Inkomoko y’inyito Nyabugogo( Igice cya Mbere)

Yanditswe na Nsanzabera Jean de Dieu
Kuya 17 Gicurasi 2019 saa 04:38
Yasuwe :
0 0

Ibintu byinshi birimo imisozi, imigezi, inzuzi, ibishanga n’ibindi, byagiye byitwa amazina uruhongongohongo bikuye ku birari by’iturwa n’iyubakwa ry’igihugu n’ibikorwa byakozwe bigasiga umugani, cyangwa se imiziro, imigenzo n’imihango y’ibihe byose.

Tugiye kubatekerereza imvano y’inyito y’umugezi wa Nyabugogo wisuka mu ruzi rwa Nyabarongo, wabaye imvano y’inyito y’Utugali n’imidugudu myinshi mu Rwanda.

Umutekereza w’amateka y’u Rwanda akaba n’umusizi Nsanzabera Jean de Dieu, yagize icyo adutekerereza ku nkomoko y’izina ry’umugezi wa Nyabugogo, mu gitabo cye yise “ Intwari z’Imbanza, zubatse u Rwanda ruhagamya igitinyiro”n’ikindi kitwa “Ibirari by’amateka, inkomoko y’inyito y’ahantu”.

Izina Nyabugogo rikomoka ku misezero y’abami b’u Rwanda, bambukaga uwo mugezi ukuka mu Kiyaga cya Muhazi, bakajya kubatabariza mu Murenge wa Rutare mu Karere ka Gicumbi kuri ubu.

Abasiganuzi b’amateka bagaragaza ko mu ntango umugezi wa Nyabugogo witwaga “ Nyamigogo”.

Nyabugogo byavuye ku mvugo yo gushyoma, agasuzuguro no gupfobya yagiye ikomoka ku mahari ibihugu by’ibituranyi by’u Rwanda rugari rwa Gasabo, byagiye bigira mu bihe byo kubyigarurira.

Nk’uko tubimenyereye mu Ikeshamvugo ry’Ikinyarwanda, umugogo bivuga “Umurambo w’umwami” bikaba bigaragaza ko uwo mugezi witiriwe Imigogo y’abami b’u Rwanda yahambutswaga bagiye kuyitabariza i Rutare mu Buganza bwa Ruguru. Mbere y’uko bambuka uwo mugezi, babanzaga kuhakorera imihango ibanzizira kuwambuka bajya gutabariza umwami.

Imwe mu mihango bahakoreraga irimo no kuvoma amazi muri uwo mugezi, bakayavanga n’ingwa y’inono n’amazi y’ubuhoro, bagakozamo icyuhagiro, barangiza bakayatera ku mugogo w’umwami watanze, ayandi bakayiyuhagira, bakabona kwambuka bajya kuwutabariza mu misezero yagenewe abami b’u Rwanda aho i Rutare.

Impamvu nyamukuru yatumaga bakora uwo muhango wo gutera icyuhagiro umugogo w’umwami watanze, yari ugukumira ibiza n’imyuzure bikomoka ku migezi n’ibiyaga biri mu Rwanda. Uwo muhango kandi wahamyaga imitsindo ku banyarwanda, ko umuntu wese uzagwa mu ruzi cyangwa se mu mugezi atazarohama cyangwa se ngo yicwe nayo.

Icyatumaga abagiye gutabariza umwami biyuhagirira muri uwo mugezi, ni uko nabo bashakaga kwambuka binjira mu misezero y’abami b’u Rwanda bera, basa neza, nta mwanda bafite.

Umwami Kigeli Mukobanya, watwaye u Rwanda ahasaga mu wa 1378 kugeza mu wa 1411, ni we wabaye umwami wa mbere uzwi watabarijwe i Rutare ukurikije uruhererekane ry’abami batwaye u Rwanda, niwe waciye iteka rishyiraho ahantu mwihariko hagenewe imisezero y’abami b’u Rwanda.

Yabitewe n’uko abami bamubanjirije, bari bafite imisezero inyanyagiye hirya no hino mu gihugu, ku buryo wabonaga bibangamye .

Icyatumye Mukobanya asaba ubutaka bwo gushyinguramo abami b’u Rwanda mu Burasirazuba bwarwo, nabwo bwari uburyo bwo kubungabunga amateka y’u Rwanda agaragaza aho baturutse baza guhanga ingoma y’i Gasabo.

Twibuke ko banyuze mu bihugu by’i Burasirazuba, barabyambuka baza guhanga ibihugu byabo hakuno ya Muhazi. Amazi magari bambutse baza guhanga igihugu, bagombaga no kuyambuka bagisezeramo. Niko kurambagiza ubutaka bwegeranye neza n’i Gasabo, ahitamo mu Murenge wa Rutare mu ngoma y’u Buganza.

Muri ibyo bihe, Mukobanya yaciye iteka ko ubutaka bwose buri hakurya y’uwo mugezi, bugomba kuba indeka y’ingoma y’u Rwanda, ikaba umwihariko w’imisezero y’abami bayo.

Yongeyeho ko niba hari abaturage bahatuye batarimurwa, cyangwa abahaturiye n’abashobora kuhanyura bagiye mu miryango yabo ariko bambutse uwo mugezi, bagomba kubanza kuwiyuhagiriramo cyangwa se bakiraba ku gahanga bakoresheje icyuhagiro, bakabona kuwambuka.

Ibyo byaterwaga n’igenantekerezo ry’Abanyarwanda, ko ahari imisezero y’abami hagomba kurindwa ubwandure. Uhanyuze wese agomba kwizirura akabwinjiramo yeze.

Kuva iryo teka ryacibwa, mu kwezi kwa Kamena kwa buri mwaka, Abiru b’ibanga ry’ingoma bafataga amazi y’ubuhoro yavomwaga mu mariba ya Rwezangoro mu Bwanacyambwe, bagafata n’ingwa y’inono (Ifu y’ingwa yera de) bakaza kuhakorera imihango yo kuzirura uwo mugezi n’ igihugu, kugira ngo umwaka ukurikiyeho abaturage bazahanyura bakahakarabira, bazabe baziruwe nk’uko ayo mazi aziruwe.

Mu gice gikurikiraho, tuzakomerezaho tubatekerereza iby’amateka y’umugezi wa Nyamigogo waje guhindurirwa izina ukitwa Nyabugogo, kugeza magingo aya ubwo aya mateka yandikwaga.

Umugezi wa Nyabugogo ni wo wabaye inkomoko y'izina ry'agace kitwa gutyo mu mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza