Iya 19 Mata 1994: Abasirikare ba ESO bishe abaganga n’abarwayi muri CHUB

Yanditswe na Ndayishimye Jean Claude
Kuya 19 Mata 2018 saa 08:04
Yasuwe :
0 0

Nyuma y’uruzinduko Perezida Sindikubwabo yagiriye muri Kaminuza Nkuru y’u Rwanda, asura Ishami ry’Ubuganga, ni bwo Jenoside yakajije umurego.

Abasirikare bo mu kigo cya ESSO n’Interahamwe, bishe mu buryo bw’indengakamere abaganga, abarwayi, abarwaza n’abandi Batutsi bari bahungiye ku Bitaro bya Kaminuza (CHUB).

Nk’uko tubikesha CNLG, icyo gihe kandi ni bwo kuri Hotel Faucon muri Butare, habaye ahantu ha mbere hashinzwe bariyeri mu Mujyi wa Butare, yicirwaho Prof. Karenzi wari umwarimu muri Kaminuza Nkuru y’u Rwanda.

Jenoside yatangiye muri Butare nyuma y’ijambo Perezida Sindikubwabo yavugiye muri ako gace, yihanangiriza Abahutu banze kwica Abatutsi, ko na bo baza kwicwa.

Uwo munsi abayobozi, abarimu ba kaminuza, abanyeshuri ndetse n’izindi njijuke z’Abatutsi bibasiwe na Jenoside.

Muri Komine Taba yayoborwaga na Jean Paul Akayesu, wabaye uwa mbere wahamwe n’icyaha cya Jenoside yakorewe Abatutsi mu Rwanda, hari higanje amashyaka nka MDR, MRND na PSD. Jenoside yabanjirijwe n’amakimbirane hagati ya MDR na MRND, icyo gihe ibikorwa by’iterabwoba byakorwaga ku manywa y’ihangu.

Interahamwe zitangira kwitoza zateraga amagerenade muri Nyabarongo zirushanwa kumasha imvubu. Nyuma y’inama Sindikubwabo aherekejwe na Kambanda bagiranye na ba Burugumesitiri bose b’amakomini yari agize Perefegitura ya Gitarama, ba burugumesitiri muri iryo joro, na bo bakoresheje inama iwabo bashishikariza abaturage kwica Abatutsi.

Burugumestri Akayesu yakoresheje inama i Rukoma yahejemo uwitwa Umututsi wese, ntibyatinze bwakeye Abatutsi bicwa ku itariki ya 19 Mata 1994. Muri Taba Jenoside yayobowe na Burugumesitiri Akayesu Jean Paul, Kubwimana Silas, Interahamwe z’i Gihinga.

Izi nterahamwe ni na zo zishe Abatutsi bari bahungiye kuri Centre de Santé ya Kigese, zica abahungiraga i Kabgayi, ni na zo zishe abaguye i Kiyumba no ku Mugina.

Mu bandi bicanyi ba ruharwa, harimo Munyandamutsa bitaga Rutuku wari umubazi w’amatungo na Gisimba Daniel wigishiga i Gihinga.

Abanyakamonyi ntibazibagirwa impunzi za Nyacyonga zari zikambitse ku musozi wa Nyamugari no kuri Centre ku Kamonyi bagize uruhare mu kwica Abatutsi bahasanze.

Izo mpunzi ni nazo zishe Ababikira 12 bari bavuye i Kigali ku Mushumba Mwiza, biciwe muri Serile ya Shenga yayoborwaga na Karekezi Innocent.

Kamonyi kandi yari yuzuyemo Interahamwe zagiye zimuka ziva mu duce Inkotanyi zimaze gufata, Jenoside yahagaze ku Kamonyi ku itariki ya 4 Nyakanga 1994, abantu bahiciwe bamaze kumenyekana ni 47,278.
Kuri iyi tariki kandi, Abatutsi barenga 7,600 bari bahungiye ku mashuri yo ku Kiliziya ya Kansi kuko Padiri Walgorisky wo mu muryango w’abapadiri b’Abapaloti (Peres Pallotins), yabangiye gufungura kiliziya ngo bahungiremo, ababwira ko Imana na Leta babatanze; barishwe, nyuma yuko Interahamwe zikwirakwije igihuha ko Koloneli Augustin Ndindiliyimana ukomoka i Kansi, akaba n’umugaba mukuru wa Jandarumori ko yishwe n’Ingabo za FPR Inkotanyi.

Uwo munsi bamaze kwica abo Batutsi bose, Padiri Walgorisky yasabye abaturage n’Interahamwe ko bacukura ibyobo rusange bagatabamo iyo mirambo maze abahemba ibyo kurya.

Abatutsi bari bahungiye kuri Komini Muko, iherereye mu karere ka Nyamagabe, Interahamwe zarabateye, zica abagabo n’abasore gusa, abagore n’abana zibabwira ko bo zizagaruka kubica ikindi gihe.

Ingabo z’Umuryango w’abibumbye mu Rwanda UNAMIR zatangaje ko abantu 45 bishwe n’aho 114 barakomereka nyuma y’uko ingabo za Leta zirashe abahungiye muri Stade Amahoro i Remera.

• Abatutsi bari bahungiye kuri Paruwasi ya Musebeya, ubu ibarizwa mu karere ka Nyaruguru, barishwe bose.

• Abatutsi biciwe mu Nkomero ku Kanyaru, ubu habarizwa mu karere ka Nyaruguru.

• Hishwe Abatutsi bo muri Nzahaha mu Kagali ka Nyenji

• Hishwe abatutsi b’ i Gatsibo muri Nkanka (Cyangugu) bicirwa kuri Paruwasi Gatulika ya Nkanka

• Hishwe Abatutsi b’i Gikundamvura (Kizura)

• Hishwe Abatutsi b’i Rangiro muri Nyamasheke bicirwa mu ngo zabo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza