabye ubuyobozi bw’Akarere ka Ngororero kwihutisha ibikorwa byo gutegura aha hantu kandi bigakorwa neza ku buryo bizabyara umusaruro byitezweho.

Yanabasabye ko uretse kuhubaka amazu, bakwiye no gushaka uko amateka y’aka gasozi yandikwa akabikwa kugira ngo n’abazaza mu myaka ibihumbi iri imbere bazabashe kuyamenya.

Ati “Ntabwo dushobora gutera imbere nk’igihugu tutazi iyo tuva. Ni yo mpamvu abo mu kigo cy’igihugu cy’ingoro z’umurage w’u Rwanda batubwiye ku bushakashatsi bakoze ndetse tukanashima cyane umuturage wa hano watubwiye amateka nk’umuntu uhazi wahavukiye.”

“Uyu munsi bishobora kuba byoroshye kuvuga amateka kuko wenda tutaragera mu myaka myinshi cyane ku gihe yabereye ariko ni ugukora ibishoboka byose akandikwa kugira ngo n’abazaza mu myaka 1000 itaha bazayabone na bo.”

Iyi nyubako ishobora kwakirirwamo abantu 200

Umuyobozi w’Akarere ka Ngororero, Ndayambaje Godfrey yashimangiye ko intambwe ya mbere yo gusigasira amateka yo ku ‘Umukore wa Rwabugiri’ yamaze guterwa hatangira kubakwa hoteli, hakazashyirwa n’inzu ndangamurage ndetse hakaba hari n’ibindi bikorwa byo kuhamenyekanisha bitegurwa nk’amarushanwa yo kwiruka ku maguru ya ‘20 kilomètres de Mukore’ aba buri mwaka.

Ati“Nyuma hakurikiyeho igice cya kabiri cyo kubaka amacumbi aho dufite ibyumba bishobora kwakira abantu nibura nka 30 harimo n’inzu y’inama ishobora kujyamo abantu 200 ndetse tunategura ko ubusitani bukikije aya mazu nabwo bwakorwa neza.”

Mu bibazo uyu muyobozi yagejeje kuri Minisitiri Uwacu yabakoreramo ubuvugizi harimo umuhanda ungana na kirometero hafi 15 uva kuri kaburimbo uhuza Akarere ka Ngororero na Rutsiro ari na wo ugera ku ‘’Umukore wa Rwabugiri’ wangiritse cyane kubera rwiyemezamirimo wari waratsindiye isoko ryo kuwubaka yagera hagati imirimo akayita itarangiye.

Incamake y’Amateka y’Umukore wa Rwabugiri

Cyuzuzo Nkurabanyi Sylvère uturiye Umukore wa Rwabugiri ahereye ku makuru yagiye ahabwa n’abasaza bo hambere ndetse bikanemezwa n’abo mu kigo cy’igihugu cy’ingoro z’umurage w’u Rwanda, aha niho Umwami Rwabugiri yakiriye umuzungu wa mbere Von Götzen nubwo Oscar Baumann na we yari yarahageze mbere ariko agahita agenda atabonanye n’umwami.

Aha ku Umukore wa Rwabugiri hahoze hitwa Kageyo ariko kubera igiti cy’umukore Umwami Rwabugiri yahateye akajya acyugamamo izuba ndetse rimwe na rimwe kigakoreshwa mu bintu bijyanye n’imihango n’imiziririzo, hahabwa iri zina.

Ubwo Rwabugiri yari amaze gutanga, igiti cyakomeje kuhaba abantu bagitinya kuko bavugaga ko ari icy’Umwami uwagitinyuka cyamusema. Nyuma y’imyaka myinshi cyageze aho kirasaza kiruma habura n’uwagitema ngo agicane.

Nkurabanyi avuga ko nyuma haje kuza umugabo witwaga Hakizimfura Ngirabanzi atinyuka cya giti aragitema agitwikisha inkono yabumbaga nubwo abaturage bari bamubujije kugikoraho bamubwira ko ari icy’Umwami nta muntu ukwiye kugitema.

Uyu mugabo ngo yaje gufatwa n’igisebe cy’umufunzo arivuza biranga kiramuhitana ahagana mu 1976 bikaba bivugwa ko yazize gutema igiti cy’Umukore wa Rwabugiri.

Ahahoze igiti cy'Umukore cya Rwabugiri ubu hatewe ikindi kikiri gito

Kuki Umwami Rwabugiri yahisemo kwakirira Von Götzen i Kageyo?

Nkurabanyi avuga ko ubwo Umwami Rwabugiri yari amaze kumenyeshwa ko hari abazungu bifuza ko babonana, yagiye kugisha inama abiru bamubwira ibintu bine birimo ko atagomba kubakirira i Nyanza cyangwa ku yindi ngoro iri mu gihugu hagati kuko bashobora kuza barwana hakaba hameneka amaraso menshi bituma abajyana i Kageyo hari hitaruye abaturage benshi atari no hagati mu gihugu.

Ikindi, abiru bamubwiye ko umusozi wa Kageyo uri ahantu hejuru ku buryo abazungu bazaza ingabo z’Umwami zibareba, bashaka kurwana bikoroha kubarwanya kuko bazaba babonye umubare wabo n’ibyo bitwaje.

Icya gatatu i Bwami bizeraga ko kizira kikaziririzwa kwambuka umugezi wa Kibirira, akaba ari nk’umutego bateze abazungu bavuga bati ‘nibawambuka ntubakenye bagakomeza babareke.’

Indi mpamvu ni uko bizeraga ko baramutse biciye abazungu mu gihugu hagati byateza umuvumo bityo bakaba baragombaga gushaka ahandi babatsinda bitazagira ingaruka ku Rwanda.

Ngo aba bazungu bari bari kumwe n’Umudage Von Götzen bambutse Akagera tariki 2 Gicurasi 1894 bakirwa n’Igikomangoma Sharangabo tariki 12 uko kwezi i Rwamagana.

Minisitiri Uwacu Julienne yatambagijwe inyubako n'ubusitani bw'iyi hoteli
Minisitiri Uwacu yasabye ko amateka yo ku Umukore wa Rwabugiri yakwandikwa akabikwa
Umuyobozi w'Akarere ka Ngororero, Ndayambaje Godfrey yavuze ko bazakomeza kwita kuri aka gasozi kakajya gakorerwaho ubukerarugendo
Cyuzuzo Nkurabanyi Sylvère uturiye Umukore wa Rwabugiri utuye hafi y'aka gasozi yasobanuye amateka y'aho
Abasaza bo ku Umukore wa Rwabugiri bishimiye amateka agiye gusigasirwa kuri aka gasozi
Iyi ni inzu igaragaza amateka y'i Bwami bashakaga kubaka rwiyemezamirimo agenda atayirangije ariko igiye kongera kubakwa bundi bushya
Umukore wa Rwabugiri uri hejuru y'udusozi dutandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza