Kwamamaza

Byagenze gute kugira ngo ’Ingangurarugo’ zigabize inka z’Umwami Rwogera?

Yanditswe kuya 11-11-2016 saa 10:37' na Ntakirutimana Deus


U Rwanda rwagize intwari zitandukanye zikigaruka mu mitima ya benshi kubera ibikorwa byazo. Muri zo hari Abami barwaguye n’umutwe w’Ingangurarugo waranzwe n’ibikorwa bikibazwaho na benshi, nko gushimuta inka z’umwami n’ibindi kugeza zishwe n’abazungu.

Uwo mutwe wari ugizwe n’abana baje kuvamo abarashi b’abakogoto, bakiratwa ubutwari nka Rukara rwa Bishingwe wanze gusuzugurwa n’abakoloni.

Amateka y’Ingangurarugo

Ingangurarugo ni umutwe w’abana bakuranye n’umwami Kigeli IV Rwabugili atarimikwa acyitwa Sezisoni. Igitabo ‘Ingoma ya Kigeli VI Rwabugili na Nyirayuhi Kanjogera’, kigaragaza ko mu bwana bwe uyu Mwami yaranzwe no gukunda intambara, kuko yagabaga udutero afatanije n’urungano rwe bakanyaga inka.

Abenshi bumva Ingangurarugo nk’umwe mu mitwe y’ingabo waremwe ku ngoma ya Rwabugili. Nyamara ngo wabonye izuba ku ngoma ya Mutara II Rwogera se wa Rwabugili.

Mu bwana bwe, Rwabugili yabyirukiye kwa Nyirakuru, Umugabekazi Nyiramavugo Nyiramongi, abyirukana n’abana 30 bo mu kigero cye yari ahatse.

Ab’inkoramutima muri abo bana bari Bisangwa bya Rugombituri na Mugugu wa Shumbusho. Amateka avuga ko bajyaga babumba inka mu byondo, Sezisoni (Rwabugili) akazibagabira nkuko abakuru bagabiranaga inka.

Nk’abandi bana bose, aba nabo bakoraga imirimo bakitabira n’imikino y’abato. Birirwaga bahiga inyoni ndetse bakarushanwa no kurasa uruti (kumasha) bifashishije uduheto duto twa cyana.

Abakuru bitegerezaga amashagaga y’abo bana, batangariraga uburyo ari abakogoto; abahanga b’umuheto (mu kumasha). Sezisoni n’urungano rwe batangiye kujya bitabira ibitaramo i Bwami, bakumva aho abahungu birahira umwami cyangwa ababagabiye.

Baje gusobanuza abakuru impamvu umuntu yirahira undi, babimenye bahindukirana Sezisoni wari umeze nk’ubahatse bamusaba kuzabagabira, ariko ababwira ko nta mashyo atunze.

Bafashe iya mbere begera Umwami Rwogera bamubaza igihe azagabirira umuhungu we Sezisoni ngo nawe abonereho abagabire bajye bamwirahira. Yababwiye bigezo (ashyenga) ko niba bashaka inka bakagombye kujya kwinyagira izabo mu gihe bumva ko ari intwari.

Abana banyanze inka Umwami Rwogera arumirwa

Abana banogeje umugambi maze bagaba igitero ku ishyo ry’Umwami Rwogera ryitwaga Intarama za Rwogera. Muri icyo gitero barasanye n’abashumba bazirindaga barabanesha inka bazihata ikibando.

Mu gihe gito bari basesekaye ku karubanda ibyivugo ari byose ab’ibwami bati “Izi Ngangurarugo tuzicitse dute?” babise iryo zina ‘Ingangurarugo’ kuko arizo ngabo zubahutse kugangura urugo rw’umwami. (’Kugangura’ ni ugutera intugunda cyangwa akaduruvayo).

Umwami Rwogera yashatse kurakarira abo bana maze abatware bamwumvisha ko ari we wabahaye uburenganzira maze bose abagabira inka zibakwiriye.

Ku bw’ubutwari bwakomeje kuranga izo Ngangurarugo, Sezisoni amaze kwima agafata izina rya Kigeli IV Rabugili, yafashe wa mutwe awugira umutwe ndangangoma ye ; ni ukuvuga ingabo zihariye z’umwami, zongewemo izindi.

Ubutwari bwa ’Bisangwa bya Rugombituri’

Bisangwa yari afite se witwaga Rugombituri, agahungu katoraguwe n’Umwami Gahindiro kamerewe nabi, kakazahurwa n’ibiryo byagoye umwami kubimenya byitwa ’ituri’, ari naho yakomoye iryo zina ‘Rugombituri’.

Mu mateka y’u Rwanda hari imvugo yagiraga iti ‘umwami ntiyica, hica rubanda’. Umwami Kigeri IV Rwabugili nawe yavuzweho gutanga bamwe mu bantu babaga baregeye umwami ngo bicwe.

Hari amakuru avuga ko umunsi umwe, umwana yabajije Rwabugili ati “Ese kuki ukunda kwica? Rwabugili aramusubiza ati "Si ibi bigabo se bindegera? Rwabugili aravuga ati “Ngaho utari Wandegera umuntu nahaguruke", abandi baryumaho bakomeza baricara, nyamara Bisangwa bya Rugombituri arahaguruka kuko nta muntu yari yakamuregera mu mateka ye, asangira n’umwami ku nzoga y’imihigo.

Iherezo rya zimwe mu Ngangurarugo

U Rwanda ni kimwe mu bihugu bitigeze byishimira gukolonizwa, mu kwihagararaho rwagerageje kurwana n’abakoloni bari bitwaje intwaro zirimo imbunda zirasa amasasu, mu gihe ingabo z’u Rwanda z’icyo gihe zarwanishaga imiheto yatamikwaga imyambi ndetse n’amacumu.

Ingangurarugo zafatwaga nk’intwari icyo gihe zagiye ku rugamba rwo kurwanya abakoloni. Rutalindwa wari Umwami w’u Rwanda, yakiriye intumwa yoherejwe n’umutware Rwabirinda wategekaga mu Kinyaga aje kumubwira ko i Cyangugu abazungu bahateye bakaba bashinze ibirindiro i Shangi. Rutalindwa ngo yahise akoresha inama igitaraganya yari ikoraniyemo abatware bakuru kugira ngo barebe icyo bakora.

Uwitwaga Rwangampuhwe rwa Nkangura, niwe wategekaga ingabo zitwa Abakeramihigo. Uyu rero ngo yabasabye ko batagomba kwibeshya ngo bajye kurwana n’abazungu kuko na Rwabugili ubwe ngo yari yaravuze ko ntawe ujya abarwanya.

Ibi ariko Kabare na Rutishereka barabyanze bavuga ko badakwiye kugendera ku byo Rwabugili yakoze ahubwo basaba ko bagomba gutabara mu maguru mashya kuko igihugu cyari cyatewe.

Biteguye kujya ku rugamba muri Nyakanga 1896 nk’uko bigaragara mu gitabo cya Luis de Lacger cyitwa “Le Rwanda ancient et moderne.”

Nshozamihigo mwene Rwabugili yagizwe umugaba wacyo aherekejwe na bamwe mu bakomeye nka Muhigirwa na Bisangwa bya Rugombituri.

Iki gitero cyahitanye Abanyarwanda batabarika bari bagitabayemo, kuko abazungu barashishaga imbunda. Mu baguyeyo harimo na Bisangwa bya Rugombituri na Mugugu wa Shumbusho naho Muhigirwa we arakirokoka kuko yabonye byakomeye agakiza amagara ye.

Abanyarwanda bakubiswe incuro maze i Bwami bayoboka ku neza hakoreshejwe inzira y’imishyikirano hagati y’impande zombi. Mu rwego rw’imishyikirano ku ruhande rw’u Rwanda, hoherejwe Rwabirinda na Rwidegembya bajya gutwara i Shangi mu izina ry’abazungu,maze abazungu nabo ngo boherereza umwami impano zirimo imyenda ariko amakuru akavuga ko umwami yanze kuyambara bakayijugunya mu Kanyaru.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved