Inkomoko y’Insigamugani “Zahiye no mu Kajyo”

Yanditswe na Nsanzabera Jean de Dieu
Kuya 1 Gicurasi 2019 saa 09:09
Yasuwe :
0 0

Uyu mugani umuntu awuca iyo ashaka gucubya abandi umururumba w’inzoga; ni bwo agira, ati “nimuhumure zahiye no ku kajyo!” Wakomotse ku mukecuru wo mu i Ceni rya Bungwe mu Bwanamukali (Butare); ahasaga umwaka w’i 1600.

Uwo mukecuru yari muka Rurangwa, agatura mu i Ceni rya Bungwe, inyuma y’Ibisi bya Huye.

Rurangwa yabaye umukire cyane, ari umutware w’u Bungwe ku ngoma ya Yuhi Mazimpaka. Bukeye aranyagwa, u Bungwe bugabanwa na Nyarwaya rwa Yuhi. Rurangwa ubunyazwe bimuhindura umukene cyane, agira igisuzuguriro muri ako karere, kugeza ubwo yishwe n’uruhato rw’ubworo.

Amaze gupfa umugore we asigara mu bana arabinarira abacira inshuro barakura. Bamaze kwicuma biga guhinga no kwagika imizinga y’inzuki. Bigeze aho, umwe muri bo wari mukuru wabo, ajya gukeza mwene Nyarwaya; nyina yari amaze kuba umukecuru cyane; uyu bita “urujyo”.

Uwo muhungu agira ubuhange buhire agabana inka, ayizaniye nyina gucyura umunyafu, asanga barumuna be bafite imyaka myinshi n’amuki.

Inka bamaze kuyishima, bajya inama yo kujya gukura ubwatsi. Benga amarwa barayaturira; umunsi inzoga zahiye uhurirana n’andi mayoga menshi yahiye kuri uwo murenge. Abatumirana baratumirana; hirya no hino baranywa barizihirwa baridagadura, bigeza ubwo bavuga, bati “Uyu mwaka watubereye muhire kuko noneho inzoga zisigaye zishya ino ni urusisi” Bati “Yewe, zahiye bigeza no ku Kajyo ko hepfo hano kwa Rurangwa umva ko bavuga.”

Ubwo babivugaga batyo ku mpamvu y’agasuzuguro ko gushyondeka uwo mukecuru muka Rurangwa bamwita akajyo, kuko yari umukecuru rukukuri.

Zahiye no ku kajyo rero si akajyo k’ikibindi cyamenetse uko bamwe babikeka; ni ukuvuga ngo zahiye ari nyinshi ku buryo n’agakecuru rukukuri bita “akajyo” na ko kazihishije, iwako hakaba umunezero bitakekwaga.

Ni aho uyu mugani wakomotse, bakawuca bashaka kumvisha ko ibintu ari byinshi.

Akajyo - Umukecuru rukukuri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza