Inkomoko y’insigamigani “Bamugize ibya Mfurambi”

Yanditswe na IGIHE
Kuya 10 Ugushyingo 2017 saa 01:37
Yasuwe :
0 0

Uyu mugani bawuca iyo bafashe uwibye cyangwa yagize ikindi gihemu gikabije,bigatuma bamuhanisha urugaraguro, nibwo bavuga ngo “Bamugize ibya Mfurambi!” . Wakomotse kuri Rumashana rwa Segitomba w’i Rubona rwa Ngunda(Butare),ahasaga umwaka wa 1700.

Ku ngoma ya Kigeli Ndabarasa, hariho umugabo Rumashana rwa Segitomba,agatura i Rubona rwa Ngunda ho mu Busanza bw’epfo. Bukeye Ndabarasa amugabira inka zitwa Amahame. Arazitunga, arazorora ziragwira, rubanda baramushima.

Bigeze aho ajya kuzimurikira Ndabarasa azimurika zifite inyana z’imishishe bituma Ndabarasa amushima, amwongera izindi zitwa Imisugi, Rumashana arakira aratunganirwa.

Muri ubwo bworozi bwe ariko yari afitemo n’ingeso yo gukunda inyama. Akajya abagisha ibimasa n’amagumba. Ageze aho abwira abasongozi be kumubagira inyana y’umushishe.

Barayibaga, inyama zayo barazikaza (kuzotsa) baramuzanira, Rumashana asanga ziruta izo yajyaga arya mbere. Kuva ubwo abyohokamo, inyama zindi azita kure; akajya abagisha imishishe misa misa; bamuzanira inyama zitari iz’imishishe akazanga.

Inkuru yo kurya imishishe imenyekana mu bo baturanye, ndetse isakara u Busanza bwose. Abanzi be bamubona urwaho bajya kumurega kuri Ndabarasa ko yamaze inyana z’Amahame n’iz’Imisugi. Ndabarasa amutumaho ngo yimure inka aze kuzimumurikira.

Rumashana arazimura azishyira Ndabarasa. Zitungutse ku karubanda zihatungukana inyana z’imishishe zitagira uko zisa; rubanda barahurura bajya kureba.

Inka zijya mu rugo ziramurikwa. Ndabarasa abonye za nyana ashima Rumashana, abona ko yarezwe ibinyoma, aho kumuhana aramugororera arataha.

Ageze iwe ntiyareka ya ngeso agumya kwibagira imishishe. Izo nka zari nyinshi nubwo abasongozi ba Rumashana babagaga inyana zazo ubutitsa, nta wamenya ko hari n’imwe yavuyemo ari mu Mahame, ari mu Misugi.

Haciyeho iminsi Ndabarasa aratanga, hima umuhungu we Sentabyo. Abatware baramurabukira. Rumashana arabuka inka y’inyamibwa yonsa impanga z’imishishe. Mibambwe Sentabyo arayishima. Abari aho batangarira izo nyana zayo.

Ubwo Rumashana aratona no kuri Sentabyo, ndetse aramukunda kurusha se. Abanzi ba Rumashana babonye ko Mibambwe amukunze kurusha se, bava hasi n’imizi baramurega ariko biba iby’ubusa, Mibambwe ntiyabyitaho.

Bukeye bacura inama yo kujya kwinginga muka Mibambwe witwaga Mukarugaz, bamuhakwaho cyane kugira ngo azabaregere Rumashana bifate.

Mukarugaza amaze kubyemera yihererana Mibambwe ati “ ibintu byawe biragushirana ureba!” “Burya bwose Rumashana yamaze inyana z’Amahame n’Imisugi azibaga kandi ntaho biraba! ”

Mibambwe ahamagaza abarezi ba Rumashana, ababaza ibimenyetso byatuma Rumashana afatanwa icyo gicumuro. Baramusubiza bati “Nyagasani tubikubwiye wagira ngo ni amagambo ya cyanzi. Shaka abantu b’inkoramutima tujyane tuzabibereke!”

Mibambwe ashaka abantu bakuru b’inyangamugayo arabatuma ati “Nimujyane n’aba barezi ba Rumashana, mungenzurire ko yamariye inyana koko”.

Baragenda, bageze kwa Rumashana babanza kubaririza ibyo akora; babaza abantu bo mu Bihana ariko rwihishwa. Bamaze kumenya ko Rumashana nta kindi agikoza mu munwa uretse inyama z’inyana z’imishishe, ingenza zirahindukira zitekerereza Mibambwe uko bagiye n’uko babibajije; bati “Abantu bose barabihamya!”

Ubwo Mibambwe yohereza abafata Rumashana, bakamusaka, bamusangana inyama bakamuzana azikoreye.

Nuko Rumashana araterwa baramusaka koko bamusangana inyama z’inyana z’imishishe n’impu zazo. Abantu barahurura bajya kureba umutware wariye inyana baratangara kuko cyari igihemu kibi.

Rumashana aratangwa yicwa urubozo, anyagwa n’izina rye bamwita “Mfurambi” ku bw’ubuhemu bwe bwamaze inyana z’Amahame n’Imisugi.

Kuva ubwo abantu babona uwafashwe yibye cyangwa yagize ikindi gihemu agafatwa agakubitwa, akabohwa, bakavuga bati “Bamugize ibya Mfurambi!” Bashobora no kuvuga ngo “Bamugiriye ibya Mfurambi”; ubwo baba bazirikana ibyo Rumashana rwa Segitomba yagiriwe amaze gushinjwa inyana z’Amahame n’Imisugi.

Kugirirwa ibya Mfurambi bivuga kwicwa urugaraguro naho kugira ibya Mfurambi bigasobanura guhemuka cyane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza