Igiti cy’itora i Gatsibo, ahabereye amatora ya referandumu yo mu 1961

Yanditswe na Umurerwa Emma Marie
Kuya 3 Gashyantare 2017 saa 10:59
Yasuwe :
0 0

Kimwe mu bimenyetso bigaragaza amateka yaranze itora rya mbere rya referandumu mu Rwanda ryabaye mu 1961, ni igiti cy’inturusu giteye mu Murenge wa Kiramuruzi mu Karere ka Gatsibo.

Munsi y’iki giti niho habereye amatora ya mbere mu Rwanda kuwa 25 Nzeri mu 1961, ubwo Abanyarwanda basabwaga guhitamo kuva mu ngoma ya Cyami, bakajya mu butegetsi bushingiye kuri Repubulika.

Iki giti cyiswe icy’Itora kimaze imyaka irenga 56, gifite amateka nk’uko bamwe mu baturage biganjemo abasheshe akanguhe batuye mu gace ka Diyafara mu Murenge wa Kiramuruzi aho giherereye babivuga, bifuza ko cyabungwabungwa mu buryo bwihariye kikanabyazwa umusaruro. Nta muturage uzi neza uwagiteye, ariko kandi bivugwa ko cyatewe mbere ya 1950.

Nyiridandi Michel w’imyaka 73 yatangarije IGIHE ko amatora ya referandumu yabereye munsi y’iki giti yayitabiriye. Ati "Amatora ya referandumu yo mu 1961 yabaye ndi umusore w’umugenda, abera munsi ya kiriya giti cyabaye inganzamarumbo. Cyari igiti cy’igitohagire abantu bari bayoboye amatora bari bicaye munsi yacyo hariya (ahatunga urutoki). Twifuza ko ubuyobozi bwakibungabunga kandi bakakibyaza umusaruro."

Nyiratebuka Catherine ni umukecuru uvuga ko atazi imyaka y’amavuko afite, ariko kandi ngo amatora yabereye munsi y’iki giti arayazi.

Ati "Munsi ya kiriya giti cy’inturusu niho ayo matora yabereye ndabyibuka ninaho bahereye bakita ‘igiti cy’itora’. Ubuyobozi bukwiye kureba ukuntu bakibungabunga kugira ngo kitazangirika kuko kitwibutsa uburyo ingoma ya Cyami yasezerewe hakaza Repubulika."

Igiti cyiswe icy’Itora mu byiza nyaburanga byo muri Gatsibo bizabungwabungwa

Umuyobozi w’Akarere ka Gatsibo, Gasana Richard mu kiganiro yagiranye na IGIHE, yavuze ko icyifuzo cy’abaturage ubuyobozi bukizi kandi ko hari ibyatangiye gukorwa.

Yagize ati "Igiti cy’itora ni kimwe mu byiza nyaburanga byinshi biri mu Karere ka Gatsibo twiteguye kubungabunga no kubyaza umusaruro kurushaho. Hari urutare rwa Ngarama ruri mu Murenge wa Ngarama ruriho amajanja y’imbwa z’Umwami n’ibirenge bye ahakandagiye, hari n’ibindi byinshi ntarandora dushaka kubyaza umusaruro uko bikwiye."

Uyu muyobozi yavuze ko hakozwe inyigo igaragaza aho ibyo byiza nyaburanga biherereye ndetse ngo hanakozwe ingengo y’imari ingana n’amafaranga y’u Rwanda miliyari eshatu na miliyoni 260 azakoreshwa mu gushyira ibimenyetso bigaragaza aho ibi byiza nyaburanga biherereye ku buryo ba mukerarugendo n’abandi bashaka kubisura babigeraho biboroheye.

Igiti kimaze imyaka irenga 50 kigiye kubyazwa umusaruro
Munsi y'iki giti habereye amatora ya mbere yabaye mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza