Mukankusi yagaburiye abana be amahurunguru, banabamwicira mu maso muri Jenoside

Yanditswe na Tombola Felicie
Kuya 13 Mata 2017 saa 03:28
Yasuwe :
0 0

Mukankusi Grace warokotse Jenoside yakorewe Abatutsi muri Mata 1994 yagarutse ku nzira y’umusaraba yanyuzemo muri Jenoside byatumye afata icyemezo cyo kugaburira abana amahurunguru y’ihene, ariko bakaza no kubamwicira mu maso.

Uyu mubyeyi uvuka mu Majyepfo y’igihugu ahahoze hitwa Gikongoro, yabigarutseho mu buhamya yatanze ku Itorero ry’Abadiventiste b’Umunsi wa Karindwi basengera ku rusengero rwa Kigali Bilingual Church i Remera tariki ya 8 Mata 2017, ubwo iri torero ryari mu gikorwa cyo kwibuka ku nshuro ya 23 Jenoside yakorewe Abatutsi mu 1994, bunatambuka kuri Radio Ijwi ry’Ibyiringiro.

Imbere y’imbaga y’abakirisitu, Mukankusi yashimye Imana avuga ko nawe atazi uburyo yarokotse bitewe n’ibihe bikomeye yanyuzemo, agaragaza ubunyamaswa bwaranze Interahamwe zica n’abana.

Mukankusi niwe warokotse mu muryango mugari yari yarashatsemo uvukamo abantu icyenda kandi bari bubatse bafite abagore n’abana benshi.

Urugendo rwa Mukankusi muri Jenoside

Mukankusi avuga ko ubwo Jenoside yabaga mu 1994 yari afite umugabo n’abana batatu harimo n’uwo yonsaga. Icyo gihe bari batuye hafi y’Umujyi wa Gikongoro.

Ubwo hari ku Cyumweru nyuma y’ihanuka ry’indege ya Habyarimana wari Perezida, ngo aho yasengeraga bababwiye ko Satani yamanutse kandi ko hari ubwoko buhigwa gusa ngo babasabye ko uwo bari bushake kwica atagomba kubarwanya ahubwo akwiriye gutega umusaya bagakora ibyabo kuko araba yiyambukiye Yorodani.

Ntibyatinze kuko mu ijoro ryakurikiyeho abagabo bose bo mu muryango wabo baje bakabajyana bababeshya ko bagiye ku irondo ariko akaba ari nta numwe wagarutse.

Ati “Ubwo nari mvuye kubaza abandi bagore niba abagabo babo batashye, nicaye ku muryango ntangira konsa umwana ako kanya igitero cyaraje, bahita binjira mu iduka, najye nyura mu cyanzu ntangira kwihisha.”

Yihishe ku muturanyi we yari asanzwe agirira neza, ndetse niwe wanamuzaniye abana be babiri bari barimo gukina ubwo yacikaga igitero cyari kije iwe.

Ati “ Yaduhishe munsi y’urutara, aho bazirikaga ihene, njyewe n’abana banjye twarahabaye ariko ntiyatugaburiraga, nageze aho abana banjye nkajya mbaha amahunguru y’ihene ngo byibura bagire ngo ni ibishyimbo. Icyo kintu gihora kingarukamo, amahurunguru nayaherezaga umwana akayacira ariko abana ntibarize ntibatatse.”

Avuga ko bitewe n’uko aho bari bihishe umugabo waho yari mu nterahamwe ngo byatumaga atarenganya uwo mugore kuko wenda yabaga yabuze uko agira.

Baje kuhirukanwa

Ati “Umugabo wo muri urwo rugo rimwe atahutse yavuze ko ucumbikiye Abatutsi azicanwa nabo, wa mugore yacunze umugabo adahari aratubwira ati mujyende ataza kubica. Naraye mu masaka n’abana banjye iminsi itari mike, rimwe umugore araza arambona ajya kuduhururiza.”

Nyuma yo guhururizwa, bahise biruka umwana umwe aramukurikira, undi anyura indi nzira agwa mu gitero bahita bamwica.

Ati “ Abandi twarakomeje turajyana tugeze mu ishyamba umwana umwe mukuru witwaga Emmanuel bamukubise igiti kirimo imisumari ahita apfa .Uwo nonsaga baramunyambuye nawe baca igiti gito, barakimukubita arapfa. Bahise bacukura akantu gatoya babashyiramo. Narababwiye ngo nanjye nimunyice baranga, abandi bagiye kunyica hari umugore wanze ko bamunyicira mu maso kandi atwite maze anjyana iwe.”

Nubwo babishe areba, yaraye adasinziriye bucya asubirayo kureba koko niba abana be bapfuye. Asanze bapfuye ahita aba nk’umurwayi wo mu mutwe, atangira kugenda asaba nawe uwamwica.

Ati “Nahuraga n’Interahamwe meze nk’umusazi, nkababwira nti nimunyice. Abantu nabonaga bahungira ku Gikongoro, njyewe nkabwira interahamwe nti nimunyice, bakanga, nashatse urupfu ndarubura.”

Hari uwo nabwiye ngo anyice ati “ Nishe i Simbi, nica i Karama, nishe n’impinja ariko wowe sinkwica uzapfa nabi, mbura numwe unyica.”

Yararanye n’inzoka ntiyamurya

Mukankusi ngo yageze ubwo yihisha ahantu mu gishanga mu miseke kandi yari aziko haba inzoka y’inkazi ariko ntiyamurya.

Ati “Nari nziko haba inzoka y’impiri ariko numvaga ntacyo bimbwiye, rimwe rero ari nijoro hariho ukwezi mbona ikintu iruhande rwanjye kirizingura, cyari iruhande rw’umunyinya nabaga negamyeho maze kirasama, nigira hirya gato ndagihunga.”

Yagiye Uganda ahunga gukomeza kwitwa Umututsi

Avuga ko gukomeza gushaka kumva icyatuma ataba Umututsi, hari umuntu wamujyanye Uganda akamubeshya kuzamugeza no muri Canada kuko yumvaga yajya ahantu atazigera amenyekana ko ari uwo muri ubwo bwoko bwahigwaga.

Avuga ko uwamujyanye yanagerageje kumucuruza ngo ajye yinjiza amafaranga babeho ariko Mukankusi akamutsembera.

Ati “Uwo twabanaga yarambwiye ati ’uri umugore mwiza kandi uracyari muto, none ikigiye gukurikiraho ndashaka ko wajya ujya gukorera amafaranga, ukararana n’abanyamahanga. Ijoro rimwe uzajya uhabwa imitwaro 150 (amafaranga yakoreshwaga muri Uganda). Naramutsembeye mvuga ko nashatse ndi muto kandi ko nta wundi muntu nigeze ndyamana nawe uretse umugabo wanjye, ahita anyirukana.”

Yagerageje kwiyahura

Mukankusi avuga ko inkweto zamusaziyeho ariko ntiyananirwa, akajya arara agenda bukamukeraho. Umunsi umwe yigiriye inama yo kujya ku Kiyaga cya Victoria ku mupaka wa Uganda na Sudani, ashaka kwiyahura.

Ati “Intara zose zo muri Uganda narazigenze, nageze ku Kiyaga cya Victoria ngiye kwiyahura, igihe nari mpumirije nshaka kwinagamo, numvise ijwi riri mu muyaga rivuga ngo nzakugirira neza. Nahise ngira ubwoba ngenda nsubira inyuma, sinakwiyahura.”

“ Uko kuzerera kose, ni ingaruka za Jenoside yakorewe Abatutsi mbishinja, niyo yatumye mpinduka inzererezi nari umubyeyi wari ufite urugo.”

Nubwo yanyuze muri iyo nzira y’umusaraba, ashimira Imana ko ubuzima bukomeje mu gihugu gitekanye.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza