IGIHE.com > Umuco > Amateka
Huye: Hotel Faucon izavugururwa habungabungwa amateka

Huye: Hotel Faucon izavugururwa habungabungwa amateka


Yanditswe kuya 28-01-2013 - Saa 09:09' na ORINFOR

Mu gihe Inama Njyanama y’Akarere ka Huye yemeje ko Hotel Faucon kimwe n’ibindi bikorwa remezo biranga umujyi wa Huye bizavugururwa mu rwego rwo gutanga isura nziza, iyi hoteli ngo izavugururwa hanabungabungwa ibimenyetso by’amateka y’u Rwanda.

Iki cyemezo gishyigikiwe n’abatuye aka karere, kuko bavuga ko iterambere rihamye ari irizirikana amateka cyane cyane ku bice nyaburanga.

Hotel Faucon iri muri hoteli zigomba kuvugururwa bijyanye n’igihe mu Mujyi wa Huye, bikazakorwa habungabungwa ibimenyetso by’amateka y’u Rwanda biyirimo nk’inzu Umwami Mutara wa gatatu Rudahingwa yararagamo iyo yabaga ari muri ‘Astrida’ [izina ryahabwaga umujyi wa Butare] mu gihe cyo hambere.

Gahunda yo kuvugurura Hotel Faucon habungabungwa amateka bamwe mu baturage bo mu Karere ka Huye barayishimira.

Sebukangaga Jean Baptiste, ni umwe muri bo unafite Hotel Barthos na yo iri mu Mujyi wa Huye. Avuga ko Hotel Faucon yari ikomeye cyane kandi ikagira umwihariko w’uko mu gihe cya gikoloni itinjirwagamo n’umwirabura, ariko Umwami Rudahingwa akaba yari ahafite inzu yabagamo. Sebukangaga yemeza ko Hotel Faucon yanabaye hoteli nziza mu Rwanda ugereranyije n’izariho mu myaka y’1950 n’1960.

Namwana Seraphine, na we atuye mu Karere ka Huye. Avuga ko ahagana mu 1962 Hotel Faucon yari ikomeye, akongeraho ko n’ubwo atinjiragamo yabonaga iri mu mahoteli akomeye yarangaga Umujyi wa Butare. Yemeza ko ivuguruwe hazirikanwa amateka byaba ari byiza kuko amateka ari ikintu gikomeye ku muryango w’abantu.

Amwe mu mateka ya Hotel Faucon

N’ubwo Faucon yasaga n’uko ari umwihariko w’abazungu n’umwami Rudahingwa, uyu mwami yaje kuhakirira abashefu (Chefs) n’aba sushefu (sous – chefs), bityo aba atanze uburenganzira ku bandi Banyarwanda bifuzaga kuyigana icyakora abenshi ntibayitabiriye cyane kuko ibiciro byayo icyo gihe byari bihanitse.

Mugengana Joseph, mwene Nturo wabaye umushefu ku bwa Rudahigwa; yabaye sushefu wa Muyira binatuma yakirwa n’Umwami Rudahingwa muri Hotel Faucon. Ku myaka 80 afite ubu, avuga ko Hotel Faucon yanakiraga Umwami Mwambutsa w’ U Burundi bityo akumva aya ari amateka akomeye adakwiye gusibangana.

Uko ivugururwa rya Faucon rizakorwa

Akarere ka Huye kavuga ko Hotel Faucon izavugururwa habungabungwa amateka y’u Rwanda. Kayiranga Muzuka Eugene, umuyobozi w’aka karere, avuga ko ibi bizakorwa ku bufatanye bw’akarere, ikigo cy’ingoro z’ igihugu z’umurage w’u Rwana hamwe na nyiri Faucon.

N’ubwo bitazwi neza igihe Hotel Faucon yubakiwe, imbere yayo hari icyapa kigaragaza ko yari icumbi ry’umwami w’u Bubiligi n’umugore we. Nyuma y’umuriro wayangije mu 1943 yongeye kuvugururwa na nyirayo ari we Faucon, waje kuyigurisha ahagana mu 1962. Ubu nyirayo ni Umunyarwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO