Bitarenze Nyakanga Ingoro ndangamateka irimo indaki ya Perezida Kagame izatangira gutunganywa (Amafoto)

Yanditswe na Thamimu Hakizimana
Kuya 30 Gicurasi 2017 saa 12:04
Yasuwe :
1 0

Ingoro ndangamateka yo kubohora igihugu iri ku Mulindi w’Intwari mu Karere ka Gicumbi irimo n’indaki Perezida Paul Kagame yakoreshaga ayoboye urugamba igiye gusanwa mu gusigasira amateka.

Gahunda yo gutunganya iyo ngoro yatangajwe n’Ikigo cy’igihugu cy’ingoro z’umurage w’u Rwanda mu cyumweru gishize ubwo hizihizwaga umunsi mpuzamahanga w’inzu ndangamurage ku Isi.

Kuri iyi Ngoro Ndangamateka iherereye ku Mulindi w’intwari, hagaragara amateka yaranze urugamba rwo kubohora u Rwanda, arimo inzu y’imbyumba bitatu n’indaki ebyiri Perezida Paul Kagame yakoreshaga n’inzu abayobozi bakuru ba APR babagamo, hakanagaragara ahasinyiwe amasezerano ya Arusha n’ibindi bitandukanye.

Mu ndaki zihari, imwe gusa niyo yubatswe, ikanagaragaramo intebe Perezida Kagame yicaragaho. N’indi ye kimwe n’iy’abanyapoltiki nazo zigiye gutunganywa.

Umuyobozi mukuru w’Ikigo cy’Igihugi cy’Ingoro z’umurage w’u Rwanda, Ambasaderi Masozera Robert, yatangarije IGIHE ko igikorwa cyo gusana iyi ngoro kizahera ku ndaki Perezida Paul Kagame yakoreshaga n’inzu abayobozi bakuru ba APR babagamo.

Yagize ati “Tugiye kuyisana ariko tuzahera ku byihutirwa cyane cyane kuri ziriya ndaki Perezida Paul Kagame yakoreshaga na ziriya nzu Kanyarengwe na Kabarebe babagamo kuko zimaze gusaza cyane uretse ko zizasanwa hadahinduwe umwimerere wayo.”

Yakomeje avuga ko iki gikorwa kizatangira muri Nyakanga 2017 kikarangira muri Kamena 2018.

Ati “Twavuga ko kizamara umwaka w’ingengo y’imari ndetse nitukirangiza tuzatangira kubaka indi nzu abantu bazajya babanza kwakirirwamo, tunatunganye uriya muhanda duhereye kuri kaburimbo kugira ngo tubungabunge amateka arimo.”

Yanavuze ko mu rwego rwo korohereza abaza kuhasura, Ikigo cy’Igihugu cy’Ingoro z’umurage w’u Rwanda kigiye gushyiraho uburyo umuntu azajya agura itike imwe ikamuhesha gusura Ingoro Ndangamateka zirindwi ziri mu gihugu n’indi iri kubakwa mu Nteko Ishinga Amategeko.

Indaki Perezida Kagame yahuriragamo n'abayobozi bakuru b'Ingabo zari iza APR
Imiterere y'indake ya Perezida Kagame yatunganyijwe
Imiterere y'aho indake ya Perezida Kagame iherereye
Imiterere y'inzu y'ibyumba bitatu PerezidaKagame yararagamo
Indaki ya Kabiri bivugwa ko Perezida Kagame yakoreshaga ku Mulindi ikaba nayo igiye gutunganywa
Inzu yasinyiwemo amasezerano ya Arusha
Kimwe mu Cyumba gikekwa ko Perezida Kagame ari cyo yararagamo ku Mulindi w'Intwari ariko akaba ntacyo arabivugaho
Ikibuga cya Basketball cyakoreshwaga n'abari ku Mulindi
Aho Perezida Paul Kagame yakiniraga Tenis ubwo akiri ku Mulindi mu rugamba rwo kubohora igihugu
Inzu Minisitiri w'Ingabo z'u Rwanda, Gen James Kabarebe yabayemo ku Mulindi
Bimwe mu birango biri ku Musozi w'intwari wo ku Mulindi wa Byumba wahindutse Umulindi w'Intwari
Inzu Kanyarengwe yabagamo
Aho abagore b'abayobozi bakuru ba APR babaga
Inzu Minisitiri w'Ingabo z'u Rwanda, Gen James Kabarebe yabayemo ku Mulindi
Indake abanyapolitiki ba FPR Inkotanyi bakoreshaga
Aho ikipe y'umupira w'amaguru ya APR FC yavukiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza