Ubuhamya bwa Padiri Mvukiyehe, Intwari y’Imena yarokokeye mu ishuri ry’i Nyange

Yanditswe na Rabbi Malo Umucunguzi
Kuya 2 Gashyantare 2017 saa 07:45
Yasuwe : XX
0

Padiri Jean Baptiste Mvukiyehe yari umwe mu bigaga mu ishuri ryisumbuye ry’i Nyange, riherereye mu Karere ka Ngororero mu Ntara y’Iburengerazuba, ryagabweho igitero n’abacengezi mu ijoro ryo kuwa 18 rishyira 19 Werurwe 1997.

Mvukiyehe ubu ni Padiri Mukuru wa Paruwasi ya Kabuga, mu gihe igitero cyabaga akaba yarigaga mu mwaka wa gatanu, ari n’umuyobozi wungirije w’abanyeshuri cyangwa ‘Vice Doyen’.

Mu kiganiro na RBA, Padiri Mvukiyehe avuga ko mu 1997 ubwo hari hashize imyaka itatu gusa Jenoside yakorewe abatutsi irangiye, ibice bimwe by’igihugu byari bicyiganjemo abahoze ari abasirikare mu ngabo zatsinzwe n’Interahamwe bari batarava ku izima.

Ati “Uretse n’icyo kigo cyari giherereye ahahoze ari muri Perefegitura ya Kibuye, kariya gace kose k’Amajyaruguru ndetse n’uburengerazuba karanzwe muri iyo myaka yose n’umutekano mucye cyane. Bashoboraga gutwika imodoka, ndetse hari n’andi mashuri yagiye agabwaho ibitero nka za Muramba.”

Hashize imyaka 20, ariko ngo uwo munsi arawibuka neza ku buryo bisa n’aho byabaye ejo hashize.

Ati “Icyo gihe hari ku mugoroba turimo gusubira mu masomo nk’uko bisanzwe bikorwa, nibwo twabanje kumva amasasu arimo ndetse n’aremereye, byumvikana ko bari bateye icyo kigo bafite imbunda zisanzwe ariko bagomba kuba bari bafite n’ibindi bisasu.”

“Batangiriye mu mwaka wa Gatandatu, njye nari mu wa Gatanu, amashuri nubwo yari yegeranye hari haciyemo intera ngufi. Amasasu yaje kuba menshi. Binjiye mu ishuri rero batangira gusaba ko abatutsi bajya ku ruhande rumwe n’Abahutu bakajya ku rundi.”

“Ibyo bari bamaze kubikora mu rindi shuri ryo mu wa Gatandatu, ntabwo twari tubizi birumvikana. Ariko ntacyo twakoze mu byo basabaga. Babiri nibo bari binjiye, abandi basigara hanze. Umwe yari yitwaje imbunda ya Kalashnikov, undi umuherekeje yari afite intwaro gakondo zirimo icyuma kimeze nk’inkota n’ubuhiri.”

Icyo gihe ngo abanyeshuri banze kwitandukanye bavuga ko bose ari Abanyarwanda, umwe mu bacengezi aragenda yegera umwe witwaga Séraphine Mukarutwaza, yavugaga ko yamubonye igihe cy’amanywa.

Padiri Mvukiyehe yakomeje agira ati “kandi koko Séraphine yari yasuwe n’umwe mu bo mu muryango wabo, niwe bahereyeho mu ishuri ryacu barasa. Bamurashe mu mutwe, yahise apfa.”

“Bongeye gusubiramo babaza, ariko ubwo twari twamaze kwinjira munsi y’intebe tugerageza guhunga, nibwo uwari winjiye afite imbunda yapfukamye atangira kurasa abanyeshuri nta kindi arebeyeho. Ariko abonye nabyo ntacyo bifashije, niko gusaba ko duhaguruka, tugasohoka we akitoranyiriza.”

Abanyeshuri bari bagihumeka ngo basohokeye icyarimwe bose banyuze mu muryango kuko ariho hashobokaga, ariko mu gusohoka baraswaga amasasu y’urufaya, abandi bahura na grenade.

Nubwo Mvukiyehe we atakomeretse cyane, yamaze amezi agera kuri abiri mu bitaro, aza guhinduka umwe mu Ntwari z’Imena 40 zarwanye urugamba rw’i Nyange.

Igitekerezo cyo kutitandukanya cyavuye he?

Padiri Mvukiyehe avuga ko nubwo ari imyaka itatu yari ishize gusa Jenoside yakorewe abatutsi irangiye, bari barabonye icyo kwitandukanya bisobanura cyane ko imwe mu mirambo y’abavandimwe babo yari ikiri ahantu hose.

Ati “Mu yandi magambo gusenywa n’ubugome cyangwa no kwitandukanya twari tubizi. Nk’umuntu wari ukimara kuva mu ntambara yo kurwana n’ibikomere biri mu mutima, ukibuka abavandimwe, ukareba inshuti wakundaga zitari zikiriho kandi zitazize urw’ikirago, nibwira ko byari byoroshye ahubwo kumva neza icyo ubuzima bwa mugenzi wawe busobanuye.”

Gusa ngo mu rwego rw’uburezi n’uburere, iryo shuri ry’i Nyange ryari ryaragize ubuyobozi bwareze abana bose kimwe “ikintu cy’ubwoko cyaragiye gitakaza imbaraga, hagasigara ubuvandimwe twari dusangiye.”

Urubyiruko rukwiye kugira umuco w’ubutwari

Padiri Mvukiyehe avuga ko ari ngombwa kugira umuco wo guhora wiremamo ikintu cyiza, kugira ngo n’igihe utunguwe utazaba umuntu ujijinganya hagati yo kuba mu bigwari no kuba mu ntwari.

Ati “Ubutwari ntabwo ari ugutabara aho rukomeye gusa, ni no kumenya kuba umuntu ugamije gukora ibikorwa by’indashyikirwa, kandi ukaba wanabishishikariza n’abandi.”

“Ni uguharanira kumenya icyiza no kugiharanira muri byose. Kuko mbere na mbere burya nk’aba basirikare bakuru dufite bagiye baba intwari, ntabwo umuntu yabyutse mu gitondo ngo yumve yafata imbunda ajye kurwana urugamba rwo kubohora igihugu.”

“Mbere na mbere bari bifitemo urukundo n’ishyaka ry’igihugu, [umuntu] yumva ko kuba hanze akitwa impunzi iteka bimusuzuguza, ahaguruka rero agiye kurwanira ka gaciro yumva atagomba guhora atakaza.”

Yavuze ko mbere y’urugamba habanza impamvu ituma nyir’ukurwana yumva ko yayitsinda, avuga ko no mu mutekano hazaba intwari iharanira ko ibyagezweho bitangizwa n’ibitaragerwaho zigaharanira ko byongerwa.

Uyu munsi u Rwanda rufite ibyiciro bitatu by’intwarir birimo Imanzi, Imena n’Ingenzi, gusa nta muntu urashyirwa cyiciro cy’ingenzi, nubwo hari benshi bahawe imidali y’Ishimwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza